ପ୍ୟାରିସ୍,୨୮।୩(ଏଏଫ୍ପି): ୨ ଅଲିମ୍ପିକ୍ ଚାମ୍ପିୟନଙ୍କ ସମେତ ୪ଜଣ ରୁଷୀୟ ଆଥଲେଟଙ୍କ ବିରୋଧରେ ଡୋପିଂ ଅଭିଯୋଗ ଆସିଛି। ଏହି ଆଥଲେଟମାନଙ୍କ ବିରୋଧରେ ଯଥେଷ୍ଟ ପ୍ରମାଣ ମିଳିଛି ବୋଲି ଆଥଲେଟିକ୍ସ ଇଣ୍ଟିଗ୍ରିଟି ୟୁନିଟ ତରଫରୁ କୁହାଯାଇଛି। ୨୦୦୮ ଅଲିମ୍ପିକ୍ ହାଇଜମ୍ପ ଚାମ୍ପିୟନ ଆଣ୍ଡ୍ରେ ସିଲନୋଭ, ୨୦୧୨ ଅଲିମ୍ପିକ୍ ୪୦୦ ମିଟର ହର୍ଡଲ୍ସ ଚାମ୍ପିୟନ ନାଟାଲିଆ ଆଣ୍ଟ୍ୟୁଖଙ୍କ ବିରୋଧରେ ଏଥିପାଇଁ କୋର୍ଟ ଅଫ୍ ଅର୍ବିଟ୍ରେଶନ ଫର ସ୍ପୋଟର୍ସ (ସିଏଏସ୍) ତରଫରୁ ଖୁବ୍ଶୀଘ୍ର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ସେହିପରି ୨୦୦୭ ବିଶ୍ୱ ଚାମ୍ପିୟଶନଶିପ୍ ରୌପ୍ୟ ପଦକ ବିଜୟିନୀ ତଥା ୧, ୫୦୦ ମିଟର ରନର ୟେଲେନା ସୋବେଲେଭା ଓ ହାମର ଥ୍ରେୟର ଓକ୍ସାନା କୋଣ୍ଡ୍ରାତୟେଭା ମଧ୍ୟ ସମଦଶା ଭୋଗିଛନ୍ତି। ବିଶ୍ୱ ନିଶା ନିବାରଣ ସଂସ୍ଥା (ନାଡ଼ା) ଦ୍ୱାରା ମାନ୍ୟତା ପାଇଥିବା କାନାଡାର ଆଇନଜୀବୀ ରିଚାର୍ଡ ମ୍ୟାକଲରେନ ୨୦୧୬ରେ ରୁଷିଆରେ ବ୍ୟାପକ ସଂସ୍ଥାଗତ ଡୋପିଂ ମାମଲା ଲୋକଲୋଚନକୁ ଆଣିଥିଲେ। ଉଲ୍ଲେଖଥାଉ କି, ସିଲନୋଭ କ୍ରୀଡ଼ା କ୍ୟାରିୟର ଶେଷ କରିବା ପରେ ରୁଷିଆନ ଆଥଲେଟିକ୍ସ ଫେଡେରେଶନର ଉପାଧ୍ୟକ୍ଷ ହିସାବରେ କାର୍ଯ୍ୟ କରିଆସୁଛନ୍ତି। ସେ ମଧ୍ୟ ୨୦୧୬ରେ ଫେଡେରେଶନର ଅଧ୍ୟକ୍ଷ ପଦ ପାଇଁ ନିର୍ବାଚନରେ ଅବତୀର୍ଣ୍ଣ ହୋଇଥିଲେ।