ଭୁବନେଶ୍ୱର, ୧୩।୫(ବ୍ୟୁରୋ): ପ୍ରବାସୀ ଓଡ଼ିଆଙ୍କ ଘରବାହୁଡ଼ା ଯୋଗୁ କରୋନା ସଂକ୍ରମିତଙ୍କ ସଂଖ୍ୟା ରାଜ୍ୟରେ ବଢ଼ି ଚାଲଛି। ଏହାକୁ ଲକ୍ଷ୍ୟକରି ରାଜ୍ୟ ସରକାର ମଙ୍ଗଳବାର ୪ ଜିଲାରେ କରୋନା ପରିଚାଳନା ଦାୟିତ୍ୱରେ ୧୫ ଜଣ ବରିଷ୍ଠ ଓଏଏସ୍ ଅଫିସରଙ୍କୁ ଦାୟିତ୍ୱ ଦେଇଛନ୍ତି। ଯୁଗ୍ମ ସଚିବ ଓ ଉପସଚିବ ପାହ୍ୟାର ଅଫିସରଙ୍କୁ ତୁରନ୍ତ ନିଜ କାର୍ଯ୍ୟରୁ ରିଲିଭ୍ ହୋଇ ଆବଣ୍ଟିତ ଜିଲାରେ କାର୍ଯ୍ୟ କରିବାକୁ ନିର୍ଦ୍ଦେଶନାମା ଜାରି କରାଯାଇଛି। ସରକାରଙ୍କ ସାଧାରଣ ପ୍ରଶାସନ ବିଭାଗ ପକ୍ଷରୁ ମଙ୍ଗଳବାର ଜାରି କରାଯାଇଥିବା ବିଜ୍ଞପ୍ତି ଅନୁସାରେ, ଯାଜପୁର, ବାଲେଶ୍ୱର, କେନ୍ଦ୍ରାପଡ଼ା ଓ ଭଦ୍ରକ ଜିଲାର କୋଭିଡ୍ ପରିଚାଳନା ଦାୟିତ୍ୱରେ ଏହି ଅଫିସରଙ୍କୁ ନିୟୋଜିତ କରାଯାଇଛି। ଭଦ୍ରକ ଜିଲା ଦାୟିତ୍ୱରେ ସର୍ବାଧିକ ୫ ଜଣ ଅଫିସର ତଥା, ନିଗମାନନ୍ଦ ପଣ୍ଡା, ଅଶୋକ କୁମାର ବେହୁରିଆ, ସୁରେନ୍ଦ୍ର କୁମାର ପଣ୍ଡା, ବିକାଶ ଚନ୍ଦ୍ର ବାଇନ ଓ ଅଶ୍ୱିନୀ କୁମାର ମେହେରଙ୍କୁ ଦାୟିତ୍ୱ ମିଳିଛି। ସେହିପରି କେନ୍ଦ୍ରାପଡ଼ା ଜିଲା ପାଇଁ ମନୋରଞ୍ଜନ ମଲିିକ, ସନ୍ତୋଷ କୁମାର ଦାଶ, ଦୀପକ ରାଉତରାଏ ଓ ଶୈଳେନ୍ଦ୍ର କୁମାର ଜେନାଙ୍କୁ ଦାୟିତ୍ୱ ଦିଆଯାଇଛି। ଯାଜପୁର ଜିଲା ଲାଗି ରାଜସ୍ବ ଓ ବିପର୍ଯ୍ୟ ପରିଚାଳନା ବିଭାଗ ଯୁଗ୍ମ ସଚିବ ଦିଲୀପ କୁମାର ସାହୁ, ଉଚ୍ଚଶିକ୍ଷା ବିଭାଗର ଯୁଗ୍ମ ସଚିବ ବିରେନ୍ଦ୍ର କୋରକୋରା, କେବିକେ ଯୁଗ୍ମ ପ୍ରଶାସନିକ ଅଧିକାରୀ ନୃପରାଜ ସାହୁ, ପୁରୀ-କୋଣାର୍କ ଡେଭଲପମେଣ୍ଟ ଅଥରିଟି ସଚିବ ଲଲାଟେନ୍ଦୁ ସାହୁଙ୍କୁ ଦାୟିତ୍ୱ ଦିଆଯାଇଛି। ବାଲେଶ୍ୱର ଜିଲା ପାଇଁ ଇଡ୍କୋ ଲ୍ୟାଣ୍ଡ ଅଫିସର ଲକ୍ଷ୍ମଣ ମଲିକ, ଷ୍ଟାଫ ସିଲେକ୍ସନ କମିଶନର ଯୁଗ୍ମ ସଚିବ ମନୋରଞ୍ଜନ ମଲିକଙ୍କୁ ଦାୟିତ୍ୱ ଦିଆଯାଇଛି। ଏହି ଅଫିସରମାନେ ସମ୍ପୃକ୍ତ ଜିଲାଗୁଡ଼ିକର ଜିଲାପାଳଙ୍କ ଅଧୀନରେ କାର୍ଯ୍ୟ କରିବେ ଓ ସିଧାସଳଖ ତାଙ୍କୁ ରିପୋର୍ଟ କରିବେ। ସୂଚନାଯୋଗ୍ୟ, ରାଜ୍ୟ ସରକାର ଗତ ସପ୍ତାହରେ ଗଞ୍ଜାମ ଜିଲା ପାଇଁ ୫ଜଣ ବରିଷ୍ଠ ଓଏଏସ୍ ଅଫିସରଙ୍କୁ ନିୟୋଜିତ କରିଛନ୍ତି। ଏହି ଅଫିସରମାନେ ସମ୍ପୃକ୍ତ ଜିଲାଗୁଡ଼ିକରେ କରୋନା ପରିଚାଳନା କାର୍ଯ୍ୟରେ ଜିଲା ପ୍ରଶାସନ ଓ ସେଠାରେ ନିଯୁକ୍ତ ପର୍ଯ୍ୟବେକ୍ଷକ (ଆଇଏଏସ୍ ଅଫିସର)ଙ୍କ ମଧ୍ୟରେ ସମନ୍ବୟ ରଖି କାର୍ଯ୍ୟ କରିବେ ବୋଲି ଜଣାପଡ଼ିଛି।