ନୂଆଦିଲ୍ଲୀ,୨୭ା୪: ବ୍ରିଟେନ୍ର ଅକ୍ସଫୋର୍ଡ ୟୁନିଭର୍ସିଟି ଦ୍ୱାରା ବିକାଶିତ କୋଭିଡ୍-୧୯ ନିରୋଧୀ ଟିକାର ମାନବ ଶରୀରରେ ପରୀକ୍ଷଣ ଗତ ଗୁରୁବାର ଆରମ୍ଭ କରାଯାଇଥିଲା। ଏହି ପରୀକ୍ଷଣରେ ଉକ୍ତ ଟିକା ସଫଳ ହେବ ବୋଲି ତାହାକୁ ବିକାଶିତ କରିଥିବା ବୈଜ୍ଞାନିକମାନେ ଦୃଢ଼ ଆଶାବାଦୀ ଅଛନ୍ତି। ତେଣୁ ପରୀକ୍ଷଣ ରିପୋର୍ଟ ଆସିବା ପୂର୍ବରୁ ଏହି ଟିକାର ଉତ୍ପାଦନ ଆରମ୍ଭ କରାଯିବାକୁ ଉଦ୍ୟମ ଚାଲିଛି। ଅକ୍ସଫୋର୍ଡ ୟୁନିଭର୍ସିଟି ପକ୍ଷରୁ ପାର୍ଟନର ସଂସ୍ଥା ସହାୟତାରେ ବ୍ରିଟେନ, ଚାଇନା, ଭାରତ ସମେତ ୭ଟି ସ୍ଥାନରୁ ଏହି ଟିକାର ଉତ୍ପାଦନ କରାଯିବାକୁ ପ୍ରସ୍ତୁତି ଚାଲିଛି। ସେଥିମଧ୍ୟରୁ ଭାରତରେ ଆସନ୍ତା ୨ରୁ ୩ ସପ୍ତାହ ମଧ୍ୟରେ ଉତ୍ପାଦନ ଆରମ୍ଭ ହେବାକୁ ଯାଉଛି। ଏନେଇ ପୁଣେସ୍ଥିତ ଟିକା ପ୍ରସ୍ତୁତକାରୀ ସଂସ୍ଥା ସେରମ୍ ଇନ୍ଷ୍ଟିଚ୍ୟୁଟ୍ ଅଫ୍ ଇଣ୍ଡିଆ (ସିଆଇଆଇ) ଯୋଜନାବଦ୍ଧ ଭାବେ କାର୍ଯ୍ୟ ଚଳାଇଛି। ମାନବ ଶରୀରରେ ଏହି ଟିକାର ପରୀକ୍ଷଣ ସଫଳ ହେଲେ ଆସନ୍ତା ସେପ୍ଟେମ୍ବର କିମ୍ବା ଅକ୍ଟୋବର ସୁଦ୍ଧା ବଜାରରେ ଅକ୍ସଫୋର୍ଡ ଟିକା ଉପଲବ୍ଧ ହେବ ବୋଲି ସିଆଇଆଇର ସିଇଓ ଆଡର ପୁନାଓ୍ବାଲା କହିଛନ୍ତି। ତାଙ୍କ କହିବାନୁଯାୟୀ, ପୂର୍ବରୁ ସିଆଇଆଇ ସହଯୋଗିତାରେ ଅକ୍ସଫୋର୍ଡ ୟୁନିଭର୍ସିଟି ବୈଜ୍ଞାନିକମାନେ ମ୍ୟାଲେରିଆ ଟିକା ପ୍ରସ୍ତୁତ କରିଛନ୍ତି। ସେମାନେ ଦକ୍ଷ ବୈଜ୍ଞାନିକ। ଆମ ଟିମ୍ କୋଭିଡ୍-୧୯ ଟିକା ଉତ୍ପାଦନ ପାଇଁ ଅକ୍ସଫୋର୍ଡ ୟୁନିଭର୍ସିଟିର ଡ. ହିଲ୍ଙ୍କ ସହ ଯୋଗସୂତ୍ର ରଖି କାର୍ଯ୍ୟ କରୁଛି। ପ୍ରଥମ ୬ ମାସ ପର୍ଯ୍ୟନ୍ତ ମାସିକ ୫୦ ଲକ୍ଷ ଡୋଜ୍ ପ୍ରସ୍ତୁତ କରିବାକୁ ଲକ୍ଷ୍ୟ ରଖିଛୁ। ପରେ ଉତ୍ପାଦନ ପରିମାଣ ବଢ଼ାଇ ମାସିକ ୧ କୋଟି ଡୋଜ୍ ପ୍ରସ୍ତୁତ କରିବାକୁ ଆଶା ରଖିଛୁ ବୋଲି ପୁନାଓ୍ବାଲା କହିଛନ୍ତି। ଅନ୍ୟପକ୍ଷରେ ଭାରତରେ ଆସନ୍ତା ୨ରୁ ୩ ସପ୍ତାହ ମଧ୍ୟରେ ଉକ୍ତ ଟିକାର ମାନବ ଶରୀରରେ ପରୀକ୍ଷା କରାଯିବାକୁ ଆଶା ରହିଛି। ଏନେଇ ସରକାରଙ୍କ ନିୟମ ଅନୁଯାୟୀ କାର୍ଯ୍ୟ ଚାଲିଛି। ଆମେ ଏବେ ରିସ୍କ ନେଇ ଟିକା ଉତ୍ପାଦନ କରିବାକୁ ଯାଉଛି। କ୍ଲିନିକାଲ ପରୀକ୍ଷଣରେ ସଫଳତା ମିଳିବାବେଳକୁ ଯଥେଷ୍ଟ ପରିମାଣର ଟିକା ଉପଲବ୍ଧ କରାଇବା ଉଦ୍ଦେଶ୍ୟରେ ଏଭଳି ରିସ୍କ ନେଇଛୁ ବୋଲି ପୁନାଓ୍ବାଲା କହିଛନ୍ତି।