କଟକ ଅଫିସ, ୮।୯: ନୁଆ ମୋଟର ଯାନ ଆଇନ ଲାଗୁ ହେବାପରେ ରାଜ୍ୟରେ ଟ୍ରାଫିକ ନିୟମ କଡାକଡି ଭାବେ ପାଳନ କରାଯାଉଛି। ମୁଖ୍ୟତଃ ମଦ ପିଇ ଗାଡି ଚଳାଉଥିବା ବ୍ୟକ୍ତିଙ୍କ ପ୍ରତି କଠୋର ଆଭିମୁଖ୍ୟ ଆପଣାଇଛି ପୋଲିସ। ମଦ୍ୟପାନ କରି ଗାଡି ଚଳାଉଥିବା ଚାଳକଙ୍କୁ ଗିରଫ କରିବାକୁ ଡିଜିପି ବିଜୟ କୁମାର ଶର୍ମା କଡା ନିର୍ଦ୍ଦେଶ ଦେଇଛନ୍ତି। ଗତ ୬ ତାରିଖରେ ରାଜ୍ୟର ସମସ୍ତ ଜାତୀୟ ରାଜପଥ ଓ ରାଜ୍ୟ ରାଜପଥର ୧୪ଟି ଟୋଲ୍ଗେଟ୍ରେ ପୋଲିସ ପକ୍ଷରୁ ଚେକିଂ କରାଯାଇଥିଲା। ଏହି ଚେକିଂରେ ୩୮ ଜଣ ନିଶାସକ୍ତ ଗାଡି ଚାଳକଙ୍କୁ ଗିରଫ କରାଯାଇଥିବା ପୋଲିସ ପକ୍ଷରୁ ସୂଚନା ଦିଆଯାଇଛି। ମିଳିଥିବା ସୂଚନା ଅନୁଯାୟୀ, ଗିରଫ ୩୮ଜଣଙ୍କ ମଧ୍ୟରେ ସୁନ୍ଦରଗଡ ଜିଲା ବରପାଲି ଟୋଲଗେଟ୍ରେ ୧୦ଜଣ, ମାଶୁନିକାଣୀ ଟୋଲଗେଟ୍ ନିକଟରେ ଜଣେ, ସମ୍ବଲପୁର ଜିଲାର ଶାସନ ଟୋଲଗେଟ୍ ନିକଟରେ ୩, କେନ୍ଦୁଝର ଜିଲାର ରାମଚନ୍ଦ୍ରପୁର ଟୋଲଗେଟ୍ରେ ଜଣେ, ଢେଙ୍କିକୋଟ ଟୋଲଗେଟ୍ରେ ଜଣେ, ବନଯୋଡି ଟୋଲଗେଟ୍ରେ ୩, ଯାଜପୁର ଜିଲାର ପାଣିକୋଇଲି ଟୋଲଗେଟ୍ରେ ୨, ଶ୍ରୀରାମପୁର ଟୋଲଗେଟ୍ରେ ଜଣେ, ବରଗଡ ଜିଲା ବରାହଗୁଡା ଟୋଲଗେଟରେ ୩, କଟକ ଜିଲାର ମଙ୍ଗୁଳି ଟୋଲଗେଟ୍ରେ ୪, ଗଞ୍ଜାମ ଜିଲାର ଭେଜିପୁଟ ଟୋଲଗେଟ୍ରେ ୩, ଖୋର୍ଦ୍ଧା ଜିଲାର ଗୋଡିପଡା ଟୋଲଗେଟ୍ରେ ୩, ବାଲେଶ୍ୱର ଜିଲାର ଶେରଗଡ ଟୋଲଗେଟ୍ରେ ୩ଜଣ ମଦ୍ୟପ ଗାଡି ଚାଳକଙ୍କୁ ଗିରଫ କରାଯାଇଛି ବୋଲି ପୋଲିସ ମୁଖ୍ୟାଳୟ ପକ୍ଷରୁ ଜଣାପଡିଛି।