ସୁରଟ,୫ା୮: ପ୍ରବଳ ବର୍ଷା ଯୋଗୁ ତିନିଦିନ ହେଲା ଗୁଜରାଟର ନଭସାରୀ ଅଞ୍ଚଳରେ ଫସି ରହିଥିବା ୩୦ ଓଡ଼ିଆ ଶ୍ରମିକଙ୍କ ସମେତ ୩୨ ଜଣଙ୍କୁ ସ୍ଥାନୀୟ ପ୍ରଶାସନ ରବିବାର ଉଦ୍ଧାର କରିଛି। ଏହି ଲୋକମାନେ ଜଳବନ୍ଦୀ ମେନ୍ଧର ଗ୍ରାମରେ ଅଟକି ରହିଥିବା ନଭସାରୀ ଜିଲା ପ୍ରଶାସନ ଜାଣିବା ପରେ ସେମାନଙ୍କ ଉଦ୍ଧାର ଲାଗି ତୁରନ୍ତ ପଦକ୍ଷେପ ନେଇଥିଲା। ଉଦ୍ଧାର କାର୍ଯ୍ୟରେ ବାୟୁସେନାର ଦୁଇଟି ହେଲିକପ୍ଟରକୁ ନିୟୋଜିତ କରାଯାଇଥିଲା। ଉଦ୍ଧାର ହୋଇଥିବା ଓଡ଼ିଆ ଶ୍ରମିକଙ୍କୁ ସୁରଟ ବିମାନ ବନ୍ଦରକୁ ନିଆଯାଇଛି।
ବୁଧବାରଠାରୁ ପ୍ରବଳ ବର୍ଷା ଲାଗି ରହିବା ଫଳରେ ଗୁଜରାଟର ବିଭିନ୍ନ ଜିଲାରେ ବନ୍ୟା ଭଳି ସ୍ଥିତି ସୃଷ୍ଟି ହୋଇଛି। ଜଳାଶୟ ବୁଡିଯିବାରୁ କୁମ୍ଭୀର ରାସ୍ତାକୁ ଉଠିଆସିଛନ୍ତି। ଜଙ୍ଗଲ ବିଭାଗର କର୍ମଚାରୀ ରାସ୍ତାରୁ ଏକ କୁମ୍ଭୀରକୁ ଉଦ୍ଧାର କରିବାର ଫଟୋ ଭାଇରାଲ ହୋଇଛି। ବର୍ଷା କମିବା ପରେ ରାସ୍ତାରୁ ପାଣି ଛାଡ଼ିବା ଆରମ୍ଭ ହୋଇଛି।
