ଅଭିନୟରେ ଅନୁପମ ଖେର କେତେ ଦକ୍ଷ ତାହା କହିବା ବାହୁଲ୍ୟ। ଭୂମିକାଟି ଯେମିତି ହୋଇଥାଉ ନା କାହିଁକି ତାକୁ ନେଇ ଆଣି ଥୋଇବାରେ ସେ ବେଶ୍ ପାରଙ୍ଗମ। ଥରେ ମନେପକାନ୍ତୁ ନା ସୁପରହିଟ୍ ଫିଲ୍ମ ‘ସାରାଂସ’କୁ। ଏଥିରେ ଅନୁପମ ଜଣେ ୬୦ବର୍ଷ ବୟସ୍କ ବୁଢ଼ା ଭୂମିକାରେ ଅଭିନୟ କରିଥିଲେ। ହେଲେ ସେତେବେଳେ ତାଙ୍କୁ କେତେ ବୟସ ହୋଇଥିଲା ଜାଣନ୍ତି ? ମାତ୍ର ୨୯ବର୍ଷ। ଅର୍ଥାତ୍, ଯୁବକ ଅବସ୍ଥାରେ ସେ ଏହି ରୋଲ୍ଟିକୁ ଏପରି ତୁଲାଇଥିଲେ ଯେ ତାହା ଏ ପର୍ଯ୍ୟନ୍ତ ଅନେକଙ୍କ ମନରେ ସତେଜ ହୋଇ ରହିଛି। ଏହାର ନିର୍ଦ୍ଦେଶକ ମହେଶ ଭଟ୍ଟ ପ୍ରଥମେ ଉକ୍ତ ଭୂମିକା ପାଇଁ ଅନୁପମଙ୍କୁ ଚୟନ କରିଥିଲେ। କିନ୍ତୁ ପରବର୍ତ୍ତୀ ସମୟରେ ତାଙ୍କୁ କାଷ୍ଟିଂରୁ ବାଦ୍ ଦିଆଯାଇଥିଲା। ହେଲେ ଠିକ୍ ସମୟରେ ନିଜ ଭୁଲ୍କୁ ବୁଝିପାରିବା ସହ ମହେଶ ପୁଣି ଥରେ ତାଙ୍କୁ ଯୋଗାଯୋଗ କରିଥିଲେ ଏବଂ ଅନୁପମ ପୂର୍ବ କଥାକୁ ଭୁଲି ଏଥିରେ ଅଭିନୟ କରିବାକୁ ରାଜି ହୋଇଥିଲେ। ‘ସାରାଂସ’ ଚଳଚ୍ଚିତ୍ର ପାଇଁ ସେ ଶ୍ରେଷ୍ଠ ଅଭିନେତା ଭାବରେ ଫିଲ୍ମ ଫେୟାର ପୁରସ୍କାର ପାଇଥିଲେ।