ଲକ୍ଷ୍ନୌ: କୁହାଯାଏ, ବିବାହ ସ୍ବର୍ଗରେ ସ୍ଥିର ହୋଇଥାଏ। ଯିଏ ଯାହା ପାଇଁ ତାକୁ ଭଗବାନ ସ୍ଥିର କରିଥାନ୍ତି। ଉତ୍ତରପ୍ରଦେଶର ମିରଟରେ ହୋଇଥିବା ଏକ ବିବାହ ଏବେ ଚର୍ଚ୍ଚାରେ ରହିଛି। କରୋନା ଭାଇରସ୍ ସଂକ୍ରମଣ ଯୋଗୁ ଲାକେ ଚିନ୍ତାରେ ପଡ଼ିଥିବା ବେଳେ ୩ ଫୁଟର ବର ଫିରୋଜଙ୍କ ଭାଗ୍ୟ କିନ୍ତୁ ଚମକିଛି। ତାଙ୍କୁ ସମାନ ଉଚ୍ଚତା ଅର୍ଥାତ ୩ ଫୁଟର କନ୍ୟା ମିଳିଯାଇଛନ୍ତି। ଦୁଇଜଣଙ୍କ ପରିବାରବର୍ଗ କହିଛନ୍ତି, ଏମାନଙ୍କ ଉଚ୍ଚତା ଏତେ ଛୋଟ ଥିବାରୁ ବିବାହ ପାଇଁ ଅନେକ ସମସ୍ୟା ଦେଖା ଦେଉଥିଲା। ଏବେ ଦୁହିଁଙ୍କ ଯୋଡ଼ି ଦେଖି ଲୋକେ କହୁଛନ୍ତି, ଉପରବାଲା ତିଆରି କରିଛନ୍ତି। ଏଥିରେ ବନ୍ଧୁ ପରିଜନ ବହୁତ ଖୁସି। ୩ ଫୁଟ ଫିରୋଜଙ୍କ ପାଇଁ କନ୍ୟାପାତ୍ର ଖୋଜିବା ତାଙ୍କ ପରିବାର ଲୋକଙ୍କୁ ବହୁ ସମସ୍ୟାର ସମ୍ମୁଖୀନ ହେବାକୁ ପଡୁଥିଲା। କାରଣ ଯେତେ ବାହାଘର ପ୍ରସ୍ତାବ ଆସୁଥିଲା ଉଚ୍ଚତା କମ୍ ଯୋଗୁ ଭାଙ୍ଗି ଯାଉଥିଲା। ହଠାତ୍ ତାଙ୍କର ଜଣେ ବନ୍ଧୁଙ୍କ ଭାଉଜ ତାଙ୍କୁ ଦେଖିଲେ ଏବଂ ତାଙ୍କର ୩ ଫୁଟ ଉଚ୍ଚତାର ଭଉଣୀଙ୍କ ପାଇଁ ପ୍ରସ୍ତାବ ଦେଲେ। ପରେ ଦୁଇ ପରିବାର ଏକାଠି ବସି ବିବାହ ସ୍ଥିର କଲେ। ଦୁଇମାସ ପୂର୍ବରୁ ବିବାହ ତାରିଖ ଧାର୍ଯ୍ୟ ହୋଇଥିଲା। ମାତ୍ର ଲକ୍ଡାଉନ୍ ଯୋଗୁ ଅପେକ୍ଷା କରିବାକୁ ପଡ଼ିଥିଲା। ଏବେ ଏହି ବିବାହ ସମ୍ପନ୍ନ ହୋଇଛି।
ଲିସାଡି ଗେଟ୍ ଥାନା ଅନ୍ତର୍ଗତ ଲଖିପୁରା ନିବାସୀ ବର ଫିରୋଜ ଏହି ବିବାହକୁ ନେଇ ବହୁତ ଖୁସି ବୋଲି କୁହନ୍ତି।
