ନୀଳଗିରି, ୫।୮(ଡି.ଏନ.ଏ.)-କଟକ କେନ୍ଦ୍ରାଞ୍ଚଳ ଅବକାରୀ ଗୋଇନ୍ଦା ବିଭାଗ ତଥା ନୀଳଗିରି ଅବକାରୀ ବିଭାଗ ପକ୍ଷରୁ ସ୍ଥାନୀୟ ସହରର ଘାଟଘରସାହି ଗାଁର ମୁନା ନାଥ(୩୨)ଙ୍କ ଘରେ ଚଢ଼ାଉ କରାଯାଇ ୩୨ଗ୍ରାମ ଓଜନର ବ୍ରାଉନ୍ସୁଗାର ଜବତ କରାଯାଇଛି। ଯାହାର ଆନୁମାନିକ ମୂଲ୍ୟ ୩ଲକ୍ଷରୁ ଊର୍ଦ୍ଧ୍ୱ ହେବ। ମୁନା ନାଥଙ୍କୁ ଗିରଫ କରାଯାଇଛି। ଏନେଇ ବିଭାଗରେ ପିଆର (ନଂ. ୮୬/୧୯)ରୁଜୁ ହୋଇଛି।
ନୀଳଗିରି ସହରରେ ଚୋରା ଦେଶୀ, ବିଦେଶୀ ମଦ ସହିତ ଅବାଧରେ ବ୍ରାଉନସୁଗାର ବିକ୍ରି ହେଉଥିବା ନେଇ ଅବକାରୀ ଗୋଇନ୍ଦା ବିଭାଗରେ ଅଭିଯୋଗ ହୋଇଥିଲା। ଗୋଇନ୍ଦା ବିଭାଗ ଏନେଇ ଚୋରା ବେପାରୀଙ୍କ ଉପରେ କଡ଼ା ନଜର ରଖି ସୁରାକ ପାଇଥିଲା। କେନ୍ଦ୍ରୀୟ ଅବକାରୀ ଗୋଇନ୍ଦା ବିଭାଗ ଏସ୍ପିଙ୍କ ନିର୍ଦ୍ଦେଶରେ ଗାଲୁରାମ ସରେନ, ସ୍ଥାନୀୟ ଉପନୀରିକ୍ଷକ ଲକ୍ଷେସାଧବ ପ୍ରଧାନଙ୍କ ସମେତ ଅବକାରୀ ଟିମ୍ ଚଢାଉ କରିଥିଲେ।
