ଢେଙ୍କାନାଳ ଅଫିସ, ୧୨।୮: ଢେଙ୍କାନାଳ ପୌରସଂସ୍ଥାର ଚରମ ଅବହେଳାରୁ ୩ନଂ. ଓ୍ବାର୍ଡ ଶ୍ରୀରାମ ନଗରବାସୀ ଯନ୍ତ୍ରଣା ଭୋଗୁଛନ୍ତି। ଅଞ୍ଚଳର ଡ୍ରେନେଜ୍ ବ୍ୟବସ୍ଥା ଭୁଶୁଡ଼ି ପଡ଼ିଛି। ରାସ୍ତାଘାଟ ଅବସ୍ଥା ଶୋଚନୀୟ ହୋଇପଡ଼ିଛି। ପୂତ୍ତିଗନ୍ଧମୟ ପରିବେଶ ସଂକ୍ରାମକ ରୋଗ ବଢ଼ାଉଛି। ବାରମ୍ବାର ଅଭିଯୋଗ ସତ୍ତ୍ୱେ ଏହାର ସମାଧାନ ଦିଗରେ କେହି ଧ୍ୟାନ ଦେଉନାହାନ୍ତି। ଏହାକୁ ନେଇ ଲାଗି ରହିଥିବା ପୁଞ୍ଜୀଭୂତ ଅସନ୍ତୋଷ ଉଗ୍ରରୂପ ନେଲାଣି। ଏହାର ସମାଧାନ ନ ହେଲେ ଆଗାମୀ ଦିନରେ ଜନଆକ୍ରୋଶ ବଢ଼ିବା ଆଶଙ୍କାକୁ ଏଡ଼ାଇ ଦିଆଯାଇ ନ ପାରେ।
ଦୀର୍ଘ ୭ବର୍ଷ ହେଲା ଅସଜଡ଼ା ପରିମଳ ବ୍ୟବସ୍ଥା ଲୋକଙ୍କ ଚିନ୍ତା ବଢ଼ାଇଛି। ଆଖପାଖ ଅଞ୍ଚଳର ଆବର୍ଜନା ପାଣି ଅଞ୍ଚଳ ଦେଇ ପ୍ରବାହିତ ହେଉଛି। ଫଳରେ ଡେଙ୍ଗୁ, ମ୍ୟାଲେରିଆ, ଚର୍ମରୋଗ ବ୍ୟାପିବାରେ ଲାଗିଛି। ବର୍ଷାପାଣି ରାସ୍ତା ଉପରେ ପ୍ରବାହିତ ହେଉଛି। ପାଣି ଜମି ରହୁଥିବାରୁ ଦୁର୍ଗନ୍ଧମୟ ପରିବେଶ ସୃଷ୍ଟି ହେଉଛି। ଘରେ ବିଷାକ୍ତ ଜନ୍ତୁ, କୀଟ ପଶୁଛନ୍ତି। ରାସ୍ତା ବିପଦସଙ୍କୁଳ ହୋଇପଡ଼ିଛି। ଗର୍ତ୍ତରେ ପଡ଼ି ଛାତ୍ରୀଛାତ୍ର, ଗୃହପାଳିତ ପ୍ରାଣୀ, ପଥଚାରୀ କ୍ଷତବିକ୍ଷତ ହେବା ନଜିର ରହିଛି। ଏହାର ପ୍ରତିକାର କରିବାକୁ ଓ୍ବାର୍ଡବାସୀ ଜିଲା ପ୍ରଶାସନ ଏବଂ ପୌର କର୍ତ୍ତୃପକ୍ଷଙ୍କୁ ଲିଖିତ ଭାବେ ଜଣାଇଥିଲେ। ହେଲେ କୌଣସି ପଦକ୍ଷେପ ଗ୍ରହଣ କରାଯାଇ ନ ଥିବା ରବିନାରାୟଣ ପାଣିଗ୍ରାହୀ, ଧର୍ମାନନ୍ଦ ସାମଲ, ପ୍ରସନ୍ନ କୁମାର ଜେନା, ନରେଶ ସାମଲ, ମନୋଜ ମଲ୍ଲିକ, ରତ୍ନାକର ପ୍ରଧାନ ପ୍ରମୁଖ ଅଭିଯୋଗ କରିଛନ୍ତି। ରାସ୍ତାଘାଟ ଏବଂ ଡ୍ରେନେଜ୍ ବ୍ୟବସ୍ଥା ନ ସଜାଡ଼ିଲେ ପ୍ରଶାସନକୁ ଅଚଳ କରି ଦିଆଯିବା ସହ ଆନ୍ଦୋଳନ ଜୋର୍ଦାର କରାଯିବ ବୋଲି ଅନିତା ପାଲ, ପ୍ରେମଲତା ପାଲ, ଝରଣା ପାଣିଗ୍ରାହୀ, ପ୍ରଦୀପ କୁମାର ପାଲ, ଅନ୍ନପୂର୍ଣ୍ଣା ମଲ୍ଲିକ, ସୂର୍ଯ୍ୟକାନ୍ତ ସାହୁ, ସ୍ବର୍ଣ୍ଣଲତା ସାହୁ, ନରେଶ ସାମଲ, ବବିତା ସାମଲ, ସରିତା ନାୟକ, ସୁଚିତ୍ର ସୁବୁଦ୍ଧି, କିଶୋରକାନ୍ତ ସୁବୁଦ୍ଧି, କେଦାରକାନ୍ତ ସୁବୁଦ୍ଧି, ଅନ୍ନପୂର୍ଣ୍ଣା ସ୍ବାଇଁ, ଅଶାନ୍ତି ସ୍ବାଇଁ ପ୍ରମୁଖ ଚେତାବନୀ ଦେଇଛନ୍ତି।
ଏ ନେଇ ନିର୍ବାହୀ ଅଧିକାରୀ ଅତନୁ କୁମାର ସାମନ୍ତ କୁହନ୍ତି, ଅଭିଯୋଗ ସମ୍ପର୍କରେ ସେ ଅବଗତ ଅଛନ୍ତି। ଜାଗା ଅଭାବରୁ ସମସ୍ୟା ସୃଷ୍ଟି ହୋଇଛି। ସୋମବାର ପୌର ଯନ୍ତ୍ରୀଙ୍କୁ ପଠାଯାଇ ତଦନ୍ତ କରାଯିବ ବୋଲି ସେ ସୂଚନା ଦେଇଛନ୍ତି।