ଭୁବନେଶ୍ୱର,୩୧।୧(ବ୍ୟୁରୋ): ଚାଷଜମିକୁ ପର୍ଯ୍ୟାପ୍ତ ଜଳସେଚନ ପାଇଁ ରାଜ୍ୟ ସରକାର ରାଜ୍ୟର ବିଭିନ୍ନ ଅଞ୍ଚଳରେ ୫୦ଟି ଚେକ୍ ଡ୍ୟାମ୍ ନିର୍ମାଣ କରିବାକୁ ଯୋଜନା କରିଛନ୍ତି। ନିକଟରେ ମୁଖ୍ୟ ଶାସନ ସଚିବ ଅସିତ୍ କୁମାର ତ୍ରିପାଠୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଏହି ନିଷ୍ପତ୍ତି ନିଆଯାଇଛି। ନଦୀର ଉପର ମୁଣ୍ଡରେ ଥିବା ପୋଲ ନିକଟରେ ଏହି ଚେକ୍ ଡ୍ୟାମ୍ ନିର୍ମାଣ କରାଯିବ। ଗ୍ରାମ୍ୟ ଉନ୍ନୟନ ବିଭାଗ ଏବଂ ପୂର୍ତ୍ତ ବିଭାଗ ତତ୍ତ୍ୱାବଧାନରେ ଏହି ଚେକ୍ ଡ୍ୟାମ୍ ନିର୍ମାଣ କରାଯିବ। ଯେଉଁ ଜିଲାରେ ଚାଷଜମି ପାଇଁ କମ୍ ଜଳସେଚନ ହୋଇଛି ସେଠାରେ ଏହି ସବୁ ଚେକ୍ ଡ୍ୟାମ୍ ନିର୍ମାଣ କରାଯିବ। ମିଳିଥିବା ସୂଚନା ଅନୁଯାୟୀ ଏହିସବୁ ଚେକ୍ ଡ୍ୟାମ୍ ନିର୍ମାଣ ପାଇଁ ଜଳ ସେଚନ ବିଭାଗ ସମ୍ପୂର୍ଣ୍ଣ ପ୍ରକଳ୍ପ ରିପୋର୍ଟ ପ୍ରସ୍ତୁତ କରିବ। କ୍ଷୁଦ୍ର ଜଳସେଚନ ବିଭାଗ ମୁଖ୍ୟଯନ୍ତ୍ରୀ ଚେକ୍ ଡ୍ୟାମ୍ ନିର୍ମାଣର ତଦାରଖ କରିବେ। ଏଥିପାଇଁ ଆସନ୍ତା ବଜେଟରେ ୨୫ କୋଟି ଟଙ୍କା ବ୍ୟୟ ବରାଦ କରାଯିବ। ମହାରାଷ୍ଟ୍ର ସରକାର ଚାଷଜମିକୁ ପାଣି ଯୋଗାଇ ଦେବାକୁ ପ୍ରତ୍ୟେକ ପୋଲ ନିକଟରେ ଚେକ୍ ଡ୍ୟାମ୍ କରିଛନ୍ତି। ତେବେ ଏହାର ରକ୍ଷଣା ବେକ୍ଷଣ ନେଇ ସମସ୍ୟା ସୃଷ୍ଟି ହେବ। ମହାନଦୀ ଜଳ ବିବାଦ ପରେ ରାଜ୍ୟ ସରକାରଙ୍କର ଚେତା ପଶିଛି। ଏହାଛଡ଼ା ବଡ଼ ବଡ଼ ନଦୀ ଯଥା ମହାନଦୀ, ବ୍ରାହ୍ମଣୀ, ବୈତରଣୀ, ଋଷିକୁଲ୍ୟା ନଦୀରେ ରାଜ୍ୟ ସରକାର ବ୍ୟାରେଜ ନିର୍ମାଣ କରିବାକୁ ନିଷ୍ପତ୍ତି ନେଇଛନ୍ତି। ରାଜ୍ୟରେ ୪୦ଟି ବୃହତ୍ ବ୍ୟାରେଜ ନିର୍ମାଣ କରିବାକୁ ସରକାର ନିଷ୍ପତ୍ତି ନେଇଛନ୍ତି। ୨୦୧୯-୨୦ରୁ ଆରମ୍ଭହୋଇ ୬ ବର୍ଷ ମଧ୍ୟରେ ପ୍ରକଳ୍ପ କାର୍ଯ୍ୟ ଶେଷ ହେବ। ଏଥିରେ ମୋଟ ୧୧,୭୧୩.୨୨ କୋଟି ଟଙ୍କା ଖର୍ଚ୍ଚ ହେବ ବୋଲି ଆକଳନ କରାଯାଇଛି।