ନୂଆଦିଲ୍ଲୀ,୩୦।୬: ଗତ କିଛି ଦିନରୁ ଭାରତ ଓ ଚାଇନା ମଧ୍ୟରେ ସୀମା ବିବାଦ ଦେଖାଦେଇଛି। ଲଦାଖ ଘାଟିରେ ଜାରି ରହିଥିବା ଉତ୍ତେଜନା ପରେ ଦୁଇ ଦେଶର ସମ୍ପର୍କ ମଧ୍ୟରେ ଫାଟ ସୃଷ୍ଟି ହୋଇଛି। ବ୍ୟବସାୟିକ କୁଟନୀତି ଜରିଆରେ ଭାରତ ସରକାର ଚାଇନାକୁ କଡ଼ା ଜବାବ ଦେଇଛନ୍ତି। ସୋମବାର ଦେଶରେ ୫୯ଚାଇନା ଆପ୍ ଉପରେ ପ୍ରତିବନ୍ଧକ ଲଗାଇବା ପରେ ମୋଦି ସରକାର ପୁଣି ଥରେ ଚାଇନାକୁ ଝଟ୍କା ଦେବାକୁ ଯାଉଥିବା ଜଣାପଡ଼ିଛି। ଭାରତରେ ୫ଜି ସେବା ପାଇଁ ଚାଇନାର ହାଓ୍ବାଇ କମ୍ପାନୀ ହେଉଛି ମୁଖ୍ୟ ଦାବିଦାର। ବର୍ତ୍ତମାନ ଭାରତ ୫ଜି ନିଲାମୀକୁ ଗୋଟିଏ ବର୍ଷ ପାଇଁ ସ୍ଥଗିତ ରଖିଥିବା ଜଣାପଡ଼ିଛି। ଗତବର୍ଷ ହାଓ୍ବାଇକୁ ୫ଜି ଟ୍ରାୟଲରେ ଭାଗ ନେବାକୁ ଅନୁମତି ଦିଆଯାଇଥିଲା। ହେଲେ ଏବେ ମୋଦି ସରକାର ୫ଜି ନିଲାମରେ ଏହି କମ୍ପାନୀ ଉପରେ ପ୍ରତିବନ୍ଧକ ଲଗାଇପାରନ୍ତି ବୋଲି କୁହାଯାଉଛି। ସୂଚନାଯୋଗ୍ୟ, ହାଓ୍ବାଇ ଉତ୍ପାଦନ ଉପରେ ପୂର୍ବରୁ ଆମେରିକା ମେ ୨୦୨୧ ପର୍ଯ୍ୟନ୍ତ ପ୍ରତିବନ୍ଧକ ଲଗାଇସାରିଛି। ଏବେ ଆମେରିକା ଅନ୍ୟଦେଶମାନଙ୍କ ଉପରେ ଏହି କମ୍ପାନୀକୁ ନିଜ ଦେଶରୁ ବାହାର କରିବା ପାଇଁ ଚାପ ପକାଉଥିବା ସୂଚନା ରହିଛି। ସୋମବାର ମୋଦି ସରକାରଙ୍କ ବରିଷ୍ଠ ମନ୍ତ୍ରୀଙ୍କ ବସିଥିବା ବୈଠକରେ ୫ଜିକୁ ନେଇ ଆଲୋଚନା ହୋଇଥିବା ବିଶ୍ୱସ୍ତ ସୂତ୍ରରୁ ଜଣାପଡ଼ିଛି। ଏହି ବୈଠକରେ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା, ଆଇନ ମନ୍ତ୍ରୀ ରବିଶଙ୍କର ପ୍ରସାଦ, ବର୍ହିବ୍ୟାପାର ମନ୍ତ୍ରୀ ଏସ୍. ଜୟଶଙ୍କର ଓ ବାଣିଜ୍ୟ ମନ୍ତ୍ରୀ ପୀୟୁଷ ଗୋୟଲ ସାମିଲ ହୋଇଥିଲେ। ସୁଚନା ମୁତାବକ ସିଙ୍ଗାପୁରରେ ୫ଜି ରେସ୍ରେ ହାଓ୍ବାଇକୁ ବାଦ୍ ଦିଆଯାଇଛି। ସେଠାରେ ହାଓ୍ବାଇ ବଦଳରେ ନୋକିଆ ଓ ଏରିକ୍ସନ୍କୁ ସୁଯୋଗ ଦିଆଯାଇଛି।