ସାନ ବେନିଟୋ,୩୧।୫(ଏପି): ୩ଥର ଅଲିମ୍ପିକ୍ ଚାମ୍ପିୟନ ହେବାର ଗୌରବ ଅର୍ଜନ କରିଥିବା ପୂର୍ବତନ ଆମେରିକୀୟ ଧାବକ ବବି ଜୋଏ ମୋରୋଙ୍କ ପରଲୋକ ହୋଇଛି। ୧୯୫୬ ମେଲବୋର୍ନ ଅଲିମ୍ପିକ୍ସରେ ଟେକ୍ସାସର ଏହି ସ୍ପ୍ରିଣ୍ଟର ୩ଟି ସ୍ବର୍ଣ୍ଣ ପଦକ ଜିତି ଇତିହାସ ସୃଷ୍ଟି କରିଥିଲେ। ଆବିଲେନ ଖ୍ରୀଷ୍ଟିଆନ ବିଶ୍ୱବିଦ୍ୟାଳୟରେ ଛାତ୍ର ହିସାବରେ ପଢୁଥିବା ବେଳେ ଏହି ବିରଳ ସଫଳତା ହାସଲ କରିଥିବା ମେରୋ ୮୪ ବର୍ଷ ବୟସରେ ମୃତ୍ୟୁ ବରଣ କରିଛନ୍ତି। ସାନି ବେନିଟୋରେ ଥିବା ନିଜ ବାସଭବନରେ ସେ ସ୍ବାଭାବିକ ଭାବେ ମୃତ୍ୟୁ ବରଣ କରିଛନ୍ତି ବୋଲି ତାଙ୍କ ପରିବାର ଲୋକ ସୂଚନା ଦେଇଛନ୍ତି।
ମେଲବୋର୍ନ ଅଲିମ୍ପିକ୍ସରେ ସେ ୧୦୦, ୨୦୦ ମି. ଦୌଡ଼ରେ ସ୍ବର୍ଣ୍ଣ ପଦକ ହାସଲ କରିବା ସହ ୪୦୦ ମି. ରିଲେ ଦୌଡରେ ମଧ୍ୟ ସ୍ବର୍ଣ୍ଣିମ ସଫଳତା ହାସଲ କରିଥିଲେ। ୨୦୦ ମି.ରେ ସେ ୨୦.୬ ସେକେଣ୍ଡ ନେଇ ରେକର୍ଡର ସମକକ୍ଷ ହେବା ସହ ନିଜ ରିଲେ ଦଳକୁ ମଧ୍ୟ ବିଶ୍ୱ ରେକର୍ଡର ଅଧିକାରୀ କରିଥିଲେ। କ୍ୟାରିୟରରେ ସେ ଏକାଧିକ ପୁରସ୍କାର ଅର୍ଜନ କରିଥିଲେ। ସ୍ପୋଟର୍ସ ଇଲୁଷ୍ଟ୍ରେଟେଡ ତରଫରୁ ତାଙ୍କୁ ‘ସ୍ପୋଟର୍ସମ୍ୟାନ ଅଫ୍ ଇୟର’ ପୁରସ୍କାର ପ୍ରଦାନ କରାଯାଇଥିଲା। ହାରଲିନ୍ଗେନ୍ରେ ଜନ୍ମିତ ମୋରୋ ସାନ ବେନିଟୋରେ ବଡ଼ ହୋଇଥିଲେ। ସାନ ବେନିଟୋ ହାଇସ୍କୁଲ୍ରେ ସେ ଟ୍ରାକ ଆଣ୍ଡ ଫୁଟବଲ୍ ସହିତ ଜଡିତ ରହିଥିଲେ। ଏଠାରେ ଫୁଟବଲ ଷ୍ଟାଡିୟମକୁ ବବି ମୋରୋଙ୍କ ନାମରେ ନାମିତ କରାଯାଇଛି। ୧୯୮୯ରେ ତାଙ୍କୁ ଟ୍ରାକ୍ ଆଣ୍ଡ ଫିଲ୍ଡ ହଲ୍ ଅଫ୍ ଫେମ୍ରେ ସାମିଲ କରାଯାଇଥିଲା।
ଗୋଟିଏ ଅଲିମ୍ପିକ୍ସରେ ୧୦୦, ୨୦୦ ଦୌଡ଼ ଓ ୪୦୦ମି. ରିଲେ ରେସ୍ରେ ସେ ହାସଲ କରିଥିବା ରେକର୍ଡର ପରେ ସମକକ୍ଷ ହୋଇଥିଲେ ଆମେରିକାର କାର୍ଲ ଲୁଇସ୍ ଓ ଜାମାଇକାନ ଉସେନ ବୋଲ୍ଟ। ୧୯୫୮ରେ ସେ ଆଥଲେଟିକ୍ସରୁ ଅବସର ଘୋଷଣା କରିଥିଲେ। ଏହାପରେ ସେ ୧୯୬୦ରେ ଅବସରରୁ ଫେରିବାକୁ ପ୍ରୟାସ କରିଥିଲେ ମଧ୍ୟ ୟୁଏସ୍ ଅଲିମ୍ପିକ ଦଳ ପାଇଁ ଯୋଗ୍ୟତା ହାସଲ କରିବାରେ ବିଫଳ ହୋଇଥିଲେ।