ମୁମ୍ବାଇ,୮।୫: କରୋନା ଭାଇରସ ପାଇଁ ସାରା ଦେଶରେ ଜାରି ରହିଛି ଲକ୍ଡାଉନ। ଏହି ସମୟରେ ପୂର୍ବନିର୍ଦ୍ଧାରିତ ତାରିଖ ଅନୁଯାୟୀ ଲୋକେ ବିବାହ ଭଳି କାର୍ଯ୍ୟ ସମ୍ପାଦନ କରି ନ ପାରି ଏହାକୁ ଘୁଞ୍ଚାଇ ଦେଉଥିବା ଦେଖାଯାଇଛି। ହେଲେ ମହାରାଷ୍ଟ୍ରରେ ଏମିତି ଏକ ବିବାହ ଅନୁଷ୍ଠିତ ହୋଇଛି ଯାହା ଆସିଛି ଚର୍ଚ୍ଚାକୁ। ବିବାହ କରୁଥିବା ବରଙ୍କ ବୟସ ୨୯ ବର୍ଷ ହୋଇଥିବା ବେଳେ କନ୍ୟାଙ୍କ ବୟସ ଥିଲା ୧୯। ହେଲେ କନ୍ୟାଙ୍କ ଉଚ୍ଚତା ୪ ଫୁଟ ଥିବା ବେଳେ ବରଙ୍କ ଉଚ୍ଚତା ୩ ଫୁଟ ହୋଇଥିବାରୁ ଏହା ଚର୍ଚ୍ଚାକୁ ଆସିଛି। ସୂଚନା ଅନୁସାରେ ମହାରାଷ୍ଟ୍ର ଭୁଲେ ଜିଲାର ଶିରପୁର ତହସିଲରେ ବୁଧବାର ଏହି ବିବାହ ଅନୁଷ୍ଠିତ ହୋଇଥିଲା। ଏହି ବିବାହ ୨୯ ବର୍ଷୀୟ ଝାମରୁ ରାଜେନ୍ଦ୍ର କୋଲି ଓ ୧୯ ବର୍ଷୀୟା ନୟନାଙ୍କ ମଧ୍ୟରେ ଅନୁଷ୍ଠିତ ହୋଇ ଯାଇଛି। ଉଭୟଙ୍କ ବିବାହ ପୂର୍ବରୁ ସ୍ଥିର ହୋଇଥିବା ବେଳେ କରୋନା ସଂକ୍ରମଣ ଯୋଗୁ ଏହା ବିଳମ୍ବରେ କରାଯାଇଥିବା କହିଛନ୍ତି ତାଙ୍କ ପରିବାର ଲୋକେ। ଏହି ବିବାହରେ ସାମାଜିକ ଦୂରତ୍ୱକୁ ଗୁରୁତ୍ୱ ଦିଆଯିବା ସହ ପ୍ରାୟତଃ କୌଣସି ବନ୍ଧୁ ବାନ୍ଧବ ଯୋଗ ଦେଇ ନ ଥିବା କୁହାଯାଏ।