ବାହାନଗା, ୪ା୧୦(ଡି.ଏନ.ଏ.)-୧୬ ନମ୍ବର ଜାତୀୟ ରାଜପଥ ଉପରୁ ପୃଥକ ସ୍ଥାନରୁ ଦୁଇ ଯୁବକଙ୍କଠାରୁ ୨ ମୋଟରସାଇକେଲ ଲୁଟ୍ ହେବା ଘଟଣା ସାଧାରଣରେ ଭୟର ବାତାବରଣ ସୃଷ୍ଟି କରିଛି। ଏକ ପ୍ରାଣୀ ଖାଦ୍ୟ କମ୍ପାନୀର କର୍ମଚାରୀ ଅଜିତ କୁମାର ମହନ୍ତ ନିଜ ମୋଟରସାଇକେଲ ଯୋଗେ ବାଲେଶ୍ୱରସ୍ଥିତ ନିଜ କମ୍ପାନୀକୁ ଯାଉଥିଲେ। ପଣପଣାଠାରେ ତାଙ୍କ ଆଗରେ ଏକ ମୋଟରସାଇକେଲ ହଠାତ୍ ଆସି ଅଟକିଯିବାରୁ ସେ ନିୟନ୍ତ୍ରଣ ହରାଇ ତଳେ ପଡିଯାଇଥିଲେ। ଏହି ସମୟରେ ଲୁଟେରାମାନେ ତାଙ୍କ ମୋଟର ସାଇକେଲ(ନଂ.ଓଡି୦୯-ଇ-୮୭୩୩)କୁ ଲୁଟ୍ କରିନେବା ସହିତ ତାଙ୍କ ମୋବାଇଲ ଫୋନକୁ ମଧ୍ୟ ଲୁଟି ନେଇଛନ୍ତି। ଏନେଇ ସେ ଖନ୍ତାପଡା ଥାନାରେ ଅଭିଯୋଗ କରିବା ପରେ ଥାନାରେ ଏକ ମାମଲା (ନଂ.୩୧୧/୧୯) ରୁଜୁ ହୋଇଛି। ସେହିପରି ଗୁରୁବାର ରାତି ପ୍ରାୟ ସାଢେ ୯ଟା ବେଳେ ଲଲାଟେନ୍ଦୁ ପଣ୍ଡା(୩୪) ବାଲେଶ୍ୱରରୁ ୧୬ ନମ୍ବର ଜାତୀୟ ରାଜପଥ ଦେଇ ନିଜ ଗ୍ରାମ ସୋର ଆସୁଥିବାବେଳେ ତାଙ୍କ ମୋଟରସାଇକେଲ(ନଂ.ଓଡି ୦୧ଏଲ-୯୦୮୮)କୁ ଦୁର୍ବୃତ୍ତମାନେ ଲୁଟି ନେଇଥିଲେ। ଏନେଇ ସେ ଥାନାରେ ଅଭିଯୋଗ କରିବା ପରେ ଖନ୍ତାପଡା ଥାନାରେ ଏକ ମାମଲା (ନଂ.୩୧୦/୧୯) ରୁଜୁ ହୋଇଛି।