ଚିତ୍ରଡା,୧୭ା୧(ଡ଼ି.ଏନ୍.ଏ.)- ମୟୂରଭଞ୍ଜ ଜିଲା ମୋରଡ଼ା ବ୍ଲକ ହଳଦୀପାଳ ପଞ୍ଚାୟତ ଅନ୍ତର୍ଗତ ସମାଇଡ଼ିହି ଗ୍ରାମ ଲୋଧା ସମ୍ପ୍ରଦାୟର ରାଧି ନାୟକଙ୍କ ଦୁଇ ଶିଶୁ କନ୍ୟାଙ୍କ ଚିକିତ୍ସାରେ ଅର୍ଥ ବାଧକ ସାଜିଛି। ସେମାନଙ୍କ ଶରୀରରେ ପ୍ରଥମେ ଛୋଟଛୋଟ ଘା’ ହୋଇଥିବା ବେଳେ ଏବେ ତାହା ବଢିବାରେ ଲାଗିଛି। ଅର୍ଥାଭାବ ଯୋଗୁ ସେମାନଙ୍କର ଉପଯୁକ୍ତ ଚିକିତ୍ସା ହୋଇ ପାରୁ ନ ଥିବା ବେଳେ ପ୍ରଶାସନ ସହାୟତା ଯୋଗାଇ ଦେବାକୁ ଦାବି ହେଉଛି।
ଗୁରୁବାର ମଧ୍ୟାହ୍ନରେ ରାଧି ନାୟକ ଏବଂ ତାଙ୍କ ଶାଶୁ ମଞ୍ଜୁ ନାୟକ ପିଲା ଦୁଇଟିଙ୍କୁ ଧରି ଚିତ୍ରଡାସ୍ଥିତ ଡାକ୍ତରଖାନାକୁ ଆସିଥିଲେ। କିନ୍ତୁ ବର୍ହି ବିଭାଗ ବନ୍ଦ ହୋଇଯାଇଥିବାରୁ ସେମାନେ ଘରକୁ ଫେରିଯିବା ପାଇଁ ବସିଥିଲେ। ପରେ ଜଣେ ସ୍ବାସ୍ଥ୍ୟ କର୍ମୀ ସେମାନଙ୍କୁ କିଷାନତାଣ୍ଡି ହସ୍ପିଟାଲକୁ ନେଇଯିବା ପାଇଁ ସହାୟତା ଯୋଗାଇ ଦେଇଥିଲେ। ସାଙ୍ଗରେ ଯାଇଥିବା ଆଶା କର୍ମୀଙ୍କ ସହ ସେମାନେ କିଷାନତାଣ୍ଡି ଡାକ୍ତରଖାନାକୁ ଯାଇଥିଲେ। ସେଠାରେ ଡାକ୍ତର ପରୀକ୍ଷା କରି ପିଲା ଦୁଇଟିଙ୍କୁ ଡାକ୍ତରଖାନାରେ ଭର୍ତ୍ତି କରିବା ପାଇଁ କହିଥିଲେ। ମାତ୍ର ପାଖରେ ଅର୍ଥ ନ ଥିବାରୁ ଶାଶୁ ବୋହୂ ସରକାରୀ ଔଷଧ ଧରି ଘରକୁ ଫେରି ଆସିଥିଲେ। ଲୋଧା ସମ୍ପ୍ରଦାୟର ଉନ୍ନତି ପାଇଁ ଲୋଧା ଉନ୍ନୟନ ସଂସ୍ଥା ଓ ଶିଶୁମାନଙ୍କ ସୁରକ୍ଷା ଲାଗି ଶିଶୁ ବିକାଶ ସଂସ୍ଥା ଥିବା ବେଳେ ଉକ୍ତ ପରିବାରକୁ ସହାୟତା ମିଳି ପାରି ନ ଥିବା ମଞ୍ଜୁ ନାୟକ ଅଭିଯୋଗ କରିଛନ୍ତି। ଏହି ପରିବାରକୁ ସହାୟତା ଯୋଗାଇ ଦେବା ପାଇଁ ଗ୍ରାମବାସୀ ଦାବି କରିଛନ୍ତି।