ଓ୍ବାଶିଂଟନ,୨୯।୩: କରୋନା ଭୂତାଣୁ ସଂକ୍ରମଣ ନେଇ ସାରା ପୃଥିବୀରେ ଆତଙ୍କ ଦେଖାଦେଇଛି। ଇତିମଧ୍ୟରେ ପୃଥିବୀର ୧୯୫ ଦେଶରେ କରୋନା ସଂକ୍ରମିତ ହୋଇସାରିଛି। ସେହିପରି ମୃତ୍ୟୁ ସଂଖ୍ୟା ୩୦ ହଜାର ୮୭୩ ଛୁଇଁଛି। କରୋନାକୁ ମିଶାଇ ୪ ମହାମାରୀ ଯୋଗୁ ପୃଥିବୀର ଆର୍ଥିକ ସ୍ଥିତି ଦୋହଲି ଯାଇଥିଲା। ସେଥିମଧ୍ୟରେ ୧୭୨୦ରେ ପ୍ଲେଗ୍ ଯୋଗୁ ସ୍ଥିତି ଅସମ୍ଭାଳ ହୋଇଥିଲା। କୋଟି କୋଟି ଲୋକଙ୍କ ମୃତ୍ୟୁ ଘଟିଥିଲା। ପରିଷ୍କାର ପରିଚ୍ଛନ୍ନତାରେ ଅଭାବ ଯୋଗୁ ଶିଳ୍ପସଂସ୍ଥା ଗଢ଼ିଉଠିଥିବା ଅଞ୍ଚଳରେ ମୂଷା ଚୁଚୁନ୍ଦ୍ରାଙ୍କ ଦ୍ୱାରା ପ୍ଲେଗ୍ ଭୂତାଣୁ ସଂକ୍ରମଣ ହୋଇ ମହାମାରୀ ସ୍ଥିତି ସୃଷ୍ଟି କରିଥିଲା। ପରବର୍ତ୍ତୀ ସମୟରେ ୧୮୨୦ରେ କଲେରା ଯୋଗୁ କୋଟି କୋଟି ଲୋକଙ୍କ ଜୀବନ ଯାଇଥିଲା। ଭାରତରେ ଶହ ଶହ ଗାଁ କଲେରା ଯୋଗୁ ପଦା ହୋଇଯାଇଥିବାର ନଜିର ରହିଛି। ୧୯୨୦ରେ ସ୍ପାନିଶ୍ ଫ୍ଲୁ ଭୂତାଣୁ ସଂକ୍ରମଣରେ କୋଟି କୋଟି ଲୋକଙ୍କ ମୃତ୍ୟୁ ଘଟିଥିଲା। ଏହି ମହାମାରୀ ଘଟିବାର ପ୍ରାୟ ଶହେ ବର୍ଷ ପରେ ଏବେ ପୃଥିବୀରେ କରୋନା ଆତଙ୍କ ସୃଷ୍ଟି କରିଛି। ଏହାକୁ ରୋକିବାକୁ ବର୍ତ୍ତମାନ ସୁଦ୍ଧା କୌଣସି ଦେଶର ସରକାର ସକ୍ଷମ ହୋଇ ନାହାଁନ୍ତି। ଉଦ୍ୟମ ଜାରି ରହିଛି। ଖୁବ୍ ଶୀଘ୍ର ଏହାର ଚିକିତ୍ସା ସମ୍ଭବ ହେବ ବୋଲି ଚାଇନା, ଆମେରିକା ଆଦି ବିକଶିତ ରାଷ୍ଟ୍ରର ବୈଜ୍ଞାନିକମାନେ ସୂଚନା ଦେଇଛନ୍ତି।
