ଫଳ ରସ ପିଇବା ଛୋଟ ଛୁଆଙ୍କଠାରୁ ଆରମ୍ଭ କରି ବୃ୍ଦ୍ଧ ଯାଏଁ ସମସ୍ତଙ୍କୁ ଭଲ ଲାଗିଥାଏ। ଏହାଦ୍ୱାରା ଜରୁରୀ ପୋଷକ ତତ୍ତ୍ୱ ମିଳିବା ସହ ଶରୀରରେ ପାଣିର ଅଭାବକୁ ମଧ୍ୟ ଦୂର କରିଥାଏ। କିନ୍ତୁ ଆପଣ ଜାଣିଛନ୍ତି କି, ଛୋଟ ପିଲାଙ୍କୁ ଫଳ ରସ ଦେବା ଉଚିତ ନୁହେଁ। ସେ ସତେଜ ଫଳ ରସ ହେଉ କି ବଜାରର ଫଳ ରସ। ବିଶେଷକରି ୨ବର୍ଷରୁ ୧୮ ବର୍ଷର ପିଲାଙ୍କୁ ଏହି ଫଳ ରସ ବା ଫ୍ରୁଟ ଡ୍ରିଙ୍କ୍ସ ଦେବା ଉଚିତ ନୁହେଁ। ଏହା ବଦଳରେ ବିଭିନ୍ନ ଋତୁରେ ଆସୁଥିବା ଫଳ ସବୁ ଦେଲେ ସେମାନଙ୍କ ଶରୀର ପାଇଁ ଅତ୍ୟନ୍ତ ଲାଭଦାୟକ। ନିକଟରେ ଶିଶୁ ବିଶେଷଜ୍ଞଙ୍କ ଦ୍ୱାରା ଗବେଷଣାରୁ ଜଣାପଡ଼ିଥିଲା ଯେ, ଛୋଟ ପିଲାଙ୍କୁ ଫଳ ରସ ଦିଆଯିବାରୁ ସେମାନଙ୍କୁ ଉଚ୍ଚ ରକ୍ତ ଚାପ, ହୃତ୍ପିଣ୍ଡ ଓ ଦାନ୍ତ ସମ୍ବନ୍ଧୀୟ ସମସ୍ୟା ଦେଖାଦେଇଥାଏ। ଯଦି ଆପଣ ଆପଣଙ୍କ ପିଲାଙ୍କୁ ଫଳ ରସ ଦେବାକୁ ଚାହୁଁଛନ୍ତି ତାହେଲେ କେତେ ପରିମାଣରେ ଦେବେ ତାହା ଜାଣିବା ନିହାତି ଜରୁରୀ। ୨ବର୍ଷରୁ ୫ ବର୍ଷର ପିଲାଙ୍କୁ ୧୨୫ ମିଲି ଲିଟର ଅର୍ଥାତ୍ ଅଧ କପ୍ ଓ ୫ ବର୍ଷର ଊର୍ଦ୍ଧ୍ୱ ପିଲାଙ୍କୁ ୨୫୦ ମିଲି ଲିଟର ଫଳ ରସ ଦେବା ଉଚିତ୍। ଏହାଠାରୁ ଅଧିକ ଦେଲେ ପିଲାଙ୍କ ଶରୀରର ପାଇଁ କ୍ଷତିକାରକ ହୋଇଥାଏ।