ଅନୁଗୋଳ ଅଫିସ, ୯।୫ – ଅନୁଗୋଳ ସ୍ଥିତ ସାତକୋଶିଆ ଅଭୟାରଣ୍ୟ ଓ ପାର୍ଶ୍ୱବର୍ତ୍ତୀ ୧୫ଟି ପଞ୍ଚାୟତର ୨୯୦ ଅସହାୟ ପରିବାରଙ୍କୁ ଏଫ୍ଇଏସ୍ ପକ୍ଷରୁ ରାଶନ ସାମଗ୍ରୀ ପ୍ରଦାନ କରାଯାଇଛି। ଅଭୟାରଣ୍ୟ ମଧ୍ୟରେ ଥିବା ଅନୁଗୋଳ ଓ ଆଠମଲ୍ଲିକର ସାଲର, କଟରଙ୍ଗ, ଅସନବାହାଳି, ପବଲା ଓ ବାଘୁଆପାଟ ଗ୍ରାମକୁ ରାଶନ ସାମଗ୍ରୀ ଯୋଗାଇ ଦିଆଯାଇଛି। ସ୍ଥାନୀୟ ସରପଞ୍ଚ, ରେଞ୍ଜ ଅଫିସର, ଫରେଷ୍ଟର, ଗ୍ରାମ ସଭାପତି ଓ ଆଠମଲ୍ଲିକ ବିଧାୟକ ରମେଶ ଚନ୍ଦ୍ର ସାଏ ପ୍ରମୁଖ ଉପସ୍ଥିତ ଥିଲେ। ସେହିପରି ନନ୍ଦପୁର, ଜଗନ୍ନାଥପୁର, ପୁରୁଣାକୋଟ, ବଲଙ୍ଗ, ଟିକରପଡ଼ା, ଟାଇଁସି, କୋଠଭୂଇଁ, ଅନ୍ତୁଳିଆ, ଟାପଢ଼ୋଲ, ପାଇକସାହି, ମଇମୁରା, ଠାକୁରଗଡ଼, ଆମ୍ବସରମୁଣ୍ଡା, କୁରୁମଟାମ, ସାପଘରା ପଞ୍ଚାୟତର ଗରିବ ପରିବାରଙ୍କୁ ରାଶନ ସାମଗ୍ରୀ ବଣ୍ଟନ କରାଯାଇଛି। ଏଥିସହ ଅନୁଗୋଳ ସହରାଞ୍ଚଳରେ ରହୁଥିବା ଅସହାୟ ଓ ବାହାର ରାଜ୍ୟର ଶ୍ରମଜୀବୀମାନଙ୍କୁ ରାଶନ ସହ ୧୦ ଦିନ ଧରି ରନ୍ଧା ଖାଦ୍ୟ ବଣ୍ଟନ କରାଯାଇଥିଲା। ଏଫ୍ଇଏସ୍ ଟିମ୍ ଲିଡର ସ୍ବପ୍ନା ଷଡ଼ଙ୍ଗୀଙ୍କ ନେତୃତ୍ୱରେ କର୍ମକର୍ତ୍ତାମାନେ ସହଯୋଗ କରିଥିଲେ।