ବିଶାଖାପାଟଣା,୧୯।୧୨- ଏଠାରେ ଓ୍ବେଷ୍ଟଇଣ୍ଡିଜ ବିପକ୍ଷରେ ଖେଳାଯାଇଥିବା ଦ୍ୱିତୀୟ ଦିନିକିଆ ମ୍ୟାଚ୍ରେ ଭାରତୀୟ ଦଳର ମଧ୍ୟକ୍ରମ ବ୍ୟାଟ୍ସମ୍ୟାନ୍ ଶ୍ରେୟାସ ଆୟାର ଏକ କୌତୂହଳପୂର୍ଣ୍ଣ ତ୍ରୁଟି କରିଛନ୍ତି। ସେ ଏହି ମ୍ୟାଚ୍ରେ ୩୨ ବଲରୁ ବିସ୍ଫୋରକ ୫୩ ରନ୍ର ଇନିଂସ ଖେଳିଥିଲେ। ଏଥିରେ ସାମିଲ ଥିଲା ୪ ଛକା ଓ ୩ ଚୌକା। ଏହି ଇନିଂସ ଅବସରରେ ସେ ଏଭଳି କିଛି କରିଥିଲେ, ଯାହା ଦେଖି ହସି ହସି ଗଡ଼ି ଯାଇଥିଲେ ଭାରତୀୟ ଅଧିନାୟକ ବିରାଟ କୋହଲି। ୪୮ ରନ୍ କରିଥିବାବେଳେ କିମୋ ପଲଙ୍କ ବଲରେ ବାଉଣ୍ଡ୍ରି ଅଞ୍ଚଳକୁ ଖେଳି ଏକ ରନ୍ ନେବା ପରେ ବ୍ୟାଟ ଉଠାଇ ଅର୍ଦ୍ଧଶତକ ହାସଲ କରିବାର ଖୁସି ମନାଇଥିଲେ। ଏହା ଦେଖିବା ପରେ ନିଜ ହସ ରୋକିପାରି ନ ଥିଲେ ଡ୍ରେସିଂ ରୁମ୍ରେ ବସିଥିବା କୋହଲି। ତେବେ ତାଙ୍କ ସ୍କୋର ଯେତେବେଳେ ୪୮ ଥିଲା, ଭୁଲ୍ବଶତଃ ସ୍କୋର ବୋର୍ଡରେ ୪୯ ଲେଖାଥିଲା। ଏହି ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହୋଇଛି।
