ଅନୁଗୋଳ ଅଫିସ, ୨୨।୮ – ଅନୁଗୋଳ ସହର ହରିମହୁରୀ ଛକରୁ ବୁଧବାର ପୌର କର୍ମଚାରୀମାନେ ୨୮ କୁଇଣ୍ଟାଲ ପଲିଥିନ ଜବତ କରିବା ସହ ୧ ହଜାର ଟଙ୍କା ଜରିମାନା ଆଦାୟ କରିଛନ୍ତି। ତେବେ ଏତେ ପରିମାଣର ପଲିଥିନ ଜବତ ହୋଇଥିଲେ ବି ମାତ୍ର ୧ ହଜାର ଟଙ୍କା ଜରିମାନା ଆଦାୟ ହୋଇଥିବାରୁ ଏହାକୁ ନେଇ ଅନେକ ବ୍ୟବସାୟୀ ପ୍ରଶ୍ନ ଉଠାଇଛନ୍ତି। ସେମାନଙ୍କ ନିକଟରୁ ଏକ କୁଇଣ୍ଟାଲ ପଲିଥିନ ଜବତ ହେଲେ ୫ରୁ ୧୦ ହଜାର ଟଙ୍କା ଜରିମାନା ନିଆଯାଉଥିବା ବେଳେ ଏ କ୍ଷେତ୍ରରେ ମାତ୍ର ୧ ହଜାର କାହିଁକି ବୋଲି ସେମାନେ ପ୍ରଶ୍ନ କରିଛନ୍ତି।
ପ୍ରକାଶ ଯେ, ବରଗଡ଼ରୁ ଏକ ପିକ୍ଅପ ଭ୍ୟାନ ନଂ. (ଓଡି୧୫ଏଲ୍-୮୫୦୧)ରେ ୨୮ କୁଇଣ୍ଟାଲ ପଲିଥିନ ଅନୁଗୋଳ ଆସୁଥିବା ପୌରସଂସ୍ଥା ନିକଟରେ ଖବର ପହଞ୍ଚିଥିଲା। ତେଣୁ ପୌରକର୍ମଚାରୀମାନେ ହରିମହୁରୀ ଛକରେ ଚଢ଼ାଉ କରି ପଲିଥିନ ସହ ଗାଡ଼ିକୁ ପୌରକାର୍ଯ୍ୟାଳୟକୁ ଆଣିଥିଲେ। ଗାଡ଼ିରେ ପ୍ରାୟ ୧ ଲକ୍ଷ ୩୦ ହଜାର ଟଙ୍କାର ପଲିଥିନ ଥିବା ଜଣାପଡ଼ିବା ପରେ ଜୋରିମାନା ବାବଦକୁ ୧ ହଜାର ଟଙ୍କା କଟାଯିବା ସହ ଉକ୍ତ ପଲିଥିନକୁ ଜବତ କରାଯାଇଥିବା ପୌରନିର୍ବାହୀ ଅଧିକାରୀ ଶୁଭେନ୍ଦୁ ଜେନା ସୂଚନା ଦେଇଛନ୍ତି। ତେବେ ସହରର ବ୍ୟବସାୟୀମାନେ ଉଠାଇଥିବା ପ୍ରଶ୍ନ ଉପରେ ଜେନା ଆଦୌ ମୁହଁା ଖୋଲି ନାହାନ୍ତି।