ଓଡ଼ାପଡ଼ା,୧ା୫(ଡି.ଏନ.ଏ.) – ଢେଙ୍କାନାଳ ଜିଲା ମୋଟଙ୍ଗା ଥାନା ଅନ୍ତର୍ଗତ ୫୫ନଂ. ଜାତୀୟ ରାଜପଥର ହିନ୍ଦୋଳ ରୋଡ୍ ଛକରୁ ଗୁରୁବାର ୪୦ଜଣ ଶ୍ରମିକଙ୍କୁ ପୋଲିସ ଉଦ୍ଧାର କରିଛି। ସମ୍ପୃକ୍ତ ଶ୍ରମିକମାନେ ଏକ ଟ୍ରେଲର (ନଂ. ଆର୍ଜେ ୦୨ ଜିବି ୪୧୦୨)ରେ ବେଆଇନ ଭାବେ ବସି ବିହାରସ୍ଥିତ ନିଜ ଘରକୁ ଯାଉଥିଲେ। ଏ ନେଇ ନଂ. ୯୪/୨୦, ଦଫା ୨୭୯, ୨୭୦ ଓ ଏପିଡେମିକ୍ ଡିଜିଜେସ୍ ଆକ୍ଟର ଧାରା-୩ ଅନୁଯାୟୀ ଏକ ମାମଲା ରୁଜୁ କରାଯାଇଛି। ଗାଡ଼ି ଚାଳକଙ୍କୁ ଅଟକ ରଖି ପଚରାଉଚୁରା କରାଯାଉଥିବା ଥାନାଧିକାରୀ ନମିତା ନାୟକ ସୂଚନା ଦେଇଛନ୍ତି।
ପୋଲିସ ସୂଚନା ଅନୁଯାୟୀ, ଗତ ୨୭ ତାରିଖରେ ଟାଟାଷ୍ଟିଲ୍ ବିଏସ୍ଏଲ କମ୍ପାନୀରୁ ଲୁହା ପ୍ଲେଟ୍ ନେଇ ଉକ୍ତ ଟ୍ରେଲର ଉତ୍ତର ପ୍ରଦେଶ ଅଭିମୁଖେ ବାହାରିଥିଲା। ବିଆର୍ଜି ଛକ ନିକଟରେ ସମ୍ପୃକ୍ତ ୪୦ଜଣ ଶ୍ରମିକ ଡ୍ରାଇଭରକୁ ହାତକରି ଟ୍ରେଲରରେ ବସିଥିଲେ। ତେବେ ଓଡ଼ିଶା-ପଶ୍ଚିମବଙ୍ଗ ସୀମାନ୍ତ ଜାମଶୋଲା ଚେକ୍ପୋଷ୍ଟରେ ମୁତୟନ କର୍ମଚାରୀମାନେ ଟ୍ରେଲରକୁ ଧରିଥିଲେ। ବେଆଇନ ଭାବେ ଶ୍ରମିକଙ୍କୁ ନିଆଯାଉଥିବାରୁ ଟ୍ରେଲରକୁ ସୀମା ପାର କରିବାକୁ ଅନୁମତି ମିଳି ନ ଥିଲା। ଏଥିସହ ଶ୍ରମିକମାନଙ୍କୁ ସେମାନେ ରହୁଥିବା କମ୍ପାନୀ ନିକଟରେ ଛାଡ଼ିଦେବା ପାଇଁ ନିର୍ଦ୍ଦେଶ ଦିଆଯାଇଥିଲା। ଟ୍ରେଲରଟି ଶ୍ରମିକଙ୍କୁ ଧରି ଫେରୁଥିବାବେଳେ ଗୁରୁବାର ଅପରାହ୍ନ ୨ଟାରେ ହିନ୍ଦୋଳ ରୋଡ ବଜାର ନିକଟରେ ଅଞ୍ଚଳବାସୀ ଅଟକାଇ ପୋଲିସକୁ ଖବର ଦେଇଥିଲେ। ମୋଟଙ୍ଗା ଥାନାଧିକାରୀଙ୍କ ନିର୍ଦ୍ଦେଶକ୍ରମେ ହିନ୍ଦୋଳ ରୋଡ୍ ଫାଣ୍ଡି ଅଧିକାରୀ ଅକ୍ଷୟ କୁମାର ଦାସ ସଦଳବଳ ଗାଡ଼ି ଜବତ କରିବା ସହ ଶ୍ରମିକଙ୍କୁ ସେମାନେ କାର୍ଯ୍ୟ କରୁଥିବା କମ୍ପାନୀକୁ ପଠାଇ ଦେଇଥିଲେ।