ପୁରୀ ଅଫିସ,୧୯।୬: କରୋନା ପାଇଁ ଚଳିତବର୍ଷ ମହାପ୍ରଭୁ ଶ୍ରୀ ଜଗନ୍ନାଥଙ୍କ ଘୋଷଯାତ୍ରା ହେବ ନାହିଁ। ମହାମାରୀର ପ୍ରକୋପକୁ ଦୃଷ୍ଟିରେ ରଖି ସୁପ୍ରିମକୋର୍ଟ ଏଭଳି ନିଷ୍ପତ୍ତି ନେଇଛନ୍ତି। ଦୀର୍ଘ ୩୨୮ବର୍ଷ ପରେ ଇତିହାସର ପୁନରାବୃତ୍ତି ଘଟିବାକୁ ଯାଉଛି। ୧୬୯୨ରେ ଶ୍ରୀମନ୍ଦିର ଉପରେ ଏକ୍ରାମ୍ ଖଁା ଆକ୍ରମଣ କରିଥିଲେ। ହଠାତ୍ ଆକ୍ରମଣ ହୋଇଥିବାରୁ ମହାପ୍ରଭୁଙ୍କୁ ଶ୍ରୀମନ୍ଦିର ବେଢାରେ ଥିବା ମା’ ବିମଳାଙ୍କ ମନ୍ଦିର ପଛପଟକୁ ସ୍ଥାନାନ୍ତର କରାଯାଇଥିଲା। ପରେ ଶ୍ରୀଜୀଉଙ୍କୁ ବ୍ରହ୍ମଗିରିର କୋକଲଗଡ଼ସ୍ଥିତ ଭଗବତୀଙ୍କ ମନ୍ଦିରକୁ ନିଆଯାଇଥିଲା। ଆକ୍ରମଣ ପରେ ଦିଅଁ ଫେରିଥିଲେ ଶ୍ରୀମନ୍ଦିରକୁ। ଆରମ୍ଭ ହୋଇଥିଲା ଉପାସନା। ମନ୍ଦିରର ଚାରି ଦୁଆର ବନ୍ଦ କରାଯାଇ ଅଳ୍ପ କେତେକ ପାଳିଆ ସେବକ ଦକ୍ଷିଣ ଦ୍ୱାରର ଗୁପ୍ତ କବାଟ ଦେଇ ଭିତରକୁ ଯାଇ ନୀତିକାନ୍ତି କରିଥିଲେ। ଏହାର କିଛି ଦିନ ପରେ ମନ୍ଦିର ପରିସରରେ ରଥଯାତ୍ରା କରାଯାଇଥିଲା। ହେଲେ ସେଠି ନ ଥିଲେ ଭକ୍ତ। ଦୀର୍ଘବର୍ଷ ପରେ କରୋନା ମହାମାରୀ ସମାନ ଅବସ୍ଥା ସୃଷ୍ଟି କରିଛି। ସଂକ୍ରମଣର ଭୟାବହତାକୁ ଦୃଷ୍ଟିରେ ରଖି ସର୍ବୋଚ୍ଚ ନ୍ୟାୟାଳୟ ଏଭଳି ନିଷ୍ପତ୍ତି ନେଇଛନ୍ତି। ଏହାକୁ ନେଇ ସେବାୟତ, ଭକ୍ତଙ୍କ ମଧ୍ୟରେ ସୃଷ୍ଟି ହୋଇଛି ନୈରାଶ୍ୟଭାବ। ପୁରୀର ବିଭିନ୍ନ ସଂଗଠନ ପକ୍ଷରୁ ସର୍ବୋଚ୍ଚ ଅଦାଲତ ନିଷ୍ପତ୍ତି ପରିବର୍ତ୍ତନ କରିବାକୁ ଦାବି ହୋଇଛି।
ଅପରପକ୍ଷରେ ଇତିହାସକୁ ଅବଲୋକନ କଲେ ମହାପ୍ରଭୁଙ୍କ ରଥଯାତ୍ରା କିଛି ନୂଆ କଥା ନୁହେଁ । ବିଭିନ୍ନ କାରଣରୁ ବର୍ଷ ବର୍ଷ ଧରି ଶ୍ରୀଜୀଉଙ୍କ ଏହି ମାନବୀୟ ଲୀଳା ଅନୁଷ୍ଠିତ ହୋଇପାରି ନାହିଁ । ଏ ସମ୍ପର୍କରେ ଐତିହ୍ୟ ବିଶାରଦ ଡ. ସୁରେନ୍ଦ୍ର କୁମାର ମିଶ୍ର କୁହନ୍ତି, ଶ୍ରୀମନ୍ଦିର ଉପରେ ୧୮ଥର ଆକ୍ରମଣ ହୋଇଥିଲା। ଇତିହାସରୁ ଜଣାପଡ଼େ ଲୁଣ୍ଠନ ଆଶାରେ ଯବନ ଓ ବିଧର୍ମୀଙ୍କ ଆକ୍ରମଣ ଯୋଗୁ ୨୨ଥର ମହାପ୍ରଭୁଙ୍କୁ ସ୍ଥାନାନ୍ତର ହେବାକୁ ପଡ଼ିଥିଲା। ଶ୍ରୀକ୍ଷେତ୍ର ଛାଡ଼ି ୧୬୪ ବର୍ଷ ୪ମାସ ବାହାରେ ରହିଥିଲେ ଦାରୁଦିଅଁ। ଏହି ସମୟ ମଧ୍ୟରେ ମାତ୍ର ୮ଥର ଶ୍ରୀକ୍ଷେତ୍ର ବାହାରେ ଏବଂ ଥରେ ଶ୍ରୀମନ୍ଦିର ଭିତରେ ହିଁ ରଥଯାତ୍ରା ସମ୍ଭବ ହୋଇପାରିଥିଲା। ଅର୍ଥାତ ମହାପ୍ରଭୁଙ୍କ ରଥଯାତ୍ରା ୧୫୫ବର୍ଷ କାଳ ବନ୍ଦ ହୋଇଯାଇଥିଲା।