ରାୟଗଡା ଅଫିସ, ୩ା୬-କରୋନା ଲକ୍ ଡାଉନ ଯୋଗୁ ତେଲେଙ୍ଗନା ଓ ତାମିଲନାଡୁରେ ଅଟକି ଥିବା ଶ୍ରମିକ ରାୟଗଡା ଫେରିଛନ୍ତି। ମଙ୍ଗଳବାର ତାମିଳନାଡୁରୁ ୧୫୧ ଶ୍ରମିକ ଫେରିଥିବା ବେଳେ ବୁଧବାର ତେଲେଙ୍ଗନାରୁ ୨୩୬ ଶ୍ରମିକ ରାୟଗଡା ଫେରିଛନ୍ତି। ଏହି ୨ ଦିନରେ ଫେରିଥିବା ମୋଟ ୩୮୭ ଶ୍ରମିକଙ୍କୁ ସେମାନଙ୍କ ଅଞ୍ଚଳକୁ ପ୍ରଶାସନ ପଠାଇଛି। ତେଲେଙ୍ଗନାରେ ଅଟକି ଥିବା ୨୩୬ ଶ୍ରମିକ ଟ୍ରେନ ଯୋଗେ ବୁଧବାର ରାୟଗଡା ଫେରିଛନ୍ତି। ଏଥିରେ ଗଜପତି ଜିଲାର ୩ଜଣ ଓ ନବରଙ୍ଗପୁର ଜିଲାର ୨୩୩ ଶ୍ରମିକ ଅଛନ୍ତି। ଶ୍ରମିକ ଆସୁଥିବା ନେଇ ଖବର ପୂର୍ବରୁ ପ୍ରଶାସନ ନିକଟରେ ପହଞ୍ଚତ୍ଥିଲା। ସେହି ଅନୁସାରେ ଉପଜିଲ୍ଲାପାଳ ରାୟଗଡା ସହରର ଗଜପତି ଛକରୁ ସାଇ ଇଣ୍ଟର ନ୍ୟାଶନାଲ ଛକ ଏବଂ ଷ୍ଟେସନ ଅଞ୍ଚଳରେ ୧୪୪ଧାରା ଜାରି କରିଥିଲେ। ଆସିଥିବା ଶ୍ରମିକଙ୍କୁ ଅତିରିକ୍ତ ଜିଲାପାଳ ଶରତ ଚନ୍ଦ୍ର ପଣ୍ଡା, ପିଡି ଅମ୍ରିତ ଋତୁରାଜ, ଉପଜିଲାପାଳ ପ୍ରତାପ ଚନ୍ଦ୍ର ପ୍ରଧାନ, ଆଞ୍ଚଳିକ ପରିବହନ ଅଧିକାରୀ ଦିଲୀପ ଦଳାଇ, ଏସଡିପିଓ ତପନ ରଥ ,ପୌର ପରିଷଦ କର୍ମଚାରୀ ସ୍ବାଗତ କରିଥିଲେ। ରେଳ ଷ୍ଟେସନରେ ସେମାନଙ୍କ ପଞ୍ଜୀକରଣ କରି ହାତରେ ଷ୍ଟାମ୍ପ ମରାଯାଇଥିଲା। ପରେ ସମ୍ପୃକ୍ତ ଜିଲାର ଜିଲା ଅଧିକାରୀମାନଙ୍କୁ ହସ୍ତାନ୍ତର କରାଯାଇଥିଲା।
ସେହିପରି ତାମିଲନାଡ଼ୁର ତିରୁପୁରରୁ ମଙ୍ଗଳବାର ୧୫୧ ଜଣ ଶ୍ରମିକ ରାୟଗଡା ଫେରିଥିଲେ। ସେମାନଙ୍କ ମଧ୍ୟରେ ରାୟଗଡ଼ା ଜିଲାର ୪୪ଜଣ, ଗଜପତି ୧୮, କୋରାପୁଟ ୨, କନ୍ଧମାଳ ୫୮, ନବରଙ୍ଗପୁର ୨୮ ଏବଂ କଳାହାଣ୍ଡି ଜିଲାର ଜଣେ ଶ୍ରମିକ ଥିଲେ। ରାୟଗଡ଼ା ଜିଲାର ୪୪ ଶ୍ରମିକଙ୍କ ମଧ୍ୟରୁ ରାୟଗଡ଼ା ପୌରାଞ୍ଚଳର ୧୨ଜଣ ଥିବା ବେଳେ ବିଷମକଟକ ବ୍ଲକ୍ର ୩, ଚନ୍ଦ୍ରପୁରର ୪, ମୁନିଗୁଡ଼ାର ୪, ଗୁଣପୁରର ୧୩, କଲ୍ୟାଣସିଂପୁରର ଜଣେ ଏବଂ ପଦ୍ମପୁର ବ୍ଲକ୍ର ୭ ଜଣ ଥିଲେ।