ନୟାଗଡ଼ ଅଫିସ,୧୪।୭-ଶନିବାର ଅପରାହ୍ନରେ ନୟାଗଡରେ ୨ଘଣ୍ଟା ଧରି ପ୍ରବଳ ବର୍ଷା ହୋଇଥିଲା । ଏହି ବର୍ଷାରେ ନୟାଗଡ଼ ମ୍ୟୁନିସିପାଲିଟିର ୧ ନମ୍ବର ୱାର୍ଡ଼ ବେହାଲ ହୋଇଯାଇଛି। ନୟାଗଡ଼ ପୂର୍ତ୍ତ ବିଭାଗ ଲେନ୍ରେ ରହୁଥିବା ଅଧିକାଂଶ ବ୍ୟକ୍ତିଙ୍କ ଘରେ ପାଣି ପଶି ଯାଇଥିବାର ଦେଖିବାକୁ ମିଳିଥିଲା। ଯାହାକୁ ନେଇ ୱାର୍ଡ଼ବାସୀ ଅସନ୍ତୋଷ ପ୍ରକାଶ କରିଛନ୍ତି। ମ୍ୟୁନିସିପାଲିଟି କର୍ତ୍ତୃପକ୍ଷ ଏ ଦିଗରେ କୌଣସି ସମାଧାନ କରୁ ନ ଥିବାରୁ ଏହିଭଳି ଅସୁବିଧା ହେଉଥିବା ନେଇ ସେମାନେ ଅଭିଯୋଗ କରିଛନ୍ତି।
ପ୍ରକାଶ ଯେ, ଶନିବାର ହୋଇଥିବା ବର୍ଷାରେ ରାମଚନ୍ଦ୍ର ସାହୁ, ଭରତ ସାହୁ, ସେକ୍ ୟୁସୁ୍ଫ, ପ୍ରଫୁଲ୍ଲ ମିଶ୍ର, ତପନ କୁମାର ମିଶ୍ର, ରାମଚନ୍ଦ୍ର ସାହୁଙ୍କ ଘରେ ପାଣି ପଶି ଯାଇଥିଲା। ପୂର୍ବରୁ ବର୍ଷା ହେଲେ ପାଣି ଏକ ଘରୋଇ ଜମି ଦେଇ ବହି ଯାଉଥିଲା। ହେଲେ ଚଳିତ ବର୍ଷ ଉକ୍ତ ଜମିର ମାଲିକ ସେଠାରେ ରହିବାରୁ, ପାଣି ଜମି ରହୁଛି। ମ୍ୟୁନିସିପାଲିଟି କର୍ତ୍ତୃପକ୍ଷ ଏହାର ସମାଧାନ ନ କରିବାରୁ ୱାର୍ଡ଼ବାସୀମାନେ ଏହିଭଳି ହଇରାଣ ହେଉଛନ୍ତି। ଏହାର ସମାଧାନ ନ ହେଲେ ୱାର୍ଡ଼ବାସୀ ଆଗାମୀ ଦିନରେ ରାଜରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି।
