ଢେଙ୍କାନାଳ ଅଫିସ, ୨୩।୪: ଢେଙ୍କାନାଳ ଜିଲା ଅବକାରୀ ମୋବାଇଲ ସ୍କ୍ବାଡ୍ ପକ୍ଷରୁ ବୁଧବାର ଭୋର ସମୟରେ ସଦର ଥାନା ବେଲଟିକିରି, କାଙ୍କଡ଼ପାଳ ଏବଂ ସିମିଳିଆ ଅଞ୍ଚଳରେ ଚଢ଼ାଉ କରାଯାଇ ୩୬୦ ଲିଟର ଦେଶୀ ମଦ ଜବତ କରାଯାଇଛି। ଏହି ଘଟଣାରେ ୪ଜଣଙ୍କୁ ଗିରଫ କରାଯାଇଛି। ଲକ୍ଡାଉନ ସୁଯୋଗରେ ଜିଲାରେ ବ୍ୟାପକ ଚୋରା ମଦ କାରବାର ଚାଲିଥିବା ସୂଚନା ପାଇ ଇନ୍ସପେକ୍ଟର ସୁଶ୍ରୀ ସଙ୍ଗୀତା ମହାନ୍ତି, ସମୀର କୁମାର ମହାନ୍ତି, ଏସ୍ଆଇ ଭକ୍ତବତ୍ସଳ ବର୍ମା, କର୍ମଚାରୀ ସନ୍ତୋଷ ସ୍ବାଇଁ ପ୍ରମୁଖ ଚଢ଼ାଉ କରିଥିଲେ। ବେଲଟିକିରି କଲେଜ ସମ୍ମୁଖ ରାସ୍ତାରେ ଦ୍ରୁତ ଗତିରେ ଯାଉଥିବା କାର୍ (ନଂ. ଓଡି୦୬ଏଫ୍- ୬୩୧୫)ରେ ଚାଲାଣ ହେଉଥିବା ୩୦୦ ଲିଟର ଦେଶୀ ମଦ ଜବତ କରାଯାଇଛି। ଏହି ଘଟଣାରେ ଗୋରଡାପାଳ ଗ୍ରାମର ପ୍ରକାଶ ଦେହୁରୀ, ଟୁକୁନା ବେହେରାଙ୍କୁ ଗିରଫ କରାଯାଇଛି। ସେମାନଙ୍କ ନିକଟରୁ ନଗଦ ୫୦ହଜାର ଟଙ୍କା ଜବତ କରାଯାଇଛି। କାର ଚାଳକ ଜିତେନ୍ଦ୍ର ମଲ୍ଲିକ ଖସି ପଳାଇଛନ୍ତି। ସେହିପରି କାଙ୍କଡପାଳ ଛକରୁ ବିଭୁନା ଦେହୁରୀଙ୍କଠାରୁ ୨୦ଲିଟର ମଦ ଜବତ ହୋଇଛି। ସିମିଳିଆ ଅଞ୍ଚଳରୁ ସ୍କୁଟି (ନଂ. ଓଆର ୦୨ ଏପି ୮୫୦୬) ସହ ୪୦ ଲିଟର ମଦ ଜବତ କରାଯାଇଛି। ଏଥିରେ ସମ୍ପୃକ୍ତ ନକୁଳ ଦେହୁରୀ(୩୮)ଙ୍କୁ ଗିରଫ କରାଯାଇଛି। ଦେଶୀ ମଦ କଟକ ଜିଲା ଆଠଗଡ଼ ଥାନା ଏବଂ ଢେଙ୍କାନାଳ ଜିଲା ସୀମାନ୍ତ କୋରଙ୍ଗା ଅଞ୍ଚଳରୁ ଅଣାଯାଇଥିବା ଅବକାରୀ ବିଭାଗ ପକ୍ଷରୁ ସନ୍ଦେହ କରାଯାଉଥିବା ସୂଚନା ଦିଆଯାଇଛି।