ସେଣ୍ଟ ଜନ୍ସ(ଆଣ୍ଟିଗୁଆ),୪।୬(ପି.ଟି.)- କୋଭିଡ୍-୧୯ ସଂକ୍ରମଣକୁ ଦୃଷ୍ଟିରେ ରଖି ଜୈବ-ସୁରକ୍ଷିତ ପରିବେଶରେ ଇଂଲଣ୍ଡ ଓ ଓ୍ବେଷ୍ଟଇଣ୍ଡିଜ ମଧ୍ୟରେ ଆସନ୍ତା ମାସରେ ୩ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ହେବାର କାର୍ଯ୍ୟସୂଚୀ ରହିଛି। କେବଳ ୟୁକେ ସରକାରଙ୍କ ଅନୁମୋଦନକୁ ଅପେକ୍ଷା କରାଯାଇଛି। ଏଥିପାଇଁ କ୍ରିକେଟ ଓ୍ବେଷ୍ଟଇଣ୍ଡିଜ (ସିଡବ୍ଲ୍ୟୁଆଇ) ପକ୍ଷରୁ ବୁଧବାର ୧୪ ଜଣିଆ ଦଳ ଘୋଷଣା କରାଯାଇଛି। ତେବେ ଏହି ଦଳର ୩ ସଦସ୍ୟ ଇଂଲଣ୍ଡ ଗସ୍ତ କରିବାକୁ ମନା କରିଦେଇଛନ୍ତି। ସେମାନେ ହେଲେ ଡାରେନ ବ୍ରାଭୋ, ସିମରନ ହେଟମେର ଓ କେମୋ ପଲ। ତାଙ୍କ ସ୍ଥାନରେ ଅନ୍ୟ ଖେଳାଳିଙ୍କୁ ସାମିଲ କରାଯାଇଛି। ବର୍ତ୍ତମାନ ପରିସ୍ଥିତିରେ ଖେଳାଳିଙ୍କ ମନୋଭାବକୁ ପୂର୍ଣ୍ଣ ସମ୍ମାନ ଦିଆଯିବ ବୋଲି ସିଡବ୍ଲ୍ୟୁଆଇ ପକ୍ଷରୁ ପ୍ରକାଶ କରାଯାଇଛି। ଖେଳାଳିମାନେ କାହିଁକି ଯିବାକୁ ମନା କରୁଛନ୍ତି ତାହା ସ୍ପଷ୍ଟ କରାଯାଇନାହିଁ। ”୭ ସପ୍ତାହ ବିଶିଷ୍ଟ ଏହି ଗସ୍ତରେ ଓ୍ବେଷ୍ଟଇଣ୍ଡିଜ ଖେଳାଳିମାନେ ଜୈବ-ସୁରକ୍ଷିତ ପରିବେଶରେ ଟ୍ରେନିଂ ନେବେ ଏବଂ ଖେଳିବେ। ଏହି ସମୟରେ ଖେଳାଳି ଓ ସପୋର୍ଟ ଷ୍ଟାଫ୍ଙ୍କ ସ୍ବାସ୍ଥ୍ୟ ଓ ନିରାପତ୍ତାକୁ ଗୁରୁତ୍ୱ ଦିଆଯିବ। ଦଳର କୌଣସି ସଦସ୍ୟ ଯଦି ଆହତ ହୁଅନ୍ତି ତେବେ ସେମାନଙ୍କ ସ୍ଥାନ ଭରଣା କରିବା ପାଇଁ ଚୟନ କମିଟି କିଛି ରିଜର୍ଭ ଖେଳାଳିଙ୍କୁ ମଧ୍ୟ ମନୋନୟନ କରିଛି। ସେମାନେ ଟେଷ୍ଟ ଦଳକୁ ଟ୍ରେନିଂରେ ସାହାଯ୍ୟ କରିବେ“ ବୋଲି ସିଡବ୍ଲ୍ୟୁଆଇ ପକ୍ଷରୁ ପ୍ରକାଶ କରାଯାଇଛି। ଇଂଲଣ୍ଡ ଯିବାକୁଥିବା ଖେଳାଳିଙ୍କର ଚଳିତ ସପ୍ତାହରେ କୋଭିଡ-୧୯ ଟେଷ୍ଟ ହେବ। ଦଳ ଜୁନ ୮ରେ ଇଂଲଣ୍ଡ ଯାଇ ଜୁଲାଇ ୮ରୁ ଟେଷ୍ଟ ସିରିଜ ଖେଳିବ। ଓ୍ବେଷ୍ଟଇଣ୍ଡିଜ ଦଳରେ ୨ ଜଣ ନୂଆ ଖେଳାଳିଙ୍କୁ ସ୍ଥାନ ଦିଆଯାଇଛି। ସେମାନେ ହେଲେ ମିଡଲ ଅର୍ଡର ବ୍ୟାଟ୍ସମ୍ୟାନ ଏନକ୍ରୁମା ବର୍ନର ଏବଂ ଫାଷ୍ଟ ବୋଲର ଚେମର ହୋଲ୍ଡର।
ଓ୍ବେଷ୍ଟଇଣ୍ଡିଜ ଦଳ: ଜାସନ ହୋଲ୍ଡର, କ୍ରେଗ୍ ବ୍ରାଥଓ୍ବେଟ, ସାଇ ହୋପ୍, ଶେନ ଡୋରଓ୍ବିଚ୍, ରଷ୍ଟନ ଚେଜ୍, ଶେମରା ବ୍ରୁକ୍ସ, ରାକିମ କର୍ନଓ୍ବେଲ, ଏନକ୍ରୁମା ବର୍ନର, ଆଲଜାରି ଜୋସେଫ, ଚେମର ହୋଲ୍ଡର, ଜନ୍ କ୍ୟାମ୍ପବେଲ, ରେମନ ରେଇଫର, କେମର ରୋଚ୍, ଜର୍ମେନ ବ୍ଲାକ୍ଉଡ୍। ରିଜର୍ଭ ଖେଳାଳି: ସୁନୀଲ ଆମ୍ବ୍ରିସ, ଜୋଶୁଆ ଡା’ସିଲ୍ଭା, ଶାନନ ଗାବ୍ରିଏଲ, କେଅନ ହାର୍ଡିଂ, କାଏଲ ମେୟର୍ସ, ପ୍ରେଷ୍ଟନ ମ୍ୟାକସ୍ବିନ, ମର୍କ୍ୱିନୋ ମିଣ୍ଡଲେ, ଶେନ ସୋସେଲେ, ଆଣ୍ଡରସନ ଫିଲିପ୍, ଓଶାନେ ଥୋମାସ, ଜୋମେଲ ଓ୍ବାରିକାନ।