ଝାରସୁଗୁଡା ଅଫିସ,୨୨ା୪- କରୋନା ଭୂତାଣୁର ସଂକ୍ରମଣକୁ ରୋକିବା ପାଇଁ ଉଭୟ କେନ୍ଦ୍ର ଓ ରାଜ୍ୟ ସରକାର ବିଭିନ୍ନ ପଦକ୍ଷେପମାନ ନେଉଛନ୍ତି। କରୋନା ବିରୁଧରେ ହେଉଥିବା ଲଢ଼େଇରେ ସମଗ୍ର ଦେଶବାସୀଙ୍କୁ ସହଯୋଗ କରିବାକୁ ଆହ୍ବାନ ମଧ୍ୟ କରାଯାଉଛି। ସେହିପରି ଏହି ଲଢ଼େଇରେ ସ୍ବାସ୍ଥ୍ୟ ବିଭାଗ, ପୋଲିସ ବିଭାଗ ସମେତ ବିଭିନ୍ନ ବିଭାଗ ମିଳିତ ଭାବେ ସାମିଲ ହୋଇଛନ୍ତି। ଲଢ଼େଇରେ ସାମିଲ ପ୍ରତ୍ୟେକଙ୍କୁ ଯୋଦ୍ଧା ଭାବେ ସରକାର ବିବେଚିତ କରିଛନ୍ତି। ଏହି ଲଢ଼େଇରେ ଦେଶ ତଥା ସମାଜ ପ୍ରତି ଥିବା ନିଜ କର୍ତ୍ତବ୍ୟକୁ ଆଗରେ ରଖି ନିଜ ବ୍ୟକ୍ତିଗତ ଅସୁବିଧାକୁ ପଛରେ ପକାଇଛନ୍ତି ଜଣେ ମହିଳା। ନିଜର କାର୍ଯ୍ୟ ଲାଗି ସେ ଚର୍ଚ୍ଚାକୁ ଆସିଛନ୍ତି। ତେବେ ଏହି ମହିଳା ଜଣକ ହେଲେ ଝାରସୁଗୁଡା ଜିଲା ଲଇକେରା ଥାନାରେ କାର୍ଯ୍ୟରତ ମହିଳା ହୋମ ଗାର୍ଡ ଚନ୍ଦ୍ରିକା ସିଂ। ସେ ନିଜର ୩ ମାସର ପୁଅକୁ ସାଙ୍ଗରେ ନେଇ ଡ୍ୟୁଟି କରୁଛନ୍ତି।
ଝାରସୁଗୁଡା ଜିଲା ଲଇକେରା ଥାନା ଅଧୀନ ଅଇତାପାଲି ଗ୍ରାମର ଅର୍ଜୁନ ସିଂ ଓ ସୁକାନ୍ତି ସିଂଙ୍କ ଝିଅ ଚନ୍ଦ୍ରିକା ସିଂ(୨୮)। ୨୦୧୪ରୁ ସେ ହୋମଗାର୍ଡ ଭାବେ କାର୍ଯ୍ୟ କରୁଛନ୍ତି। ୨୦୧୯ ଏପ୍ରିଲରେ ସେ ପାନପାଲି ଗ୍ରାମରେ ବିବାହ କରଛନ୍ତି। ସ୍ବାମୀ ଆସାମରେ ରହି କାମ କରୁଛନ୍ତି। ଗତ ଜାନୁୟାରୀ ୨୨ ତାରିଖରେ ଚନ୍ଦ୍ରିକା ଏହି ପୁତ୍ର ସନ୍ତାନଟିକୁ ଜନ୍ମ ଦେଇଛନ୍ତି। ମାତୃତ୍ୱକାଳୀନ ଅବସର ଛୁଟି ପରେ ସେ କାର୍ଯ୍ୟରେ ଯୋଗ ଦେଇଛନ୍ତି। କରୋନା ଯୋଗୁ ଉପୁଜିଥିବା ପରିସ୍ଥିତିରେ ସମାଜ ପ୍ରତି ଥିବା ଦାୟିତ୍ୱ ତାଙ୍କୁ ପଛକୁ ଟାଣି ପାରି ନ ଥିଲା। ଅନ୍ୟପକ୍ଷେ ପାଖରେ ରହୁଥିବା ମାଙ୍କୁ ମଧ୍ୟ ଏକୁଟିଆ ଘରେ ଛାଡିଦେବା ତାଙ୍କ ଲାଗି ଅସମ୍ଭବ ଥିଲା। ଏଣୁ ସେ ମାଙ୍କୁ ମଧ୍ୟ ସାଙ୍ଗରେ ଆଣି ଡ୍ୟୁଟି କରୁଛନ୍ତି। ଅବଶ୍ୟ ମା ସାଙ୍ଗରେ ଆସିବାରୁ ତାଙ୍କୁ ସୁବିଧା ହେଉଛି। ଚନ୍ଦ୍ରିକା ଡ୍ୟୁଟି କରୁଥିବା ବେଳେ ତାଙ୍କ ମା ନାତିକୁ ସମ୍ଭାଳନ୍ତି। ଡ୍ୟୁଟି ସରିବା ପରେ ମା ଓ ପୁଅକୁ ଧରି ପୁଣି ସେ ଘରକୁ ଫେରିଥାନ୍ତି। ତେବେ ଚନ୍ଦ୍ରିକା କହିଛନ୍ତି ଯେ, ଲୋକଙ୍କୁ କରୋନା ଦାଉରୁ ରକ୍ଷା କରିବା ପାଇଁ ନିଜ ପରିବାରକୁ ପଛରେ ପକାଇ ପୋଲିସ କର୍ମଚାରୀ ଡ୍ୟୁଟି କରୁଛନ୍ତି। ଏଣୁ ଲକଡାଉନ ସମୟରେ କୌଣସି ଜରୁରୀ କାମ ନ ଥିଲେ ଘରୁ ନ ବାହାରି ଲୋକେ ପୋଲିସକୁ ସହଯୋଗ କରିବା ପାଇଁ ଚନ୍ଦ୍ରିକା ଅନୁରୋଧ କରିଛନ୍ତି।