ନୂଆଦିଲ୍ଲୀ,୨୯।୫: ରେଲଓ୍ବେ ବୋର୍ଡର ଅଧ୍ୟକ୍ଷ ବିନୋଦ କୁମାର ଯାଦବ ଶୁକ୍ରବାର ସୂଚନା ଦେଇଛନ୍ତି, ଗତ ପ୍ରାୟ ୧ ସପ୍ତାହ ହେବ ପ୍ରତିଦିନ ପାଖାପାଖି ୩ ଲକ୍ଷ ପ୍ରବାସୀ ଶ୍ରମିକଙ୍କୁ ସେମାନଙ୍କ ଗନ୍ତବ୍ୟ ସ୍ଥଳରେ ପହଞ୍ଚାଇଛି ‘ଶ୍ରମିକ ସ୍ପେଶାଲ’ ଟ୍ରେନ୍। ଏହା ବ୍ୟତୀତ ମେ’ ୨୮ ପର୍ଯ୍ୟନ୍ତ ପାଖାପାଖି ୩,୮୪୦ ଶ୍ରମିକ ସ୍ପେଶାଲ ଟ୍ରେନ୍ରେ ୫୨ ଲକ୍ଷରୁ ଊର୍ଦ୍ଧ୍ୱ ପ୍ରବାସୀ ସେମାନଙ୍କ ରାଜ୍ୟକୁ ଫେରି ସାରିଛନ୍ତି। ତେବେ ରାଜ୍ୟ ସରକାର ଯେତିକି ଟ୍ରେନ୍ ମାଗିଥିଲେ ଆମେ ସେହି ଅନୁଯାୟୀ ସ୍ପେଶାଲ ଟ୍ରେନ୍ ଯୋଗାଇ ଦେଇଛୁ ବୋଲି ବିନୋଦ କୁମାର ସୂଚନା ଦେଇଛନ୍ତି। ୩,୮୪୦ ଟ୍ରେନ୍ ମଧ୍ୟରୁ କେବଳ ୪ଟି ଟ୍ରେନ୍ ନିଜ ଗନ୍ତବ୍ୟ ସ୍ଥଳରେ ପହଞ୍ଚିବାକୁ ୭୨ ଘଣ୍ଟାରୁ ଅଧିକ ସମୟ ନେଇଥିବା ବେଳେ ପ୍ରାୟ ୯୦ ପ୍ରତିଶତ ଟ୍ରେନ୍ ନିର୍ଦ୍ଧାରିତ ସମୟରେ ନିଜ ନିଜ ସ୍ଥାନରେ ପହଞ୍ଚିଥିଲେ। କୋଭିଡ-୧୯ କାରଣରୁ ବହୁ ଅସୁବିଧାର ସମ୍ମୁଖୀନ କରିବାକୁ ପଡୁଛି। ତେବେ ରେଲଓ୍ବେ ପକ୍ଷରୁ ସବୁ ସମସ୍ୟାର ସମାଧାନ କରିବାକୁ ଚେଷ୍ଟା କରାଯାଉଛି। ସମସ୍ତ ଯାତ୍ରୀଙ୍କୁ ଖାଦ୍ୟ ଓ ପାନୀୟ ଯୋଗାଇ ଦେବାକୁ ମଧ୍ୟ ବ୍ୟବସ୍ଥା କରାଯାଉଛି। ଯଦି ନିହାତି ଆବଶ୍ୟକ ନାହିଁ ତେବେ ଜଟିଳ ରୋଗରେ ପୀଡ଼ିତ ବ୍ୟକ୍ତି, ଗର୍ଭବତୀ, ୧୦ ବର୍ଷରୁ କମ୍ ବୟସର ଶିଶୁ ଓ ୬୫ ବର୍ଷରୁ ଅଧିକ ବୟସର ବ୍ୟକ୍ତି ଟ୍ରେନ୍ରେ ଯାତ୍ରା କରନ୍ତୁ ନାହିଁ। ଷ୍ଟେଶନମାନଙ୍କରେ ପ୍ରବାସୀଙ୍କୁ ରାଜ୍ୟ ସରକାରଙ୍କ ପକ୍ଷରୁ ଖାଦ୍ୟ ଯୋଗାଇ ଦିଆଯାଉଥିବା ବେଳେ ଟ୍ରେନ୍ରେ ରେଲଓ୍ବେ ପକ୍ଷରୁ ଖାଦ୍ୟ ଓ ପାନୀୟ ଯୋଗାଇ ଦେବାର ବ୍ୟବସ୍ଥା କରାଯାଇଛି। ଯେପର୍ଯ୍ୟନ୍ତ ପ୍ରବାସୀମାନେ ସେମାନଙ୍କ ଘରେ ପହଞ୍ଜି ସାରି ନାହାନ୍ତି ସେପର୍ଯ୍ୟନ୍ତ ‘ଶ୍ରମିକ ସ୍ପେଶାଲ’ ଟ୍ରେନ୍ ଚଳାଚଳ କରିବ ବୋଲି ବିନୋଦ କୁମାର କହିଛନ୍ତି।