କଣିହାଁ, ୧୯।୩(ଡି.ଏନ.ଏ.) ତାଳଚେର ବ୍ଲକ କଣିହାଁ ଥାନା ଅଧୀନ କୁମୁଣ୍ଡା ପଞ୍ଚାୟତ ଚିତ୍ତଲପୁର ଗ୍ରାମରେ ମଙ୍ଗଳବାର ଅଭାବନୀୟ ଘଟଣା ଘଟିଛି। ସାମାନ୍ୟ ବଚସାକୁ କେନ୍ଦ୍ର କରି ବନ୍ଧୁଙ୍କ ପଥର ମାଡ଼ରେ ଜଣେ ଦଶମ ଶ୍ରେଣୀ ଛାତ୍ରଙ୍କ ଜୀବନ ଯାଇଛି। ମୃତକ ହେଲେ ସନ୍ଦୀପ ନାୟକ। ଏ ନେଇ ପରିବାର ଲୋକଙ୍କ ଅଭିଯୋଗ ଅନୁଯାୟୀ ନଂ. ୪୫/୨୦ରେ ଏକ ମାମଲା ରୁଜୁ ହୋଇଛି। ପୋଲିସ ଘଟଣାର ତଦନ୍ତ ଆରମ୍ଭ କରିଛି।
ପୋଲିସ ପକ୍ଷରୁ ମିଳିଥିବା ସୂଚନା ଅନୁଯାୟୀ, ସନ୍ଦୀପ ଏବଂ ତାଙ୍କର ଅନ୍ୟ ୨ଜଣ ନାବାଳକ ବନ୍ଧୁ ମଙ୍ଗଳବାର ଏକ ସାଇକେଲରେ ଚୁଟି କାଟିବାକୁ ସେଲୁନକୁ ଯାଇଥିଲେ। କିଛି ଦିନ ତଳେ ସନ୍ଦୀପ ଜଣେ ସାଙ୍ଗଙ୍କଠାରୁ ୫ ଟଙ୍କା ଧାର ନେଇଥିଲେ। ସେଲୁନ୍ରେ ଟଙ୍କା ନିଅଣ୍ଟ ହେବାରୁ ସମ୍ପୃକ୍ତ ବନ୍ଧୁ ଜଣକ ସନ୍ଦୀପଙ୍କୁ ୫ଟଙ୍କା ଦେବାକୁ କହିଥିଲେ। ଏହାକୁ ନେଇ ସେମାନଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା। ସେଲୁନ୍ରୁ ଫେରୁଥିବା ବାଟରେ ଧାର ଟଙ୍କାକୁ ନେଇ ଉଭୟଙ୍କ ଭିତରେ ପୁଣି ବଚସା ହୋଇଥିଲା। ଏଥିରେ ଉତ୍କ୍ଷିପ୍ତ ହୋଇ ସମ୍ପୃକ୍ତ ବନ୍ଧୁଜଣକ ରାସ୍ତାକଡ଼ରେ ପଡ଼ିଥିବା ଏକ ପଥର ସନ୍ଦୀପଙ୍କୁ ଲକ୍ଷ୍ୟ କରି ଫିଙ୍ଗିଥିଲେ। ଉକ୍ତ ପଥର ସନ୍ଦୀପଙ୍କ କାନମୁଣ୍ଡାରେ ବାଜିଥିଲା। ଗୁରୁତର ଅବସ୍ଥାରେ ତାଙ୍କୁ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିବା ପରିବାର ଲୋକେ ଅଭିଯୋଗରେ ଦର୍ଶାଇଛନ୍ତି।
ଏ ନେଇ ଥାନାଧିକାରୀ ପ୍ରଭାତ ତ୍ରିପାଠୀ କୁହନ୍ତି, ଅଭିଯୁକ୍ତ ଜଣକ ନାବାଳକ ବୋଲି ଏତଲାରେ ଦର୍ଶାଯାଇଛି। ଅଭିଯୋଗକୁ ଭିତ୍ତିକରି ପୋଲିସ ତଦନ୍ତ ଆରମ୍ଭ କରିଛି।
