ନୂଆଦିଲ୍ଲୀ,୧୦ା୭ (ପି.ଟି.): ଭାଜପା ୨୦୧୬ରୁ ୨୦୧୮ ମଧ୍ୟରେ ୧୫ ଶହ ଶିଳ୍ପ ଜଗତରୁ ୯୧୫ କୋଟିରୁ ଅଧିକ ଟଙ୍କା ଚାନ୍ଦା ଆକାରରେ ପାଇଛି। ଏହି ସମୟ ମଧ୍ୟରେ କଂଗ୍ରେସକୁ ମିଳିଥିବା ଚାନ୍ଦାଠାରୁ ଏହା ୧୬ଗୁଣରୁ ଅଧିକ ବୋଲି ଜଣାପଡ଼ିଛି। ଏହି ଦୁଇବର୍ଷ ମଧ୍ୟରେ ଜାତୀୟ ରାଜନୈତିକ ଦଳଗୁଡ଼ିକୁ ମିଳିଥିବା ଚାନ୍ଦା ସମ୍ପର୍କରେ ଆସୋସିଏଶନ୍ ଫର ଡେମୋକ୍ରାଟିକ୍ ରିଫର୍ମ(ଏଡିଆର୍) ରିପୋର୍ଟରେ ପ୍ରକାଶ ପାଇଛି। ବ୍ୟବସାୟ ପ୍ରତିଷ୍ଠାନଗୁଡ଼ିକରୁ ରାଜନୈତିକ ଦଳଗୁଡ଼ିକୁ ଏହି ସମୟ ମଧ୍ୟରେ ମିଳିଥିବା ଚାନ୍ଦା ମଧ୍ୟରେ ଭାଜପାର ଅଂଶ ୯୩% ବୋଲି ଜଣାପଡ଼ିଛି।
୬ଟି ଜାତୀୟ ରାଜନୈତିକ ଦଳ ମଧ୍ୟରୁ ଭାଜପାକୁ ୧,୭୩୧ କର୍ପୋରେଟ୍ ୯୧୫.୫୯୬ କୋଟି ଟଙ୍କା ଚାନ୍ଦା ଆକାରରେ ଦେଇଥିବାବେଳେ କଂଗ୍ରେସକୁ ୧୫୧ କର୍ପୋରେଟ୍ ୫୫.୩୬ କୋଟି ଟଙ୍କା ଦେଇଛନ୍ତି। ସେହିଭଳି ଏନ୍ସିପିକୁ ୨୩ କର୍ପୋରେଟ୍ରୁ ୭.୭୩୭ କୋଟି ଟଙ୍କା ମିଳିଛି। ୨୦୧୬-୧୭ ଓ ୨୦୧୭-୧୮ ଆର୍ଥିକ ବର୍ଷରେ କର୍ପୋରେଟମାନଙ୍କଠାରୁ ସ୍ବେଚ୍ଛାକୃତ ଚାନ୍ଦା ୨୦ ହଜାର ଟଙ୍କାରୁ ଅଧିକ ଥିଲା। ଭାଜପାକୁ ୯୪% ଓ କଂଗ୍ରେସକୁ ୮୧% ମିଳିଥିଲା। କିନ୍ତୁ ୨୦୧୨-୧୩ରୁ ୨୦୧୭-୧୮ ଆର୍ଥିକ ବର୍ଷ ମଧ୍ୟରେ ଭାଜପାକୁ ସର୍ବାଧିକ ୧,୬୨୧.୪୦ କୋଟି ଟଙ୍କା ଅର୍ଥାତ୍ ମୋଟ କର୍ପୋରେଟ୍ ଚାନ୍ଦାର ୮୩.୪୯% ମିଳିଥିଲା।
ରିପୋର୍ଟ ମୁତାବକ ୨୦୦୪-୦୫ରୁ ୨୦୧୧-୧୨ ମଧ୍ୟରେ ଜାତୀୟ ଦଳଗୁଡ଼ିକୁ କର୍ପୋରେଟ ଚାନ୍ଦା ପରିମାଣ ୧୬୦% ବଢ଼ିଛି। ସେହିଭଳି ୨୦୧୨-୧୩ରୁ ୨୦୧୭-୧୮ ମଧ୍ୟରେ ଏହି ଚାନ୍ଦା ପରିମାଣ ୪୧୪% ବୃଦ୍ଧିପାଇଛି। କିନ୍ତୁ ୨୦୧୫-୧୬ ଆର୍ଥିକ ବର୍ଷରେ ଏହି ଦଳଗୁଡ଼ିକୁ ସେଭଳି କର୍ପୋରେଟ୍ ଚାନ୍ଦା ମିଳିପାରି ନ ଥିବା ରିପୋର୍ଟରେ ଦର୍ଶାଯାଇଛି। ୨୦୧୬-୧୭ରୁ ୨୦୧୭-୧୮ ମଧ୍ୟରେ ଜାତୀୟ ଦଳକୁ କର୍ପୋରେଟ୍ ଚାନ୍ଦା ୨୫.୦୭% କମିଥିବା ଜଣାପଡ଼ିଛି। ଅନ୍ୟ ଜାତୀୟ ରାଜନୈତିକ ଦଳ ସିପିଆଇ, ସିପିଏମ୍, ଏଆଇଟିସିର କର୍ପୋରେଟ୍ ପାଣ୍ଠିକୁ ଏଡିଆର୍ ସ୍ଥାନ ଦେଇଛି। ସିପିଆଇକୁ ସବୁଠାରୁ କମ୍ ଅର୍ଥାତ୍ ୨% କର୍ପୋରେଟ୍ ଚାନ୍ଦା ମିଳିଥିବା ରିପୋର୍ଟରେ ଉଲ୍ଲେଖ ରହିଛି।