ବଡ଼ଗାଁ,୨୯।୮(ଡି.ଏନ୍.ଏ.) : ସୁନ୍ଦରଗଡ଼ ଜିଲା ବଡ଼ଗାଁ ବନଖଣ୍ଡ ଅଧୀନ ଜଙ୍ଗଲରେ ଥିବା ୧୬ଟି ହାତୀ ମଧ୍ୟରୁ ଗୋଠଛଡ଼ା ହୋଇଥିବା ଗୋଟିଏ ଦନ୍ତା ବିଭିନ୍ନ ସମୟରେ ଉପଦ୍ରବ କରୁଛି। ପଞ୍ଚରା ଫରେଷ୍ଟ ବିଟ୍ ଅଧୀନ କଟଙ୍ଗଝରିଆ ଅଞ୍ଚଳକୁ ଆସି ଆଜି ଘର ଭାଙ୍ଗି ଚାଉଳ ଖାଇବା ସହ ଫସଲ ନଷ୍ଟ କରୁଛି। ବୁଧବାର ରାତିରେ ଏକମା ଗୌଡ଼ପଡ଼ାରେ ପଶି ମାଧ ବାଗ୍ଙ୍କ ଘର ଭାଙ୍ଗିବା ପରେ ଏକମା ହାଇସ୍କୁଲ ପଟକୁ ଚାଲିଯାଇଥିଲା। ବାଳିକା ହଷ୍ଟେଲ ପାର୍ଶ୍ୱ ପାଚେରି ଭାଙ୍ଗି ଟିମନା ଗାଁ ପଟକୁ ଗଲାବେଳେ ଗେଡୁ ବାହାଲ ପ୍ରାଥମିକ ସ୍କୁଲ କୋଠରିର କବାଟ ଭାଙ୍ଗି ମଧ୍ୟାହ୍ନଭୋଜନ ଚାଉଳ ଖାଇଲା ପରେ କଟଙ୍ଗଝରିଆ ଜଙ୍ଗଲକୁ ଚାଲିଯାଇଥିଲା। କିଛିଦିନ ତଳେ ଏହି ଦନ୍ତା ଗରଗଡ଼ବାହାଲ, କୁସୁମଗେଡିର ପାହାଡ଼ଟୋଲିରେ ଘର ଭାଙ୍ଗିବା ସହ ଫସଲ ନଷ୍ଟ କରିଥିଲା।