ଭୁବନେଶ୍ୱର,୧୭ା୨(ବ୍ୟୁରୋ): ଶହୀଦନଗର ଥାନା ଅନ୍ତର୍ଗତ ଶାନ୍ତିପଲ୍ଲୀ ବସ୍ତି ଲେଭଲ କ୍ରସିଂ ନିକଟରେ ପୋଲିସ ରବିବାର ଚଢ଼ାଉ କରି ବ୍ରାଉନସୁଗାର ବିକ୍ରି କରୁଥିବା ୩ ଅଭିଯୁକ୍ତଙ୍କୁ ଗିରଫ କରିଛି। ସେମାନଙ୍କଠାରୁ ୪୦.୫ ଗ୍ରାମର ବ୍ରାଉନସୁଗାର, ଗୋଟିଏ ପଲ୍ସର ବାଇକ, ୩ ମୋବାଇଲ ଫୋନ୍ ଓ ୬ ହଜାର ୪ଶହ ଟଙ୍କା ଜବତ କରିଛି। ଗିରଫ ଅଭିଯୁକ୍ତମାନେ ହେଲେ ପଥରବନ୍ଧବସ୍ତି ଅଞ୍ଚଳର ଶୈଳେନ୍ଦ୍ର କୁମାର ପଣ୍ଡା ଓରଫ ରିଙ୍କୁ, ଖୋର୍ଦ୍ଧା ନୂଆ ବସ୍ଷ୍ଟାଣ୍ଡ ଅଞ୍ଚଳର ଅଜୟ କୁମାର କର ଓରଫ ଅଜୁ ଓ ସାମନ୍ତରାପୁର ଅଞ୍ଚଳର ସତ୍ୟନାରାୟଣ ବେହେରା ଓରଫ ନିଲୁ। ସେମାନେ ବିଭିନ୍ନ ଅଞ୍ଚଳରେ ଅତି ଚତୁରତାର ସହ ବାଇକ ଓ ଅଟୋରେ ବୁଲି ଖୁଚୁରା ବେପାରୀଙ୍କୁ ବ୍ରାଉନସୁଗାର ବିକ୍ରି କରନ୍ତି। କମିଶନରେଟ ପୋଲିସର ଡ୍ରଗ୍ ଟାସ୍କଫୋର୍ସ ଖବର ପାଇବା ପରେ ଅଭିଯୁକ୍ତଙ୍କୁ ଧରିବାକୁ ଯୋଜନା ହୋଇଥିଲା। ଏ ନେଇ ଶହୀଦନଗର ଥାନା ପୋଲିସ ଏନ୍ଡିପିଏଓ ୨୧-ବି ଆକ୍ଟ ଅନୁଯାୟୀ ମାମଲା (ନଂ. ୮୮/୨୦) ରୁଜୁ କରିଛି। ସୋମବାର ଅଭିଯୁକ୍ତମାନଙ୍କୁ କୋର୍ଟ ଚାଲାଣ କରାଯିବ ବୋଲି ଥାନା ଅଧିକାରୀ ବିରଞ୍ଚତ୍ ପତି ସୂଚନା ଦେଇଛନ୍ତି।