ପାଟନା,୩।୪: କରୋନା ଭାଇରସ୍କୁ ବ୍ୟାପିବାରୁ ରୋକିବା ପାଇଁ ସାରା ଦେଶରେ ଲକ୍ଡାଉନ୍ ଜାରି କରାଯାଇଛି। ଏହି ସମୟରେ ସମସ୍ତ ରାଜ୍ୟରେ କାମଧନ୍ଦା ବନ୍ଦ ହୋଇଯିବାରୁ ଶ୍ରମିକ ଓ ଦିନ ମଜୁରିଆଙ୍କ ପାଇଁ ଏକପ୍ରକାର ସମସ୍ୟା ସୃଷ୍ଟି ହୋଇଛି। ଲୋକଙ୍କ ପାଖରେ ପଇସା ନ ଥିବାରୁ ସେମାନେ ନିଜ ଗାଁକୁ ଫେରିଯିବାକୁ ବାଧ୍ୟ ହେଉଛନ୍ତି। ଏଥିପାଇଁ ଲୋକମାନେ ସାଇକେଲ୍, ରିକ୍ସା କିମ୍ବା ଚାଲି ଚାଲି ନିଜ ଘରକୁ ଯାଉଥିବାର ଦୃଶ୍ୟ ନଜର ଆସିଛି। ଇତିମଧ୍ୟରେ ଜଣେ ଯୁବକ ୩ ଦିନରେ ପ୍ରାୟ ୪୦୦କିଲୋମିଟରରୁ ଊର୍ଦ୍ଧ୍ୱ ସାଇକଲେ ଚଳାଇ ଘରକୁ ପହଞ୍ଚିଥିବା ଜଣାପଡ଼ିଛି। ସୂଚନାଯୋଗ୍ୟ, ବିହାରର ଗୋପାଳଗଞ୍ଜରେ ରହୁଥିବା ରାଜକୁମାର ନାମକ ଜଣ ଯୁବକ ରାଞ୍ଚିରେ ଡ୍ରାଇଭର ଭାବେ କାର୍ଯ୍ୟ କରନ୍ତି। ଲକ୍ଡାଉନ୍ ଯୋଗୁ ତାଙ୍କ କାର୍ଯ୍ୟ ବନ୍ଦ ହୋଇଯାଇଥିଲା। ପାଖରେ ପଇସା ନ ଥିବାରୁ ଏହି ଘଡିସନ୍ଧି ମୁହୂର୍ତ୍ତରେ ନିଜ ଗାଁକୁ ଫେରିଯିବେ ବୋଲି ରାଜକୁମାର ଚିନ୍ତା କରିଥିଲେ। ଏହାପରେ ସେ ସାଇକେଲ୍ରେ ଗୋପାଳକୁଞ୍ଜ ଅଭିମୂଖେ ବାହାରି ଯାଇଥିଲେ। ରାସ୍ତାରେ ତାଙ୍କୁ ବହୁ ସମସ୍ୟାର ସମ୍ମୁଖୀନ ହେବାକୁ ପଡ଼ିଥିଲା। କିନ୍ତୁ ସେ ହାର ମାନି ନ ଥିଲେ। ଶେଷରେ ସବୁ ବାଧାବିଘ୍ନକୁ ପଛରେ ପକାଇ ପ୍ରାୟ ୪୦୦କିଲୋମିଟରରୁ ଊର୍ଦ୍ଧ୍ୱ ରାସ୍ତାକୁ ୩ ଦିନରେ ସେ ପୁରା କରିଥିଲେ ଏବଂ ସୁରକ୍ଷିତ ଭାବେ ଘରକୁ ପହଞ୍ଚିଥିଲେ। ତେବେ ବିଭିନ୍ନ ସ୍ଥାନରେ ପୋଲିସ ତାଙ୍କୁ ସହାୟତା କରିଥିଲା। ଖାଦ୍ୟପେୟ ଯୋଗାଇଦେବା ସହ ଗାଁକୁ ପହଞ୍ଚିବା ପାଇଁ ପୋଲିସ ତାଙ୍କୁ ଯଥାସମ୍ଭବ ସାହାଯ୍ୟ କରିଥିଲା ବୋଲି ରାଜକୁମାର କହିଛନ୍ତି।