ଖୋର୍ଦ୍ଧା ଅଫିସ,୧୬ା୧: ଖୋର୍ଦ୍ଧା ଜିଲାର ଜଙ୍କିଆ ଥାନା ପୋଲିସ ଛଣଗିରିର ଦେଉଳି, ସିକୋ ବାଉତି ମନ୍ଦିର ସାହି ଉପରେ ବୁଧବାର ଚଢ଼ାଉ କରି ୨୯. ୭୭ ଗ୍ରାମ ବ୍ରାଉନସୁଗାର ଓ ୪ ବାଇକ୍ ଜବତ କରିଛନ୍ତି। ଏହି ଘଟଣାରେ ଗିରଫ ହୋଇଥିବା ଛଣଗିରିର ସଞ୍ଜୟ ମହାପାତ୍ର (୩୨) ଓ ସିକୋ ଦଳବେହେରାସାହିର ମାନସ କୁମାର ମାଝି(୩୦) ନାମକ ୨ ବ୍ୟବସାୟୀଙ୍କୁ କୋର୍ଟ ଚାଲାଣ କରାଯାଇଥିଲା । ଜାମିନ ନାମଞ୍ଜୁର ପରେ ଉଭୟଙ୍କୁ ଖୋର୍ଦ୍ଧା ସବ୍ଜେଲକୁ ପଠାଇ ଦିଆଯାଇଛି। ପୋଲିସ ସୂଚନା ଅନୁସାରେ, ଛଣଗିରିର ଦେଉଳି ଓ ସିକୋ ବାଉତି ମନ୍ଦିର ସାହିରେ ବ୍ରାଉନସୁଗାର କାରବାର ଚାଲିଥିବା ଅଭିଯୋଗ ହୋଇଥିଲା। ଖବରପାଇ ପୋଲିସ ଚଢ଼ାଉ କରିଥିଲା। ଛଣଗିରିର ସଞ୍ଜୟଙ୍କଠାରୁ ୧୫.୯୩୦ ଗ୍ରାମ ବ୍ରାଉନସୁଗାର, ବାଇକ୍ (ନଂ. ଓଡି୦୫ ଏଡି ୮୪୫୬, ଓଡି ୦୨ ଏଏଚ ୬୯୮୬, ଓ ଓଡି ୦୨ ଏଏଚ ୮୬୫୩), ୧୨୫୦ ଟଙ୍କା ଜବତ ହୋଇଛି। ସଞ୍ଜୟଙ୍କ ନଁାରେ ୨୦ ବି ଏନ୍ଡିପିଏସ୍ ଆକ୍ଟ ଦଫାରେ ନଂ. ୯/୨୦ରେ ମାମଲା ରୁଜୁ କରାଯାଇଛି। ସେହିପରି ସିକୋ ଦଳବେହେରାସାହିର ମାନସଙ୍କଠାରୁ ୧୩. ୮୪୦ ଗ୍ରାମ ବ୍ରାଉନସୁଗାର, ବାଇକ୍ (ନଂ. ଓଡି ୦୨ ଲଏଏଜେ ୬୪୭୭) ଜବତ କରାଯାଇଥିଲା। ମାନସଙ୍କ ନଁାରେ ୨୦ ବି ଏନ୍ଡିପିଏସ୍ ଆକ୍ଟ ଦଫାରେ ନଂ. ୧୦/୨୦ରେ ମାମଲା ରୁଜୁ କରାଯାଇଥିବା ଆଇଆଇସି ସତ୍ୟବ୍ରତ ଲେଙ୍କା କହିଛନ୍ତି।