ଭଦ୍ରକ ଅଫିସ, ୧୦।୬- ଭଦ୍ରକ ପୌରପାଳିକାର ୨ ନମ୍ବର ୱାର୍ଡ ଅନ୍ତର୍ଗତ ରହଣିଆଠାରେ ପ୍ରତିଷ୍ଠା କରାଯାଇଥିବା ଅମୃତ ପାର୍କକୁ ବର୍ଷେ ନ ପୂରୁଣୁ ସୌନ୍ଦର୍ଯ୍ୟ ହରାଇ ବସିଛି। ପ୍ରାୟ ୫୦ ଲକ୍ଷ ଟଙ୍କାର ଏହି ପାର୍କ ୫୦ ଦିନ ବି ରହିଲାନି। ଦୁଇମାସ ମଧ୍ୟରେ ପାର୍କର ବିଭିନ୍ନ ଅଂଶ ଭାଙ୍ଗିରୁଜି ଯିବା ପୌରପାଳିକାର ନିମ୍ନମାନର କାର୍ଯ୍ୟ ଓ ଅଧିକାରୀଙ୍କ ତଦାରଖ ଅଭାବକୁ ପଦାରେ ପକାଇଛି। ରକ୍ଷଣାବେକ୍ଷଣ ଅଭାବରୁ ଏହି ଯୋଜନା ମୂଳ ଉଦ୍ଦେଶ୍ୟଠାରୁ ଦୂରେଇ ଯାଉଥିବା କୁହାଯାଉଛି।
ଉଲ୍ଲେଖନୀୟ ଯେ, ଭଦ୍ରକ ପୌରାଞ୍ଚଳବାସୀଙ୍କ ଅବସର ବିନୋଦନ ପାଇଁ ଅମୃତ ଯୋଜନା ଅଧୀନରେ ପ୍ରାୟ ୫୦ ଲକ୍ଷ ଟଙ୍କା ବ୍ୟୟରେ ଚରମ୍ପା ରହଣିଆଠାରେ ଏକ ଏକର ୪୦ ଡେସିମିଲ ଜାଗାରେ ଅମୃତ ପାର୍କ ନିର୍ମିତ ହୋଇଛି। ୨୦୧୮ ଜୁଲାଇ ୧୯ରେ ତତ୍କାଳୀନ ବିଧାୟକ ଯୁଗଳ କିଶୋର ପଟ୍ଟନାୟକ ଏହାକୁ ଉଦ୍ଘାଟନ କରିଥିଲେ। ଏହାସହିତ ନିକଟରେ ଥିବା ୧୨ ଏକର ରହଣିଆ ପୋଖରୀରେ ବୋଟିଂ କ୍ଲବ ଏକାଦିନରେ ଉଦ୍ଘାଟିତ ହୋଇଥିଲା। ଜିଲାପାଳ ଜ୍ଞାନରଞ୍ଜନ ଦାସ, ତତ୍କାଳୀନ ପୌରପାଳ ମାନସ କୁମାର ମହାନ୍ତି, ଉପାଧ୍ୟକ୍ଷା କୌଶରା ବେଗମ୍, ତତ୍କାଳୀନ କାର୍ଯ୍ୟନିର୍ବାହୀ ଅଧିକାରୀ ହିତାଂଶୁ ଶେଖର ସାମଲ ଓ କାଉନସିଲର ବନ୍ଦନା ରାଉତ, ପ୍ରୀତିଭାରତୀ ନାୟକ ଉପସ୍ଥିତ ଥିଲେ। ପାର୍କ ଉଦ୍ଘାଟନ ସମୟରେ ସହରବାସୀ ବେଶ୍ ଖୁସିବ୍ୟକ୍ତ କରିଥିଲେ। କିନ୍ତୁ ଦୁଇମାସ ମଧ୍ୟରେ ପାର୍କର ବିଭିନ୍ନ ଅଂଶ ଭାଙ୍ଗିରୁଜି ଗଲା। ପାର୍କ ଏବେ ଅଳିଆଗଦା ପାଲଟିଛି। ବୋଟିଂ କ୍ଲବ ଅକାମୀ ହୋଇପଡ଼ିଛି। ବୋଟିଂ ପାଇଁ ଉଦ୍ଦିଷ୍ଟ ରହଣିଆ ପୋଖରୀ ଦଳରେ ଆଚ୍ଛାଦିତ ହୋଇ ଖେଳପଡ଼ିଆର ଭ୍ରମ ସୃଷ୍ଟି କରୁଛି। ୩ଟି ବୋଟ୍ ଏବେ ଉଇ ଲାଗି ନଷ୍ଟ ହେବାକୁ ବସିଛି। ମୁଖ୍ୟ ଆକର୍ଷଣ କୁହାଯାଉଥିବା ବୋଟିଂ କ୍ଲବ ଏତେ ଟଙ୍କା ଖର୍ଚ୍ଚ ପରେ ମଧ୍ୟ କାମରେ ଲାଗିପାରୁନି। ଟୁରିଷ୍ଟ ବୋଟ୍ଗୁଡ଼ିକ ଖତ ଖାଉଛି। ସେଠାରେ ନିୟୋଜିତ ଥିବା କର୍ମଚାରୀଙ୍କ କାର୍ଯ୍ୟରେ ଅବହେଳା କାରଣରୁ ପାର୍କରେ ଲାଗିଥିବା ଲାଇଟ୍ ସବୁ ଭାଙ୍ଗିରୁଜି ଯାଇଛି। ପାର୍କକୁ ବିଦ୍ୟୁତ୍ ସଂଯୋଗ କରୁଥିବା ଟ୍ରାନ୍ସଫର୍ମର ଦୀର୍ଘମାସ ଧରି ପୋଡ଼ିଯାଇଥିବା ଜଣାପଡିଛି। ପିଲାଙ୍କ ଲାଗି ଥିବା ଖେଳ ସାମଗ୍ରୀ ଏତେ ନିମ୍ନମାନର ଥିଲା ଯେ ଦିନେ ଦୁଇଦିନ ମଧ୍ୟ ପିଲା ଖେଳିପାରିଲେ ନାହିଁ। ପାର୍କ ଭିତରେ ଥିବା ଫୁଲୱାରା(ଫାଉଣ୍ଟେନ) ଦିନଟିଏ ମଧ୍ୟ କାର୍ଯ୍ୟକ୍ଷମ ନ ହୋଇ ଅଚଳ ହୋଇଗଲା। ଚେୟାର୍ ଓ ଡଷ୍ଟବିନ ଭାଙ୍ଗି ଗଲାଣି। ପାର୍କ ସମ୍ମୁଖରେ କରାଯାଇଥିବା ଟିକେଟ କାଉଣ୍ଟର ଗୃହ କାର୍ଯ୍ୟ ସରିଥିଲେ ମଧ୍ୟ କାର୍ଯ୍ୟକ୍ଷମ ହୋଇପାରିଲାନି। ଏପରିକି ୫ ମାସ ଧରି ପାର୍କରେ ତାଲା ଝୁଲୁଛି। ନବନିର୍ମିତ ପାର୍କର ଏଭଳି ଅବ୍ୟବସ୍ଥା ପାଇଁ ଜନଅସନ୍ତୋଷ ବଢ଼ିବାରେ ଲାଗିଛି। ପୌରପାଳିକା କର୍ତ୍ତୃପକ୍ଷ ଏଥିପ୍ରତି ଦୃଷ୍ଟି ନ ଦେବାରୁ ଏଭଳି ପରିସ୍ଥିତି ଉପୁଜିଥିବା ଅଭିଯୋଗ ହେଉଛି। ସ୍ଥାନୀୟ ବାସିନ୍ଦା ରଶ୍ମିରଞ୍ଜନ ସାହୁ, ରମେଶ ବେହେରା, ସୁଧାଂଶୁ ଶେଖର ମହାନ୍ତି, ପ୍ରତାପ ନାୟକ ପ୍ରମୁଖ ପାର୍କକୁ ତୁରନ୍ତ କାର୍ଯ୍ୟକ୍ଷମ କରାଇବା ପାଇଁ ଦାବି କରିଛନ୍ତି। ଏ ସମ୍ପର୍କରେ ପୌରପାଳିକା କାର୍ଯ୍ୟନିର୍ବାହୀ ଅଧିକାରୀ ଦାୟିତ୍ୱରେ ଥିବା ଭଦ୍ରକ ତହସିଲଦାର ପ୍ରଦୀପ ସାହୁଙ୍କୁ ପଚାରିବାରୁ ଆସନ୍ତା ୧୫ରୁ ୨୦ ଦିନ ମଧ୍ୟରେ ଉକ୍ତ ପାର୍କ କାର୍ଯ୍ୟକ୍ଷମ କରାଯିବ ବୋଲି କହିଛନ୍ତି।