ନୂଆଦିଲ୍ଲୀ,୨୧।୨: ୧୦ଟଙ୍କାର ପ୍ଲାଟଫର୍ମ ଟିକେଟକୁ ମାଗଣାରେ ନେବାକୁ ଚାହୁଁଛନ୍ତି। ଯଦି ହଁ ତେବେ ଆପଣଙ୍କୁ ଏଥିପାଇଁ କିଛି ସର୍ତ୍ତ ପୁରା କରିବାକୁ ପଡ଼ିବ। ଆଉ ଏହି ସର୍ତ୍ତ ମଧ୍ୟ ଶରୀର ପାଇଁ ଲାଭଦାୟକ। କଥାଟି ଟିକେ ଅଡ଼ୁଆ ଲାଗୁଛି ହେଲେ ସତ। ବ୍ୟସ୍ତ ହୁଅନ୍ତୁ ନାହିଁ, ଆଉ ବେଶୀ ସମୟ ସସ୍ପେନ୍ସ ଭିତରେ ନ ରଖି ଘଟଣାଟି କ’ଣ କହୁଛୁ। କଥାଟି ହେଲା, ଯଦି ପ୍ଲାଟଫର୍ମ ଟିକେଟ ମାଗଣାରେ ଦରକାର ତେବେ ଏଥିପାଇଁ ଆପଣଙ୍କୁ ୩୦ଥର ଦଣ୍ଡ ବୈଠକ କରିବାକୁ ପଡ଼ିବ। ଏହି ସୁବିଧା ଏବେ ଦିଲ୍ଲୀର ଆନନ୍ଦ ବିହାର ରେଲଓ୍ବେ ଷ୍ଟେଶନରେ ଆରମ୍ଭ ହୋଇଛି। ସୂଚନାଯୋଗ୍ୟ, ଆନନ୍ଦ ବିହାର ରେଲଓ୍ବେ ଷ୍ଟେଶନରେ ଏଭଳି ଏକ ମେସିନ୍ ଲାଗିଛି ଯାହାର ସାମ୍ନାରେ ୧୮୦ ସେକେଣ୍ଡରେ ୩୦ଥର ଦଣ୍ଡ ବୈଠକ ଲଗାଇଲେ ମାଗଣାରେ ପ୍ଲାଟଫର୍ମ ଟିକେଟ ମିଳିପାରିବ। ଶୁକ୍ରବାର ଏହି ମେସିନ୍ର ଉଦ୍ଘାଟନ କରାଯାଇଥିବା ବେଳେ ଏହା ଭାରତର ପ୍ରଥମ ଦଣ୍ଡ ବୈଠକ ମେସିନ। ଏହାକୁ ‘ଫିଟ୍ ଇଣ୍ଡିଆ ଦଣ୍ଡ ବୈଠକ ମେସିନ୍’ ନାମରେ ନାମିତ କରାଯାଇଛି। ଉକ୍ତ ମେସିନ୍ରେ ଲାଗିଥିବା ଡିସ୍ପ୍ଲେରେ ପଏଣ୍ଟ ଦେଖାଯିବ। ଗୋଟିଏ ବୈଠକ ପାଇଁ ୧ ପଏଣ୍ଟ ମିଳିବ। ସେହିପରି ଯଦି ଜଣେ ୩୦ପଏଣ୍ଟ କରିବେ ତେବେ ତାଙ୍କୁ ପ୍ଲାଟଫର୍ମ ଟିକେଟ ମିଳିପାରିବ।
