??
ଯାଜପୁର ଅଫିସ,୧୫ା୪: ଯାଜପୁର ଜିଲାରେ ୨ଜଣ କରୋନା ରୋଗୀ ଚିହ୍ନଟ ହୋଇସାରିଲେଣି। ଜଣେ ସୁସ୍ଥ ହୋଇ ଘରକୁ ଫେରିଥିବାବେଳେ ମଙ୍ଗଳବାରଠାରୁ ଆଉ ଜଣେ କରୋନା ରୋଗୀ ଚିକିତ୍ସା ପାଇଁ ଭର୍ତ୍ତି ହୋଇଛନ୍ତି। କରୋନା ଭୂତାଣୁ ଯେପରି ଅଧିକ ସଂକ୍ରମଣ ନ ହେବ ସେଥିପାଇଁ ଜିଲା ପ୍ରଶାସନ ପକ୍ଷରୁ ସମସ୍ତ ପ୍ରକାର ବ୍ୟବସ୍ଥା ଗ୍ରହଣ କରାଯାଇଛି। ତଥାପି ଜିଲାର ପ୍ରାୟ ୨୦ ପ୍ରତିଶତ ଲୋକେ ଏହାକୁ ହାଲୁକାଭାବେ ଗ୍ରହଣ କରୁଥିବା ଦେଖିବାକୁ ମିଳିଛି। ଯାଜପୁରରୋଡ ସହରର ବିଭିନ୍ନ ବ୍ୟାଙ୍କରେ ବୁଧବାର ମଧ୍ୟାହ୍ନରେ ମୁଣ୍ଡଫଟା ଖରା ସତ୍ତ୍ୱେ ମହିଳାମାନେ ଜନଧନ ଆକାଉଣ୍ଟରୁ ୫୦୦ ଟଙ୍କା ଉଠାଇବା ପାଇଁ ଲମ୍ବା ଧାଡି ଲଗାଇଥିଲେ। ମାତ୍ର ଏହି ସମୟରେ ସାମାଜିକ ଦୂରତାକୁ କେହି ମାନୁ ନ ଥିବା ଦେଖାଯାଇଥିଲା। ଫଳରେ ବ୍ୟାଙ୍କ କର୍ତ୍ତୃପକ୍ଷଙ୍କ ଅସହଯୋଗ ଜିଲାବାସୀଙ୍କୁ କାଳ ହୋଇପାରେ ବୋଲି ମତପ୍ରକାଶ ପାଇଛି।
ପ୍ରଥମ ପର୍ଯ୍ୟାୟ ଲକଡାଉନ ସମୟରେ କଟକଣା ପାଳନରେ ଅସହଯୋଗ କରିଥିବା ବ୍ୟକ୍ତିଙ୍କ ବିରୋଧରେ ଧାରା ୧୮୮ (ଲୋକ ସେବକଙ୍କ ଦ୍ୱାରା ଜାରି ଆଦେଶର ଅମାନ୍ୟ), ଧାରା ୨୬୯ (ଜୀବନ ପ୍ରତି ବିପଦପୂର୍ଣ୍ଣ ରୋଗ ସଂକ୍ରମଣ ସମ୍ଭାବନା ସୃଷ୍ଟି କରୁଥିବା ଅବହେଳାତ୍ମକ କାର୍ଯ୍ୟ), ଧାରା ୨୭୦ (ଜୀବନ ପ୍ରତି ବିପଦପୂର୍ଣ୍ଣ ରୋଗ ସଂକ୍ରମଣ ସମ୍ଭାବନାକାରକ କାର୍ଯ୍ୟ) ଓ ଧାରା ୨୭୧ (ନିରୋଧ ନିୟମ ଅମାନ୍ୟ)ରେ ମାମଲା ରୁଜୁ କରିବାକୁ ଜିଲାପାଳ ରଞ୍ଜନ କୁମାର ଦାସ ପୋଲିସକୁ ନିର୍ଦ୍ଦେଶ ଦେଇଥିଲେ। ମାତ୍ର ବିଭିନ୍ନ ହାଟ ବଜାରରେ ଲୋକଙ୍କ ଗହଳି ଦେଖିବାକୁ ମିଳିଛି। ଗତ ୨ ତାରିଖରୁ ପ୍ରଧାନମନ୍ତ୍ରୀ ମହିଳାଙ୍କ ଜନଧନ ଆକାଉଣ୍ଟରେ ୫୦୦ ଟଙ୍କା ଲେଖାଏଁ ପ୍ରଦାନ କରିଛନ୍ତି। ଏହି ଟଙ୍କା ଉଠାଇବାକୁ ଏବେ ପ୍ରତ୍ୟେକ ବ୍ୟାଙ୍କରେ ମହିଳାଙ୍କ ଲମ୍ବାଧାଡ଼ି ଦେଖିବାକୁ ମିଳିଛି। ବ୍ୟାଙ୍କ କର୍ତ୍ତୃପକ୍ଷ ସାମାଜିକ ଦୂରତା ରକ୍ଷା କରିବାକୁ କୌଣସି ପଦକ୍ଷେପ ଗ୍ରହଣ କରି ନାହାନ୍ତି। କରୋନା କଟକଣାରେ ବ୍ୟତିକ୍ରମ ହେଲେ ଆଇନ ଅନୁଯାୟୀ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜିଲାପାଳ ସତର୍କ କରାଇ ଦେଇଛନ୍ତି। ଏହାସତ୍ତ୍ୱେ ଅନେକ କ୍ଷେତ୍ରରେ କିଛି ଲୋକଙ୍କ ଅସାବଧାନତା ଯୋଗୁ ସମସ୍ତ ଜିଲାବାସୀଙ୍କ ପ୍ରତି ବିପଦ ସୃଷ୍ଟି ହେବାର ସମ୍ଭାବନା ଦେଖାଦେଇଛି। ଏ ସମ୍ପର୍କରେ କଳିଙ୍ଗନଗର ଅତିରିକ୍ତ ଜିଲାପାଳ ସନ୍ତୋଷ ମିଶ୍ରଙ୍କୁ ପଚାରିବାରେ, ଗ୍ରାହକ କିପରି ସାମାଜିକ ଦୂରତା ବଜାୟ ରଖିବେ ସେ ନେଇ ବ୍ୟାଙ୍କ କର୍ତ୍ତୃପକ୍ଷଙ୍କୁ ସୂଚନା ଦିଆଯିବ। ଏଥିସହ ଲୋକଙ୍କୁ ମଧ୍ୟ ସଚେତନ କରାଯିବ। ତଥାପି ଯଦି ଲୋକ ନ ମାନନ୍ତି ତେବେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି।