ଲାଗୋସ୍: ଦକ୍ଷିଣ ପଶ୍ଚିମ ନାଇଜେରିଆର ସବୁଠାରୁ ବୟସ୍କ କଇଁଛ କୁହାଯାଉଥିବା ‘ଆଲାଗ୍ବା’ ଆଉ ଦର୍ଶକଙ୍କ ମନୋରଞ୍ଜନ କରିପାରିବ ନାହିଁ। ଓଗ୍ବୋମୋସ୍ ରାଜପ୍ରାସାଦରେ ରହୁଥିବା ଏହି ପୋଷା କଇଁଛ ୩୪୪ ବର୍ଷ ବଞ୍ଚିଥିବା କୁହାଯାଉଛି। ହେଲେ ଗୋଟିଏ କଇଁଛର ଏତେ ବର୍ଷ ବଞ୍ଚତ୍ବାକୁ ନେଇ ସନ୍ଦେହ ବ୍ୟକ୍ତ କରିଛନ୍ତି ପ୍ରାଣୀ ବିଶେଷଜ୍ଞ। ସେ ଯାହା ହେଉ ନା କାହିଁକି, ‘ଆଲାଗ୍ବା’ର ମୃତ୍ୟୁକୁ ନେଇ ମର୍ମାହତ ହୋଇପଡ଼ିଛନ୍ତି ରାଜ ପରିବାରର ଦାୟାଦ।
‘ଆଲାଗ୍ବା’ର ଅର୍ଥ ବୟସ୍କ। ଏହି ମାଈ କଇଁଛ ଓବଗୋମୋସୋ ରାଜପ୍ରାସାଦର ଶାସକ ଜିମୋହୋ ଓଏବୁମିଙ୍କ ପାଖରେ ରହି ଆସୁଥିଲା। ରାଜାଙ୍କ ବ୍ୟକ୍ତିଗତ ସହଯୋଗୀ ଟୟାନ ଅଜାମୁଙ୍କ କହିବା କଥା, ବୟସାଧିକ୍ୟ କାରଣରୁ କଇଁଛଟି ହଠାତ୍ ଅସୁସ୍ଥ ହୋଇପଡ଼ିଥିଲା। ଏହାପରେ ତାହାର ମୃତ୍ୟୁ ଘଟିଛି। ‘ଆଲାଗ୍ବା’କୁ ରାଜବଂଶର ୩ୟ ଶାସକ ଇଶାନ ଓକୁମାୟଡ଼େ ପ୍ରାସାଦକୁ ଆଣିଥିଲେ। ଏହି ମାଈ କଇଁଛର ଯତ୍ନ ନେବାକୁ ୨ଜଣ କର୍ମଚାରୀ ଦିନରାତି ପରିଶ୍ରମ କରୁଥିଲେ। ଦୀର୍ଘଦିନ ଧରି ରାଜମହଲରେ ରହିବା ପରେ ଆଲ୍ଗାବା ରାଜପରିବାରର ସଦସ୍ୟ ପାଲଟି ଯାଇଥିଲା। ଏହାର ନିକଟରେ ଦୁରାରୋଗ୍ୟକୁ ଭଲ କରିବାର ଶକ୍ତି ରହିଥିବା ବିଶ୍ୱାସ କରାଯାଉଥିଲା। ତେଣୁ ବହୁ ବ୍ୟକ୍ତି କଇଁଛ ସଂସ୍ପର୍ଶରେ ଆସିବାକୁ ପସନ୍ଦ କରୁଥିଲେ। ଏହାର ମୃତ ଶରୀରର ଅବଶେଷକୁ ସଂରକ୍ଷିତ କରି ରଖାଯିବ ବୋଲି ରାଜ ପରିବାର ପକ୍ଷରୁ ସୂଚନା ଦିଆଯାଇଛି।