ବଲାଙ୍ଗୀର ଅଫିସ୍, ୩।୧୨: ବଲାଙ୍ଗୀର ଜିଲା ପୋଲିସ ପ୍ରଶାସନ ପକ୍ଷରୁ ଏକ ସଚେତନତା ର଼୍ୟାଲି ଆରମ୍ଭ କରାଯାଇଛି। ବଲାଙ୍ଗୀର ଏସ୍ପି ସନ୍ଦିପ ମାଡକରଙ୍କ ନେତୃତ୍ୱରେ ଏହି ର଼୍ୟାଲି ଆଦର୍ଶ ଥାନା ପ୍ରାଙ୍ଗଣରୁ ଆରମ୍ଭ ହୋଇ ସହରର ମୁଖ୍ୟ ରାସ୍ତାଗୁଡିକ ପରିକ୍ରମା କରିଥିଲା ା ଏହି ସଚେତନତା ର଼୍ୟାଲିରେ ମୁଖ୍ୟତଃ ସହରରେ ଡ୍ରଗ୍ସ୍, ମାଦକ ଦ୍ରବ୍ୟ ସେବନର ଭୟାବହତା ଓ ଟ୍ରାଫିକ ଆଇନକୁ ଜନସାଧାରଣ ମାନିବାକୁ ପ୍ଳାକାର୍ଡ ଓ ସ୍ଲୋଗାନ ଦିଆଯାଇ ଜନସାଧାରଣଙ୍କୁ ସଚେତନତା କରାଯାଇଥିଲା ା କିଛିଦିନ ପୂର୍ବରୁ ଏସପିଙ୍କ ନେତୃତ୍ୱରେ ସହରରେ ବୃଦ୍ଧି ପାଉଥିବା ନିଶା କାରବାର ରୋକିବା ପାଇଁ ଏକ ସ୍ବତନ୍ତ୍ର ଟିମ ଗଠନ କରାଯାଇଥିଲା ଏହି ଟିମ୍ ପକ୍ଷରୁ ବଲାଙ୍ଗୀର ଓ ପାଟଣାଗଡ ଅଞ୍ଚଳରେ ଚଢ଼ାଉ କରାଯାଇ ୨୭ ହଜାର କଫ୍ ସିରପ୍ ଜବତ ହୋଇଥିଲା। ଏହାପରେ ଲୋକଙ୍କୁ ସଚେତନତା କରିବା ପାଇଁ ସହରର ବୁଦ୍ଧିଜୀବୀଙ୍କୁ ନେଇ ସଚେତନତା କାର୍ଯ୍ୟକ୍ରମ କରାଯାଇଥିଲା। ର଼୍ୟାଲିରେ ଅତିରିକ୍ତ ଆରକ୍ଷୀ ଅଧୀକ୍ଷକ ସୁବାସ ଚନ୍ଦ୍ର ଜମାଦାର, ଏସ୍ଡିପିଓ ଶ୍ରୀମନ୍ତ ବାରିକ, ହୋମଗାର୍ଡ ଆସିଷ୍ଟାଣ୍ଟ୍ କମାଣ୍ଡାଣ୍ଟ କୁମୁଦ ସେଠ୍, ଟାଉନ୍ଥାନା ଅଧିକାରୀ ସଂଗ୍ରାମ କେଶରୀ ପଟ୍ଟନାୟକ, ସମାଜସେବୀ ତଥା ଶ୍ରମିକ ନେତା ଲଲିତ କୁମାର ନାୟକ, ପୋଲିସ ବାହିନୀ, ବରିଷ୍ଠ ନାଗରିକ ବୃନ୍ଦ ଓ ନର୍ସିଂ ଛାତ୍ରୀଛାତ୍ର ଏବଂ ବିଭିନ୍ନ କଳେଜର ଛାତ୍ରୀଛାତ୍ରମାନେ ଅଂଶଗ୍ରହଣ କରିଥିଲେ।
