ମୁମ୍ବାଇ: ନିକଟରେ ରିଲିଜ ହୋଇଥିବା ଫିଲ୍ମ ‘ମଲଙ୍ଗ’ରେ ଦିଶା ପଟାନୀ ଏବଂ ଆଦିତ୍ୟ ରାୟ କପୁର ଆଖି ଲାଖି ଗଲା ପରି ଶଟ୍ ଦେଇଛନ୍ତି। କିନ୍ତୁ ଏସବୁ ଶଟ୍ ଦେବା ପାଇଁ ଦୁଇଜଣଙ୍କୁ କମ୍ କଷ୍ଟ କରିବାକୁ ପଡ଼ିନି। ଏ ସମ୍ପର୍କରେ ଖୋଦ୍ ଦିଶା ଏକ ସାକ୍ଷାତ୍କାରରେ କହିଛନ୍ତି।
ଦିଶା କୁହନ୍ତି, ଆଦିତ୍ୟଙ୍କ ସହ ସେ ବହୁତ ସିନ୍ କରିଛନ୍ତି। ମାତ୍ର ସବୁଠୁ କଷ୍ଟ ଥିଲା ଅଣ୍ଡରଓ୍ବାଟର ଗୀତର ଶୁଟିଂ। ଖାସ୍ ଏଥିପାଇଁ ୧୨ ଘଣ୍ଟା ପର୍ଯ୍ୟନ୍ତ ୩୦ ଫୁଟ ଗଭୀର ପାଣିରେ ତାଙ୍କୁ ରହିବାକୁ ପଡ଼ିଥିଲା। ପାଣି ବାରମ୍ବାର ଉଠିଆସି କାନରେ ପଶି ଯାଉଥାଏ। ପାଣିର ସ୍ରୋତ ମଧ୍ୟ ଖୁବ୍ ତୀବ୍ର ଥିଲା। ସନ୍ଧ୍ୟା ୭ଟାରୁ ସକାଳ ୭ଟା ପର୍ଯ୍ୟନ୍ତ ଏହି ସିନ୍ର ଶୁଟିଂ କରାଯାଇଥିଲା। ଯଦିଓ ଅକ୍ସିଜେନ୍ ସିଲିଣ୍ଡର ଲଗାଯାଇଥିଲା। କାନକୁ ମଧ୍ୟ ରବର କଭରରେ ଘୋଡ଼ାଇ ରଖିଥିଲେ। ତଥାପି ଭୟ ଲାଗୁଥିଲା। ଏମିତିରେ ମୋତେ ପାଣିକୁ ବହୁ ଡର ଲାଗେ। କାରଣ ପିଲାଦିନେ ପାଣିରେ ବୁଡ଼ି ଯାଇଥିଲି। ତେଣୁ ଏହି ଶଟ୍ ଦେବାକୁ ମନ ଭିତରେ ଅନେକ ଭୟ ରହିଥିଲା। ସେ ଯାହା ବି ହେଉ ଦର୍ଶକଙ୍କ ମନୋରଞ୍ଜନ ପାଇଁ ଆମେ ରିସ୍କ ନେଇ ଏପରି ଶଟ୍ ଦେଲୁ। ଶଟ୍ଟି ଓକେ ମଧ୍ୟ ହୋଇଥିଲା। ଫିଲ୍ମ ରିଲିଜ ପରେ ସେସବୁ କଷ୍ଟ ଭୁଲିଯାଇଛୁ ବୋଲି ସେ କହିଛନ୍ତି।