ରାଉରକେଲା ଅଫିସ, ୨୦।୧୧
ଉଦିତ ନଗର ଥାନା ଅର୍ନ୍ତଗତ ବାସନ୍ତୀ କଲୋନୀରେ ଜନୈକ ବ୍ୟକ୍ତି ସେବା କରିବାର ବାହାନା ଦେଖାଇ ୨ଜଣ ମହିଳାଙ୍କୁ ଦୀର୍ଘ ୪୦ଦିନ ଧରି ବନ୍ଧକ ରଖିବା ଘଟଣା ଇସ୍ପାତ ସହରରେ ଚାଞ୍ଚଲ୍ୟ ସୃଷ୍ଟି କରିଛି। ପୋଲିସ ଉକ୍ତ ଘଟଣାରେ ନିଜକୁ ସାମ୍ବାଦିକ ବୋଲାଉଥିବା ଜଣେ ବ୍ୟକ୍ତିଙ୍କୁ ଗିରଫ କରି କୋର୍ଟ ଚାଲାଣ କରିଛି। ପୋଲିସ ସୂତ୍ରରୁ ମିଳିଥିବା ସୂଚନା ଅନୁସାରେ ଜନୈକା ମହିଳା (୪୫) ଟାଙ୍ଗରପାଲି ଥାନା ଅଞ୍ଚଳରେ ବିବାହ କରିଛନ୍ତି। ମହିଳା ଓ ତାଙ୍କ ମା’ ଭୁବନେଶ୍ୱରର ବାସିନ୍ଦା ଅଟନ୍ତି। ତେବେ ମହିଳାଙ୍କ ବାପା ତାଙ୍କ ମା’ଙ୍କୁ ନିର୍ଯାତନା ଦେବାରୁ ସେମାନେ ଭୁବନେଶ୍ୱରରୁ ପଳାଇ ଆସିଥିଲେ। ତେବେ ରାଉରକେଲା ପଳାଇ ଆସିବା ପରେ ବାସନ୍ତୀ କଲୋନୀ ଏଲ-୪ରେ ରହୁଥିବା ଅଶୋକ ମହାନ୍ତି ଉକ୍ତ ବୃଦ୍ଧାଙ୍କୁ ଦେଖାଶୁଣା କରିବାକୁ ରଖିଥିଲେ। ପରେ କୌଶଳକ୍ରମେ ମହିଳାଙ୍କୁ ତାଙ୍କ ଜାଲରେ ଫସାଇ ଆଣି ନିଜ ଘରେ ରଖିଥିଲେ। ଏହି ସମୟରେ ମହିଳାଙ୍କ କୌଣସି ଖୋଜଖବର ନ ମିଳିବାରୁ ତାଙ୍କ ସ୍ବାମୀ ଟାଙ୍ଗରପାଲି ଥାନାରେ ଏକ ନିଖୋଜ ମାମଲା ଦାଏର କରିଥିଲେ। ଦୀର୍ଘ ଦିନ ଧରି ଅଶୋକ ମହିଳା ଓ ତାଙ୍କ ବୃଦ୍ଧା ମା’ଙ୍କୁ ନିଜ ଘରେ ବନ୍ଧକ କରି ରଖିବା ସହ ଉଭୟଙ୍କ ଅଶ୍ଳିଳ ଫଟୋ ଉଠାଇଥିବା ନେଇ ଅଭିଯୋଗ ହୋଇଛି। ଏପରିକି ଅଶୋକ ଅସଦାଚରଣ କରିବା ସହ ଏ ନେଇ କାହାକୁ ଜଣାଇଲେ ଜୀବନରେ ମାରି ଦେବାକୁ ଧମକ ଦେଉଥିଲା ବୋଲି ମହିଳା ପୋଲିସ ନିକଟରେ ଅଭିଯୋଗ କରିଛନ୍ତି। ତେବେ ଦୀର୍ଘ ୪୦ ଦିନ ଧରି ବନ୍ଧକ ରହିବା ପରେ କୌଶଳକ୍ରମେ ମହିଳା ବନ୍ଧକ ଥିବା ନେଇ ନିଜ ସମ୍ପର୍କୀୟଙ୍କୁ ସୂଚନା ଦେଇଥିଲେ। ସର୍ମ୍ପକୀୟଙ୍କ ସୂଚନା ଆଧାରରେ ଉଦିତ ନଗର ପୋଲିସ ମଙ୍ଗଳବାର ବିଳମ୍ବିତ ରାତିରେ ବାସନ୍ତୀ କଲୋନୀ ସ୍ଥିତ ଏଲ-୪ ଘରେ ଛଢ଼ାଉ କରି ମହିଳା ଓ ତାଙ୍କ ମା’ଙ୍କୁ ଉଦ୍ଧାର କରିଥିଲା। ଉଦ୍ଧାର ପରେ ସ୍ବାମୀଙ୍କ ଉପସ୍ଥିତିରେ ମହିଳା ନିଜକୁ ସାମ୍ବାଦିକ ବୋଲାଉଥିବା ଅଭିଯୁକ୍ତ ଅଶୋକ ମହାନ୍ତିଙ୍କ ବିରୋଧରେ ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତିକରି ଉଦିତନଗର ଥାନା ପୋଲିସ ଏକ ମାମଲା (ନଂ.୨୮୧/୧୯) ରୁଜୁ କରି ଅଭିଯୁକ୍ତ ଅଶୋକ ମହାନ୍ତିଙ୍କୁ ଗିରଫ କରି ବୁଧବାର କୋର୍ଟଚାଲାଣ କରିଛି।