ଯାଜପୁର ଟାଉନ ୧୪।୮(ଡି.ଏନ୍.ଏ.)- ଯାଜପୁର ଜିଲା ପୋଲିସ ପ୍ରଶାସନ ପକ୍ଷରୁ ବାଳ ଶ୍ରମିକ ବା ଶିଶୁ ଶ୍ରମିକଙ୍କୁ ଉଦ୍ଧାର କରାଯିବା ପାଇଁ ଆରମ୍ଭ ହୋଇଛି ପରୀ-୩ ଅଭିଯାନ। ଏସ୍ପି ଚରଣ ସିଂ ମୀନାଙ୍କ ନିର୍ଦ୍ଦେଶ କ୍ରମେ ଯାଜପୁର ଥାନାର ଭାରାପ୍ରାପ୍ତ ଅଧିକାରୀ ମାନସ ରଞ୍ଜନ ଚକ୍ରଙ୍କ ନେତୃତ୍ୱରେ ଏକ ଟିମ୍ ମଙ୍ଗଳବାର ସହରର ମହିଳା କଲେଜ ଛକ, ଶୀତଳେଶ୍ୱର ଓ ବସଷ୍ଟାଣ୍ଡ ଅଞ୍ଚଳରେ ଥିବା ଫଳ ଦୋକାନ, ଇଟାଭାଟି ଏବଂ ଗ୍ୟାରେଜରୁ ୪ଜଣ ଶିଶୁ ଶ୍ରମିକଙ୍କୁ ଉଦ୍ଧାର କରିଛି ା ଏମାନଙ୍କ ମଧ୍ୟରେ ୩ଜଣ ନାବାଳକ ହୋଇଥିବାବେଳେ ଜଣେ ନାବାଳିକା ଅଛନ୍ତି। ୨ଜଣଙ୍କ ଘର ଯାଜପୁର ଏବଂ ଅନ୍ୟ ୨ଜଣଙ୍କ ଭଦ୍ରକ ଜିଲାରେ ବୋଲି ଜଣାପଡ଼ିଛି। ଏହି ୪ଶିଶୁ ଶ୍ରମିକଙ୍କୁ ପୋଲିସ ଉଦ୍ଧାର ପରେ ଶିଶୁ ମଙ୍ଗଳ କମିଟି ନିକଟରେ ହାଜର କରାଇଥିଲା । ପରେ ସେମାନଙ୍କୁ ସ୍ଥାନୀୟ ବାଳାଶ୍ରମରେ ଆଶ୍ରୟ ନେବା ନିମନ୍ତେ ପଠାଇ ଦିଆଯାଇଛି। ସୂଚନାଯୋଗ୍ୟ ଯେ ଏହି ଥାନା ସମେତ ସମଗ୍ର ଜିଲାରେ ବହୁ ଶିଶୁ ଶ୍ରମିକ ଗ୍ୟାରେଜ, ଇଟାଭାଟି ଇତ୍ୟାଦି ଭଳି ବିପଦପୂର୍ଣ୍ଣ ସ୍ଥାନରେ କାମ କରୁଛନ୍ତି। ପୋଲିସ ପରୀ-୨ ଅଭିଯାନରେ ଅନେକ ଶିଶୁ ଶ୍ରମିକଙ୍କୁ ଉଦ୍ଧାର କରି ସେମାନଙ୍କ ପିତାମାତାଙ୍କୁ ହସ୍ତାନ୍ତର କରିଥିବା ବେଳେ ଏବେ ଜିଲାପାଳ ରଞ୍ଜନ କୁମାର ଦାସ ଏବଂ ଏସ୍ପି ମୀନାଙ୍କ ନିର୍ଦ୍ଦେଶ କ୍ରମେ ପ୍ରତ୍ୟେକ ଥାନା ପକ୍ଷରୁ ପରୀ-୩ ଅଭିଯାନକୁ ଜୋରଦାର କରାଯାଇ ଉଦ୍ଧାର କାର୍ଯ୍ୟକୁ ବ୍ୟାପକ କରାଯାଉଛି। ଶିଶୁ ଶ୍ରମିକଙ୍କୁ କେଉଁ କେଉଁ ସ୍ଥାନରେ ନିୟୋଜିତ କରାଯାଇଛି ସେ ସମ୍ପର୍କରେ ସ୍ଥାନୀୟଥାନାକୁ ଜଣାଇବା ପାଇଁ ପୋଲିସ କାର୍ଯ୍ୟାଳୟ ପକ୍ଷରୁ ଜିଲାବାସୀଙ୍କୁ ଅନୁରୋଧ କରାଯାଇଛି। ଯେଉଁମାନେ ଏଭଳି ଖବର ଥାନାଧିକାରୀ ବା ଏସ୍ପିଙ୍କୁ ଜଣାଇବେ ସେମାନଙ୍କ ପରିଚୟ ସମ୍ପୂର୍ଣ୍ଣ ଗୋପନ ରଖାଯିବ ବୋଲି ଜିଲାପାଳ ଦାସ କହିଛନ୍ତି।