ଜଟଣୀ,୧୦ା୬(ଡି.ଏନ୍.ଏ.): ଜଟଣୀ ବ୍ଲକ ଅଞ୍ଚଳରେ ଜଣେ ଦୋକାନୀ କରୋନା ସଂକ୍ରମିତ ହେବା ପରେ ପ୍ରଶାସନ ପକ୍ଷରୁ ବିଭିନ୍ନ ଅଞ୍ଚଳକୁ ଶଟ୍ଡାଉନ୍ ଓ କଣ୍ଟେନମେଣ୍ଟ ଜୋନ ଘୋଷଣା କରାଯାଇଛି। ଚିହ୍ନଟ ବ୍ୟକ୍ତିଙ୍କ ଘର ଏହି ବ୍ଲକ ପଦନପୁର ପଞ୍ଚାୟତର ବଡ଼ତୋଟା ଗ୍ରାମରେ ହୋଇଥିବାବେଳେ ଜଟଣୀ ମ୍ୟୁନିସିପାଲିଟି ଅନ୍ତର୍ଗତ ସୀତାରାମ ଛକରେ ଥିବା ଏକ ମାର୍କେଟ୍ କମ୍ପ୍ଲେକ୍ସରେ ତାଙ୍କର ଏକ ଗ୍ରସେରି ଦୋକାନ ରହିଛି। କିଛିଦିନ ତଳେ ସେ ଅସୁସ୍ଥ ହେବାରୁ ଖୋର୍ଦ୍ଧା ମେଡିକାଲରେ ଚିକିତ୍ସା କରିବା ସହ ସ୍ବାବ ଟେଷ୍ଟ କରିଥିଲେ। ଟେଷ୍ଟରୁ ପଜିଟିଭ ବାହାରିବାରୁ ତାଙ୍କୁ ଭୁବନେଶ୍ୱରର କୋଭିଡ୍ ହସ୍ପିିଟାଲକୁ ପଠାଯାଇଛି। ପରେ ପଞ୍ଚାୟତର ବଡ଼ତୋଟା, ବେଲପଡ଼ା ଓ ଖୋଲାଦ୍ୱାର ଗ୍ରାମକୁ ମଙ୍ଗଳବାର ସନ୍ଧ୍ୟା ୬ଟାରୁ ୪୮ ଘଣ୍ଟା ପାଇଁ ଶଟ୍ଡାଉନ୍ କରାଯାଇଥିବା ସରପଞ୍ଚ ସୁକାନ୍ତ ପରିଡ଼ା କହିଛନ୍ତି। ସେହିପରି ପ୍ରଶାସନ ପକ୍ଷରୁ ଉକ୍ତ ବ୍ୟକ୍ତିଙ୍କ ଦୋକାନକୁ ୭ ଦିନ ଏବଂ କମ୍ପ୍ଲେକ୍ସର ଅନ୍ୟ ଦୋକାନଗୁଡ଼ିକୁ ୪୮ଘଣ୍ଟା ପର୍ଯ୍ୟନ୍ତ ବନ୍ଦ ରଖିବା ପାଇଁ ନିର୍ଦ୍ଦେଶ ଦିଆଯାଇଛି। ଏହାସହ ସୀତାରାମ ଛକରୁ ବଡ଼ ବଜାର ପର୍ଯ୍ୟନ୍ତ ମଙ୍ଗଳବାର ସନ୍ଧ୍ୟା ୭ଟାରୁ ୪୮ଘଣ୍ଟା ପର୍ଯ୍ୟନ୍ତ ଶଟଡାଉନ ଘୋଷଣା କରାଯାଇଥିବା ମ୍ୟୁନିସିପାଲିଟି ନିର୍ବାହୀ ଅଧିକାରୀ ତପନ କୁମାର ମହାପାତ୍ର କହିଛନ୍ତି।