୨୬/୧୧ ମୁମ୍ବାଇ ଆକ୍ରମଣ ଷଡ଼ଯନ୍ତ୍ରକାରୀ ତହଓ୍ବୁର ରାଣା ଗିରଫ: ଭାରତକୁ ପ୍ରତ୍ୟର୍ପଣର ହେବ ବିଚାର
01 ଲସ୍ ଏଞ୍ଜେଲସ୍/ ନୂଆଦିଲ୍ଲୀ, ୨୦।୬: ମୁମ୍ବାଇ ୧୬/୧୧ ଆକ୍ରମଣର ଷଡ଼ଯନ୍ତ୍ରକାରୀ ତହଓ୍ବୁର ରାଣାଙ୍କୁ ଲସ୍ ଏଞ୍ଜେଲସ୍ ପୋଲିସ ଗିରଫ କରିଛି। ମୂଳ ପାକିସ୍ତାନୀ ରାଣା କାନାଡ଼ାରେ ରହି ଲଶ୍କର-ଇ-ତୋଏବା ଆତଙ୍କବାଦୀ ସଂଗଠନକୁ ସହାୟତା ଯୋଗାଉଥିଲେ। ସେ ଗତ ୧୪ ବର୍ଷ ଧରି ସିକାଗୋ ଜେଲ୍ରେ ଥିଲେ। ତେବେ ତାଙ୍କ ନମୁନା ପରୀକ୍ଷା କରୋନା ପଜିଟିଭ୍ ଆସିବା ପରେ ଗତ ସପ୍ତାହରେ ସେ ଜେଲ୍ରୁ ମୁକ୍ତ ହୋଇଥିଲେ। ତାଙ୍କୁ ଭାରତକୁ ପ୍ରତ୍ୟର୍ପଣ କରିବା ଲାଗି ଅପିଲ୍ କରାଯାଇଥିଲା। ତେଣୁ ତାଙ୍କୁ ଲସ୍ ଏଞ୍ଜେଲସ୍ ପୋଲିସ ଗିରଫ କରିଛି। ତାଙ୍କ ବିରୋଧରେ ହତ୍ୟା ଏବଂ ଷଡ଼ଯନ୍ତ୍ର ଅଭିଯୋଗ ରହିଛି। ମାତ୍ର ଆମେରିକାରେ ଗୋଟିଏ ଅପରାଧରେ ଏକାଧିକ ଥର ଦଣ୍ଡାଦେଶ କରାଯାଉ ନ ଥିବାରୁ କୋର୍ଟ ପକ୍ଷରୁ ଆମେରିକା ସରକାରଙ୍କୁ ଜୁନ୍ ୨୬ ସୁଦ୍ଧା ତଥ୍ୟ ଉପସ୍ଥାପନ ପାଇଁ ନିର୍ଦ୍ଦେଶ ଦେଇଛନ୍ତି। ଜୁନ୍ ୧୧ରେ ଶୁଣାଣି ହୋଇଥିବାବେଳେ ଏହାର ପରବର୍ତ୍ତୀ ଶୁଣାଣି ଜୁନ୍ ୩୦ରେ ହେବ। ଜୁନ ୨୨ ସୁଦ୍ଧା ଜାମିନ ଆବେଦନ କରିବାକୁ ରାଣାଙ୍କ ଆଇନଜୀବୀଙ୍କୁ କୁହାଯାଇଛି। ସୂଚନାଯୋଗ୍ୟ, ୧୨ ବର୍ଷ ତଳେ ୨୦୦୮ ନଭେମ୍ବର ୨୬ରେ ମୁମ୍ବାଇରେ ହୋଇଥିବା ଆତଙ୍କବାଦୀ ଆକ୍ରମଣରେ ୧୬୦ ଜଣଙ୍କ ମୃତ୍ୟୁ ଘଟିଥିଲା। ଏଥିରେ ୧୦ ଜଣ ଆତଙ୍କବାଦୀ ସାମିଲ୍ ହୋଇଥିଲେ। ସେମାଙ୍କ ମଧ୍ୟରୁ ୯ ଜଣଙ୍କର ମୃତ୍ୟୁ ଘଟିଥିବାବେଳେ ଅଜମଲ କସାବଙ୍କୁ ଗିରଫ କରାଯାଇଥିଲା। ପରେ କସାବଙ୍କୁ ଫାଶୀ ଦିଆଯାଇଥିଲା।