ପର୍ଲା,୨୮।୪(ଡି.ଏଡ଼.ଏ.): କଳାହାଣ୍ଡି ଜିଲା ସଦର ବ୍ଲକ ତଥା ଶଗଡା ସଂରକ୍ଷିତ ଜଙ୍ଗଲ ଜମିରେ ଘରଦ୍ୱାର କରି ରହି ଆସୁଥିବା ୩୩ ଆଦିବାସୀ ପରିବାରକୁ ବନ ବିଭାଗ ଉଚ୍ଛେଦ କରିଛି। ଯୁଗସାଇପାଟଣା ପଞ୍ଚାୟତ, ନେହେଲା ଓ ଶଗଡା ପଞ୍ଚାୟତର ମାଖାଗୁଡା ଗ୍ରାମର ଏହି ପରିବାର ଅମାବଲସା ବିଟ୍ ଓ ରାକେଶଦୁଣ୍ଡା ଜଙ୍ଗଲର ଅଲମାଠାରେ ରହି ଆସୁଛନ୍ତି। ହେଲେ ଶୁକ୍ରବାର ପୋଲିସ ଫୋର୍ସ ଓ ସଦର ଉପଜିଲାପାଳଙ୍କ ଉପସ୍ଥିତିରେ ସେମାନଙ୍କ ଘର ଭାଙ୍ଗି ଜବରଦଖଲ ଉଚ୍ଛେଦ କରାଯାଇଛି। ଏଣୁ ଏମାନେ ଏବେ ନିକଟସ୍ଥ ଲବଣିସରଠାରେ ଗଛ ମୂଳରେ ଆଶ୍ରୟ ନେଇଛନ୍ତି। ଦିନବେଳେ ପ୍ରଚଣ୍ଡ ଖରାରେ ଏମାନେ ଝାଳନାଳ ହୋଇ ଶିଝୁଛନ୍ତି। ସନ୍ଧ୍ୟାରେ କାଳବୈଶାଖୀରେ ଭୟଭୀତ ହୋଇ ରହୁଛନ୍ତି। ଏଭଳି ପରିସ୍ଥିତିରେ ଏମାନଙ୍କୁ ଜିଲା ପ୍ରସାଶନ ପକ୍ଷରୁ ଥଇଥାନ କରାଯିବା ପରିବର୍ତ୍ତେ ଉଚ୍ଛେଦ ଘଟଣାକୁ ବିଭିନ୍ନ ମହଲରେ ଦୃଢ ନିନ୍ଦା କରାଯାଉଛି। ଜଙ୍ଗଲ ଜମି ପଟ୍ଟା ପାଇଁ ଏମାନେ ବାରମ୍ବାର ଜିଲା ପ୍ରଶାସନକୁ ଲିଖିତ ଭାବରେ ଜଣାଇ ଆସିଛନ୍ତି। ହେଲେ କୌଣସି ଲାଭ ହେଉନି। ତେବେ ଏ ନେଇ ଧର୍ମଗଡ ଉପଜିଲାପାଳଙ୍କୁ ଏକ ଦାବିପତ୍ର ପ୍ରଦାନ କରାଯାଇଛି। ଯଥାଶୀଘ୍ର ଏମାନଙ୍କ ଥଇଥାନର ବ୍ୟବସ୍ଥା ସହ ଖାଦ୍ୟପେୟ ଯୋଗାଇ ଦେବାକୁ ଦାବି କରାଯାଇଛି। ସେହିଭଳି ଯେଉଁମାନେ ଏଭଳି ଦୁଃସମୟରେ ସେମାନଙ୍କୁ ଉଚ୍ଛଦ କରିଛନ୍ତି ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଉ ବୋଲି ଆଇନଜୀବୀ ଦିଗାମ୍ବର ଦୁରିଆ, ଚକ୍ରଧର ବେନୁପାଣି, ଧୀମାନ ଢଗ ନାଏକ ଓ ୟୁଗେଶ ତାଣ୍ଡି ଦାବି କରିଛନ୍ତି।