ଢେଙ୍କାନାଳ ଅଫିସ, ୧୮ା୧ – ଢେଙ୍କାନାଳ ସଦର ରେଞ୍ଜ୍ ତାଳବରକୋଟ ଗ୍ରାମ ନିକଟ ଶାମୁକାତଇଲା ଶାଳ ଜଙ୍ଗଲରେ କାଠମାଫିଆ ସକ୍ରିୟ ହୋଇଉଠିଛନ୍ତି। ବନ ବିଭାଗ ସ୍ଥାଣୁ ପାଲଟିଥିବାବେଳେ ଏହାର ସୁଯୋଗରେ ଜଙ୍ଗଲରୁ ମୂଲ୍ୟବାନ କାଠ ଚାଲାଣ କରାଯାଉଛି। ଶୁକ୍ରବାର ଅପରାହ୍ନରେ ସ୍ଥାନୀୟ ଅଞ୍ଚଳବାସୀ ଆନୁମାନିକ ୨ଲକ୍ଷ ୫୦ ହଜାର ଟଙ୍କାର ଶାଳକାଠ ଜବତ କରି ବନ ବିଭାଗ ଜିମା ଦେଇଛନ୍ତି। ଶାଳ କାଠଗୁଡ଼ିକ ୫ଫୁଟରୁ ୯ଫୁଟ ଯାଏ ଗୋଲେଇ ବିଶିଷ୍ଟ। ୮୦ ଘନଫୁଟର ୨୦ଖଣ୍ଡ ଲଗ୍କୁ ଜବତ କରାଯାଇଛି।
ଗ୍ରାମବାସୀଙ୍କ କହିବା କଥା, ମାଫିଆମାନେ ଟ୍ରକ୍ ଯୋଗେ କାଠ ଚାଲାଣ କରୁଥିବା ସୂଚନା ପାଇ ବନ ବିଭାଗକୁ ଅବଗତ କରାଯାଇଥିଲା। ହେଲେ ଏହାକୁ କେହି ଗୁରୁତ୍ୱ ଦେଇ ନ ଥିଲେ। ଫଳରେ ସେମାନେ ବାଧ୍ୟ ହୋଇ ଘଟଣାସ୍ଥଳକୁ ଯାଇଥିଲେ। ଦୁର୍ବୃତ୍ତମାନେ ୮୦ଘନ ଫୁଟ କାଠ ଛାଡ଼ି ଟ୍ରକ୍ ଧରି ଜଙ୍ଗଲକୁ ପଳାଇଥିଲେ। ଏ ନେଇ ଫରେଷ୍ଟର ପ୍ରଫୁଲ୍ଲ ସେଠୀ କୁହନ୍ତି, ଜଙ୍ଗଲରେ କାଠ ପଡ଼ିଥିବା ସୂଚନା ପାଇ ଯାଇଥିଲୁ। କାଠ ଜବତ କରାଯାଇଛି। ଅଞ୍ଚଳରେ ହାତୀ ଉପଦ୍ରବ ବଢ଼ିଛି। ହାତୀଙ୍କୁ ଘଉଡ଼ାଇବାରେ କର୍ମଚାରୀଙ୍କୁ ନିୟୋଜିତ କରାଯାଇଛି। ଏହାର ସୁଯୋଗ ନେଇ କାଠ ମାଫିଆମାନେ ଜଙ୍ଗଲରୁ ଗଛ କାଟୁଛନ୍ତି। ପାଟ୍ରୋଲିଂ କରାଯାଉଛି। ଗତ ୧୧ ତାରିଖରେ ୩୪ ଘନଫୁଟ କାଠ ଜବତ କରାଯାଇଥିଲା। ୨ ମାସ ତଳେ ମଧ୍ୟ କାଠ ଜବତ ହୋଇଥିବା ଫରେଷ୍ଟର ସୂଚନା ଦେଇଛନ୍ତି।