ଢେଙ୍କାନାଳ ଅଫିସ, ୧୭।୧୦: କୁମାର ପୂର୍ଣ୍ଣିମାଠାରୁ ଆରମ୍ଭ ହୋଇଛି ଢେଙ୍କାନାଳର ଗଣପର୍ବ ଲକ୍ଷ୍ମୀପୂଜା। ଐତିହ୍ୟ, ପରମ୍ପରା ଏବଂ କିମ୍ବଦନ୍ତୀକୁ ଆଧାର କରି ହେଉଥିବା ଏହି ପୂଜା ଉତ୍ସବ ସାରା ରାଜ୍ୟରେ ସ୍ବତନ୍ତ୍ରତା ହାସଲ କରିଛି। ଚଳିତ ବର୍ଷ ଅନୁକୂଳ ପାଗ ଥିବାରୁ ପୂଜା ବଜାରର ଭରପୂର ମଜା ଉଠାଉଛନ୍ତି ଶ୍ରଦ୍ଧାଳୁ।
ଐତିହ୍ୟ ସମ୍ପନ୍ନ ଲକ୍ଷ୍ମୀପୂଜା ବୁଧବାର ୪ର୍ଥ ଦିନରେ ପହଞ୍ଚତ୍ଛି। ୧୧ଦିନ ବ୍ୟାପୀ ଆୟୋଜିତ ପୂଜା ଉତ୍ସବ ପାଇଁ ଏକାକାର ହୋଇପଡ଼ିଛନ୍ତି ସହରବାସୀ। ପୂଜା କମିଟିଗୁଡ଼ିକ ପକ୍ଷରୁ ମଧ୍ୟ ଶୃଙ୍ଖଳିତ ଦର୍ଶନ ପାଇଁ ସମସ୍ତ ବନ୍ଦୋବସ୍ତ କରାଯାଇଛି। ଚଳିତ ବର୍ଷ ପ୍ରତିଯୋଗିତାମୂଳକ ପୂଜାକୁ ଓହ୍ଲାଇଛନ୍ତି ୩୮ ପ୍ରତିଷ୍ଠାନ। ସହରର ପ୍ରବେଶ ଦ୍ୱାର କଲେଜ ବାଇପାସ୍, ମହିଷାପାଟ ବାଇପାସ୍, କଣ୍ଟାନାଳୀ ବାଇପାସ, କୋରିଅଁା ବାଇପାସ୍, ରାମେଶ୍ୱରପୁର ଓଭରବ୍ରିଜ୍ ଠାରୁ ସହରର ପ୍ରମୁଖ ବଜାର ଆଲୋକ ବର୍ଣ୍ଣାଳୀରେ ଝଲସୁଛି। ସହର ଭିତରେ ୩୫୦ଟି ଅତ୍ୟାଧୁନିକ ବୈଦ୍ୟୁତିକ ତୋରଣ କରାଯାଇଛି।
ଗଣେଶ ବଜାର, ଲକ୍ଷ୍ମୀବଜାର, ଜବାହରଚୌକ, ମିନାବଜାର, କାଞ୍ଚନବଜାର, ଗୁଡିଆନାଳୀ, ବସ୍ଷ୍ଟାଣ୍ଡ, କଲେଜ ଛକ, ବାଜିଚୌକ ପୂଜା ମଣ୍ଡପ ପକ୍ଷରୁ ତିଆରି କରାଯାଇଥିବା ତୋରଣ ବେଶ୍ ମନଲୋଭା ହୋଇଛି। ମିନାବଜାର, ଗଣେଶ ବଜାର, କୈବଲ୍ୟ ବଜାର, ଗୁଡିଆନାଳୀ ପୂଜା ପ୍ରତିଷ୍ଠାନର ଚାନ୍ଦିମେଢ଼ ଦେଖିବାକୁ ହଜାର ହଜାର ଲୋକଙ୍କ ସାମଗମ ହେଉଛି। ମହାବୀର ବଜାର, ଜବାହରଚୌକ, ବାଜିଚୌକ, ଆନନ୍ଦ ବଜାର, ଲକ୍ଷ୍ମୀବଜାର, କୈବଲ୍ୟ ବଜାର ପୂଜା ପ୍ରତିଷ୍ଠାନ ପକ୍ଷରୁ ପୌରାଣିକ କଥାବସ୍ତୁକୁ ମଣ୍ଡପରେ ସ୍ଥାନିତ କରାଯାଇଛି। ତଦନୁଯାୟୀ ଅଳଙ୍କାରରେ ମା’ଙ୍କ ପ୍ରତିମା ଏବଂ ପାର୍ଶ୍ୱ ଦେବଦେବୀଙ୍କୁ ସାଜସଜ୍ଜା କରାଯାଇଛି। ଶିଳ୍ପୀଙ୍କ ଦ୍ୱାରା ନିର୍ମିତ କଳାକୁଞ୍ଜଗୁଡ଼ିକ ବେଶ୍ ଜୀବନ୍ତ ହୋଇଛି। ଚଳିତବର୍ଷ ଅଧିକାଂଶ ପୂଜା ମଣ୍ଡପକୁ ପ୍ଲାଷ୍ଟିକ୍ ଫ୍ରି ଜୋନ୍ କରାଯାଇଛି। ସଚେତନତା ବାର୍ତ୍ତା ମାଧ୍ୟମରେ ପ୍ଲାଷ୍ଟିକ ବର୍ଜନ କରିବାକୁ ବାର୍ତ୍ତା ଦିଆଯାଉଛି।
ଗୁଡ଼ିଆନାଳୀ, ରଥଗଡା ଓ ସରସମେଳା ପଡ଼ିଆ ନିକଟରେ ବିଭିନ୍ନ କିସମର ଦୋଳି ପଡ଼ିଛି। ଏହାର ମଜା ନେବାକୁ ସବୁ ବର୍ଗର ଲୋକଙ୍କ ଭିତରେ ବେଶ୍ ଉତ୍ସାହ ପରିଲକ୍ଷିତ ହେଉଛି। ପୂଜା ବଜାରରେ କଟକ ଚାଟ୍, ଦହିବରା ଆଳୁଦମ୍, ଠୁଙ୍କାପୁରି, ଢାକାଇ ପୁରି, ମଥୁରା କେକ୍, ଢେଙ୍କାନାଳ ବରା, ମାଲପୁଆ ଡାଲମା, ଫାଷ୍ଟଫୁଡ୍ ଖାଦ୍ୟ ଷ୍ଟଲ୍ଗୁଡ଼ିକରେ ନାହିଁ ନ ଥିବା ଭିଡ଼ ଜମୁଛି। ସହରର ପ୍ରମୁଖ ରାସ୍ତାର ଉଭୟ ପାର୍ଶ୍ୱରେ ଉଠା ଦୋକାନୀମାନେ ନିଜର ପସରା ମେଲାଇ ବସିଛନ୍ତି। ଶାନ୍ତିଶୃଙ୍ଖଳା ରକ୍ଷା କରିବା ୧୫ ପ୍ଲାଟୁନ ସଶସ୍ତ୍ର ପୋଲିସ ମୁତୟନ ହୋଇଛନ୍ତି ା