ବେଜିଂ,୧୮।୨: ଇତିମଧ୍ୟରେ ଚାଇନାରେ ଦେଖାଦେଇଥିବା କରୋନା ଭୁତାଣୁ ସଂକ୍ରମଣକୁ ୫୦ ଦିନ ବିତିଛି। ୨୦୧୯ ଡିସେମ୍ବର ୩୧ରେ ପ୍ରଥମ କରୋନା ସଂକ୍ରମଣ ଘଟଣା ଘଟିଥିଲା। କରୋନା ଏବେ ପୃଥିବୀର ୨୯ରୁ ଅଧିକ ଦେଶରେ ପହଞ୍ଚିସାରିଛି। ଚାଇନାରୁ ସେଠାକୁ ଯାଇଥିବା ସଂକ୍ରମିତ ଲୋକଙ୍କ ଦ୍ୱାରା ଏହା ବ୍ୟାପିଥିବା କୁହାଯାଉଛି। କରୋନା ସଂକ୍ରମଣକୁ ରୋକିବା ପାଇଁ ବର୍ତ୍ତମାନ ସୁଦ୍ଧା କୌଣସି ପ୍ରତିଷେଧକ ଔଷଧ ବାହାରି ନାହିଁ। ତେବେ ଏହାର ଚିହ୍ନଟ ପାଇଁ ଚାଇନା ଏକ ଟେଷ୍ଟ କିଟ୍ ପ୍ରସ୍ତୁତ କରିଛି। ଏଥିରେ ସନ୍ଦିଗ୍ଧଙ୍କ ବ୍ଲଡ୍ ନେଇ ପରୀକ୍ଷା କଲେ ୧୫ ମିନିଟ୍ ମଧ୍ୟରେ ସଂକ୍ରମଣ ସମ୍ପର୍ର୍କିତ ଆବଶ୍ୟକ ସୂଚନା ମିଳିଥାଏ। ଫେବୃୟାରୀ ୭ରେ ଏହି ଭୁତାଣୁକୁ କୋଭିଡ୍-୧୯ ଭାବେ ନାମିତ କରାଯାଇଛି। କରୋନାରୁ ମୁକ୍ତି ପାଇଁ ଇତିମଧ୍ୟରେ ଚାଇନା ସରକାର ୯୦ ହଜାର କୋଟି ଟଙ୍କା ଖର୍ଚ୍ଚ କରି ସାରିଲେଣି। ତେବେ ମଧ୍ୟ ସଂକ୍ରମିତଙ୍କୁ ଜୀବିତ ରଖିବା ଅସମ୍ଭବ ହୋଇ ପଡୁଛି। ସରକାରଙ୍କ ପକ୍ଷରୁ ଘରୁ ବାହାରକୁ ନ ବାହାରିବା ପାଇଁ ଲୋକଙ୍କୁ ପରାମର୍ଶ ଦିଆଯାଇଛି। ଫଳରେ ଲୋକ ଭୟରେ ନିଜ ଘରେ ବନ୍ଦ ହୋଇ ଜୀବନ ବିତାଇବାକୁ ବାଧ୍ୟ ହେଉଛନ୍ତି। ଫେବୃୟାରୀ ୧୬ ସୁଦ୍ଧା ଦେଶର ୭୬ କୋଟିରୁ ଅଧିକ ଲୋକଙ୍କ ଅବସ୍ଥା ଏଭଳି ହୋଇଥିବା କୁହାଯାଉଛି।