କର୍ଲାମୁଣ୍ଡା, ୧୨।୩ (ଡି.ଏନ୍.ଏ.)- ସରକାର ବୁଢ଼ାବୁଢ଼ୀ, ବିଧବା, ଛାର୍ରି ମହିଲା, ଦିବ୍ୟାଙ୍ଗମାନକୁ ସାମାଜିକ ସୁରକ୍ଷା ଯୋଜନାରେ ଭତା ଯୁଗେଇ ଦେଉଛନ୍। ହେଲେ ଅନେକ ଜାଗାରେ ସରକାରୀ ଅଧ୍କାରୀ, କରମ୍ଚାରୀକଁର ଖାମଖିଆଲି ମନଭାବ ଲାଗି ହକ୍ଦାର ହିତାଧିକାରୀ ଯୋଜନାର ଲାଭ ପାଏବାରୁ ବଁଚିତ୍ ହେଉଛନ୍। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକ ଗଜବାହାଲ ପଁଚେତ୍ ଧଅଁରାଖମନ ଗଁାରେ।
ସୂଚନା ଅନ୍ସାରେ ଧଅଁରାଖମନ ଗଁାଟା ବ୍ଲକ ସଦରନୁ ପାଖାପାଖି ୨୦ କି.ମି. ଦୂରେ ରହିଛେ। ଗଁାର ବଡ଼ଭାଗି ଲୋକ ଗରିବ୍ ହେଇଥିଲାବେଲେ ଚାଷବାସ, କୁଲିମଜୁରି କରି ନିଜର ନିଜର କୁଟୁମ ପୁଷୁଛନ୍। ଇ ଗଁାର ବୁରୁଧ୍ ଚିତ୍ର ରଣା(୬୫), ସରସ୍ବତୀ ପୁଟେଲ (୬୪), ରୂପ ମାଝି (୬୫), ଚନ୍ଦ୍ରମଣି ଭୋଇ (୬୩), ଗଳିତ ଭୋଇ (୬୨), ରୁପେଶ୍ୱର ଭୋଇ (୭୦), ବଚନୀ ଭୋଇ (୬୬), ପାନ ରଣା (୬୫) ପରମୁଖ ୮ ଝନ୍ ବୁଢ଼ାବୁଢ଼ୀ ଭତାର ଲାଗି ୨ ବଛର ହେଲା ଆବେଦନ କରିଆସୁଛନ୍। ହେଲେ ଆଏଜ୍ତକ ଇମାନେ ଭତା ପାଏବାରୁ ବଁଚିତ୍ ଥିବାର ଅଭିଯୋଗ କରିଛନ୍। ଇ ଦିଗେ ବ୍ଲକ ପରଶାସନ ଦୁରୁଷ୍ଟି ଦେଇ ପଦକ୍ଷେପ ନେବାକେ ଗ୍ରାମ ବିକାଶ କମିଟିର ସଭାପତି ଅନିରୁଦ୍ଧ ପଟେଲ, ସଂପାଦକ ମମତା ଭୋଇ ଦାବି କରିଛନ୍।