ନୂଆଦିଲ୍ଲୀ,୯।୫(ପି.ଟି.): କୋଭିଡ-୧୯ ମହମାରୀର ଆତଙ୍କ ଜାରି ରହିଥିବା ବେଳେ କ୍ରିକେଟ ଆଇକନ ସଚିନ ତେନ୍ଦୁଲକର ପୁଣି ଥରେ ସହାୟତାର ହାତ ବଢାଇଛନ୍ତି। ସେ ୪,୦୦୦ ବଞ୍ଚିତ ତଥା ଶୋଷିତ ବ୍ୟକ୍ତିଙ୍କୁ ଆର୍ଥତ୍କ ଭାବେ ସହାୟତା ପ୍ରଦାନ କରୁଛନ୍ତି। ଏମାନଙ୍କ ମଧ୍ୟରେ ବ୍ରିହାନମୁମ୍ବାଇ ମ୍ୟୁନିସ୍ପାଲ କର୍ପୋରେଶନ (ବିଏମ୍ସି) ସ୍କୁଲର ଛାତ୍ରୀଛତ୍ର ମାନେ ସାମିଲ ରହିଛନ୍ତି। ତେବେ ସେ କେତେ ପରିମାଣରେ ଆର୍ଥିକ ସହାୟତା ପ୍ରଦାନ କରୁଛନ୍ତି ସେ ବିଷୟରେ କୌଣସି ସୂଚନା ଦିଆଯାଇ ନାହିଁ।
ସଚିନ ‘ଏଚ୍ଆଇ୫ ଫାଉଣ୍ଡେଶନ’ ଏହି ଅର୍ଥ ପ୍ରଦାନ କରିଛନ୍ତି। ମୁମ୍ବାଇରେ ଏହା ଏକ ନନ୍ ପ୍ରଫିଟ୍ ଅର୍ଗାନାଇଜେଶନ ଭାବେ ଜଣାଶୁଣା। ଏଚ୍ଆଇ୫ ଫାଉଣ୍ଡେଶନ ଟିମ୍କୁ ସଚିନ ଟୁଇଟ୍ କରି ଅଭିନନ୍ଦନ ଜଣାଇଛନ୍ତି। ଦିନ ମଜୁରିଆ ଓ ବଞ୍ଚିତ ଲୋକମାନଙ୍କୁ ସହାୟତା ପାଇଁ ପ୍ରୟାସ ଜାରି ରଖିଥିବାରୁ ସେ ଏହି ଫାଉଣ୍ଡେଶନକୁ ଧନ୍ୟବାଦ୍ ଜଣାଇଛନ୍ତି। ସଚିନଙ୍କୁ ମଧ୍ୟ ଉକ୍ତଫାଉଣ୍ଡେଶନ ଏହି ବହୁମୂଲ୍ୟ ସହାୟତା ପାଇଁ କୃତଜ୍ଞତା ଜଣାଇଛି।
ଉଲ୍ଲେଖଥାଉ କି, ପୂର୍ବରୁ ସଚିନ କରୋନା ଭାଇରସ୍ ବିରୋଧରେ ଚାଲିଥିବା ଲଢେଇ ପାଇଁ ପ୍ରଧାନମନ୍ତ୍ରୀଙ୍କ ରିଲିଫ୍ ପଣ୍ଡକୁ ଓ ମୁଖ୍ୟମନ୍ତ୍ରୀଙ୍କ ରିଲିଫ୍ ଫଣ୍ଡକୁ ୨୫ ଲକ୍ଷ ଟଙ୍କା ଲେଖାଏ ଦାନ କରିଛନ୍ତି। ପୂର୍ବରୁ ମଧ୍ୟ ସେ ମୁମ୍ବାଇର କେତେକ ଅଞ୍ଚଳରେ ଗୋଟିଏ ମାସ ପାଇଁ ୫,୦୦୦ ଲୋକଙ୍କୁ ଖାଦ୍ୟ ଦେବା ପାଇଁ ଖର୍ଚ୍ଚ ବହନ କରିଥିଲେ। ସଚିନଙ୍କୁ ବାଦ୍ ଦେଲେ ଅନ୍ୟ କ୍ରିକେଟରମାନେ ମଧ୍ୟ କୋଭିଡ-୧୯ ଲଢେଇରେ ସାମିଲ ହୋଇ ସହାୟତାର ହାତ ବଢାଇଛନ୍ତି।